Sorkar development programme awm chhun NLUP hi kum nga chhung atana ruahman a ni a, 2010-11 khan tan a ni a, kumin hi a tawp kum a lo ni dawn ta. Kan hriat angin tuna rorel lai congress party hian 2008 MLA inthlan campaign auhla atan NLUP hi an hmang a, chhungkaw tinah Cheng nuai khat sem an tiam a, an sorkar tuk atanga NLUP tharthawh nghal a nih tur thu an sawi a nih kha. An sawi ang ngeiin NLUP chu an tharthawh leh ta a, a tir lamah kha chuan RNLUP (Revised NLUP) ti a sawi a nih nghe kha. January 14,2011 khan ropui takin NLUP chu chief minister-in Vanapa Hall-ah a hawng a, district khawpui dangah pawh a hawnna hun hi hman a ni bawk. Hemi denchhen hian kumtin January 14 hi ‘Kut Hnathawktute Ni’ atan hman a nih tur thu CM hian a puang a, NLUP sum dawng tura thlan mi 400 hnenah pawisa fai Rs 20,000 theuh a hlan nghal a. (Hetia official-a hawn a nih hma October, 2010-ah khan Darlawn leh Sakawrdai chhehvela hmunphiah chingtu chhungkaw 300 hnenah NLUP sum hi sem a ni tawh nghe nghe). Mahse, a kum lehah thuneitu lam hian Kut Hnathawktute Ni hi an theihnghilh palh ni tur a ni, a puala hun hman a ni lo a. Kum 2013 a hman tur pawh kha an theihnghilh hman tep niin NLUP thuneitu pakhat chuan min hrilh a, AMFU zarah an hre chhuak a, chawpchilh takin ruahmanna an siam a, lawmman dawng turte pawh an thlang chhuak a nih kha. He policy hian a tum ber chu thingtlang lo neih tihtawp a, leilung a innghat eizawnna tha zawk leh changtlung zawk siam te, mipui nawlpui dinhmun chawikan a, chumi ruala leilung, nungchate leh ramngaw (environment) venhim a, tuihna tihpun a hman tangkai bakah leilung hausakna hai chhuah te hi a tum a ni bawk. Chutianga ruahmanna tha tak chu Planning Commission pawhin 2010 chawhnu lam khan a pawmpui ta a ni. A tira ruahmanna ang chuan NLUP hmang tangkai tur hi chhungkaw 1,20,000 an ni a, Cheng vaibelchhe 2873.13 sen tur niin, kum 5 chhung awh tura ruahman a ni bawk. Hemi hnu hian NLUP dawng tur chhungkaw dang 1,500 a tihpun a ni a, tichuan a dawngtu hi chhungkaw 1,35,000 zet an tling ta tihna a nih chu. A tir lamah khan NLUP hi beiseina sang tak nena kalpui a ni a, chief minister phei chuan kum 10 chhungin Mizoramah mi rethei (BPL family) an awm tawh dawn loh thu leh tlangram loneih hi bansan hlen a nih tur thu a sawi a. Mizoram economy (GSDP) pawh hi thang awk awk tura beisei a ni a, kum nga kalpui hnuah chuan economy thanna pawh 16% zet a tlin an beisei a nih kha. Mahse, beisei ang chuan thil a kal lem lo. Economic Survey thar bera kan hmuh angin nikum (2014-15) chhung a state economy thanna chu 8.46 % a ni thung. Chutiang bawkin mitin sum lakluh chawhrual (per capita income) pawh nasa taka pung turin an beisei bawk. Sawi tawh angin NLUP hian hmawr a bawk hnai dawn ta a, sorkar calendar ang chuan thla 10 erh awrh chauh a awm ta. Kum 4 chuang liam ta atanga tun dinhmun hi han thlir kir ta ila, NLUP hlawhtlin leh tlin loh chungchanga kan ngaihdan hi a inang lo fur mai thei a ni. Politics zawnga thlirtute chuan fakna leh sawiselna an hmu teuhin a rinawm a, chutiang mi ni lo, party tan lam nei lo leh lai taka thlirtu tan pawh a hlawhtlinna ai hian beisei a phak lohna hian a buk rit zawk mahin a rinawm. Kan ram hruaitute ngei pawh hian an beisei ang hlawhtlinna an hmu bik lo niin a lang, March thla a NLUP tuaithar lehna hun hmannaah agriculture minister chuan, “Hlawhtlinna 100%-in hmu lo mah ila, mi harsa zawkte hnena tanpuina kan pe hi a lawmawm hrim hrim,” tiin a sawi a. He hunah vek hian chief minister pawhin, “NLUP hlawhtlinna tur hi za a za theih loh mahse 60% vel tal chu a hlawhtlin beiseiawm a ni,” a ti. 2013 MLA inthlan dawnah khan rorel lai party hian NLUP tawp hun a a thlakna tur an ngaihtuah thu kha an sawi lang zauh zauh a, chumi atan chuan sorkar tharah Exit Protocol an buaipui tur thu kha an sawi thin a, hneh taka an tlin takah khan mipuiin NLUP an la beisei a, chumi atan chuan sorkar lai party kha an la ring ngam zel tih a hriat awm e. Mahse, MP inthlanpuiah BJP leh a kaihhruai an chak tak si avangin ngaihtuahna thar sen a ngai leh ta a ni ber. Pu Modi-a sorkar kal dan han thlir hian sorkar laipui zem zen a NLUP chhunzawm zel chu a huphurhawm tih a chiang reng a, kum 5 dawn lai chhunga hlawhtlinna sawi tur a beitham deuh bawk si a. Mahse, NLUP a tawp a nih chuan ram hmasawnna tura hmalakna dang a awm si lo a, kan hruaitute sawi dan takin NLUP chauh hi development programme awm chhun a ni a, sorkar tan mai ni lo mipui nawlpui (a bikin kut hnathawktu chhungkaw) tan beisei tur dang vak a awm lo a ni ber. Engpawhnise, tun hnaia NLUP hotute hmalaknain he policy/programme hi tuaithar leh tum mek a ni a, UNO hnuaia Agency hrang hrang - FAO, UNDP, UNIDO leh ILO te nen October 16,2014 ah thawhhona thuthlung ziah a ni tawh a. Tun hnai lawk pawh khan Sir Ratan TATA Trust nen thawh dunna thuthlung ziah a ni a, tunah hian agency hrang hrangte pawh an dawr kual mek bawk. Heng pawl hrang hrangte lak atang hian mipui beisei ang hlawkna hmuh a ni ang em tih chu hunin a la hril zel ang chu. Mipui nawlpui chuan NLUP chungchang hi politician-te sawi dan hi kan hriat dan a ni mai a, ram hmasawnna tura sorkar hmalakna lian tak a nihna aiin politics hmanrua leh party hrang hrangte inhnialna thupui angah kan ngai deuh tlat a. A nihna takah chuan mipui nghawng tura hmalakna a nih avangin kan ngaihven a, ngun taka kan lo chhui zui hi a tul a ni. Chuvangin, NLUP chungchang hi ziah zawm zel kan tum ang.