Aizawl hi (han ti bik ila) kan changkang ta lutuk emaw ni... Khrismas leh Kumthar hman dante hi a sap riau niawmin ka hria. Hmanlai angin a nuam ta lo. Kan naupan lai... 1940 chho vel lai kha kei ve hi chuan nuam ka tih lai ber a ni.

November thla tawp lamah tlangval tlawmngaiin an lo hual lawk thing kan han phur a, Khrismas lah kha Biak in kha chu Kohhranin programme an siam mai a, Mission Veng khawtlang kha chuan Khrismas zaikhawmna leh ruai thehna turin mi mal in a ni thung a, nula leh tlangval zawng zawngin thing an han phur a, keini naupangho kha chu sawm leh hrilh pawh kan ngai lo, AN PHAL VE LO ANG TIH KAN HLAU EM EM MAI ZAWK!

Mak ve angreng ka tih chu... Nulain thing an tanin an ek ve ngai lo, tlangvalin an kit a, an tan a, an ek vek thin. Nulain phurh hawn chiah an tum a, tlangval chuan rit tham loin eh loh an pu ve chauh thung a ni.

Khrismas tui chawi te, PHE-te awm hek lo, Sakhisih, Darnam, Lungli, Venghnuai lungrem tuikhur, Kulikawnah Dam Tuikhur... LAWKS... Dam tuikhura inbuak ka phawk nia maw. Ngaih tha fetin silk pawnfen a hlim a, biahthudi pawh kimten a hril bawk a, phawk loh hawnin a haw zuk ni le! Kan tlangval ve deuh tawh hnu chuan veng tin tuichawiah hian kan tel zur zur mai mawle!

December thla a nih tawh avangin tuihna a tlem tawh em em mai si, nghah ngai lo tuikhur chu Mission Venga Darnam tuikhur chauh khu niin ka hria. Darnam?tih takah, chham ek hi a awm zul reng mai a, mi tam tak chuan thingpui atan pawh kan hmang duh lo. Sakhisih tui chu tui bera sawi a ni thin; mahse, a hna a tlem em em a, tlang tui chawi chuan zanlai thleng thlenga nghah a tul. MAHSE, tlangval, A! nula tan pawh a nuam ting mai a ni. Theihna neiho chuan a fal tetein mei lum an ai a, kang zankhua se tih hmel tak tak hi an awm nuk thin. Keini ang, tuma ngaihzawn ve loh khawpa RIANG tan erawh chuan a hrilhhai thlak deuh thin! Hetia ka chhut let pawh hian nula leh tlangval inngaizawng, meilum ai fak thin kha ka mitthlain a hmu kiau mai, thahnem tak erawh chu an boral tawh a, kei meilum ai falpui tur nei lo hi, ka dam rei ta erh a nih hi.

Tunlai nula leh tlangval hi chuan khang hun nawmzia kha an hre ve pha si lo a, Mission Veng nula zawng zawng ka rim chhuah vek laite kha a rei ve ta hle mai. Pu Muka fanu, Zokhumi (H.K.Bawihchhuaka nupui ni ta) leh Thangliani, Pastor Chhuahkhama fanute pahnih erawh kha chuan an awih tlat loh avangin ka rim nge rim lo tih pawh ka inhre lo. An nute pawhin an awih lo, “Eng nge i duh?” tiin min zawt zankhua zak mai!