Ka thu leh hla chhiartute hi Isua rinawm taka zuitu in nih ka ring a. Dik pawh a dik ang. Mahse, hetih mek lai hian kan nun hian Pathian a chawimawi meuh em tih erawh kan infiah a ngai ngei ang. Chanchin Tha Johan ziak 10:10-ah chuan Lal Isuan " Kei zawng nun an neih nân tam taka an neih nan lo kal ka ni,'' a ti a. Lal Isua chu riangvai saltangte chhuah turin a lo kal a. Nun an neih nân, nun tam tak, nun tlo, belh tlâk, fiah tlâk, entawn tlâk, mi dangte tana malsawmna keng nun tui dûl an neih theih nan a lo kal a ni tih a sawi a. He nun tam hi keini tan pawh pek tiam kan ni a. Mahse, keimahni hian kan zir loh avangin nun tla balin bul kan tan a, nun tla hawlh leh nun awmze nei lovin  kan hringnun lehkhabu hi kan zial thin a ni. 

Kan pianna a fuh tawk loh avangin Lal Isua min pek, 'belh chian dawl leh entawn tlak' kan nei thei lova. Kan nunin a zir loh avangin mualpho takin kan hun tam zawk kan hmang fo thin a. He Kristian ramah hian rinawm taka Lal Isua hnungzuitu inti sang tam tak, thil tha ti ngai lo an awm mek a. Thenawmte tana malsawmna ni lo hmel hmuh tur kan tam hle bawk.  Rawngbawlpuite tana malsawmna ni kan vâng hle bawk. Thawhpuite tana entawntlâk leh chhenfakawm an tam lo hle a nih hi. 

Tirhkoh Paula chuan 'Nun Krista, thih pawh hlawkna' tih hi a uar hle a. An rawngbawl hun laia Isua hnung zuitute chu kawng eng-kima entawn tlâk leh fak tlâk  an ni tur a ni a. An nunah Isua nun ze mawi an pu tur a ni. Chatuan nunna neitu an nih avangin thihna pawh lo thleng se, hlawkna hlir a ni dawn! 

Lal Isua nun chu entawn tur hlirin  a khat a, a nun nem a, a zaidam a, a rinawm a, thuhnuai-rawlh tak leh rilrua inngai-tlawm tak mî a ni a. Hmangaihnain a hat a ni. Riangvai chanhaite tan chawlhna a tling a ni. Nun tam tak a nei a, malsawmna keng nun a nei a. Dawhtheihna leh lainatnain a khat a. Amah anga nung turin a mite chu a duh a. Mahse, keini A mite hian kan thei mawlh si lo. Ram leh khawtlang hruaitu, chhungkaw nu leh pa te, kohhran hruaitute hi Pathian hrin, Pathian fate kan ni a. Pathian fa kan nihna tarlanna(sign) hi kan nunah hmuh tur a awm mawlh si lo! tiin kan inchhût mek a ni. 

Lal  Isuan kan nunah hmun a chang em? Lal Isuan kan chungah ro a rel tak zet em? Keima mimal nunah hian Lal Isuan thu a nei em? Mahni duh dan ang anga tal vel mai mai te hi 'Nun tam nei zia a ni thei ang em? tiin kan inzawt a ni. Nun belhchian  dawl, kohhran, ram hruaitu zingah nun entawntlak hmuh tur a tam si lo! Mahni tanghmâ chauh haiin em ni Nun tam neih kan tum le? Nun tam leh corruption hi a inhmeh em? Nun tam leh ruihhlo hi a inhmeh em? Nun tam leh itsikna leh duhamnate hi a inhmeh kan ti em? Kohhran anga rawng kan bawlna kawngah te, Ram hruainaah te, chhungkua inrelbawlna kawngah te, contractor nih anga contract hna thawhnaah te hian 'Nun tam' hi kan lan chhuahtir thin em? Lal Isua hun laia Pharisai te kha nun belh-chian dawl nei lo tute an ni ngei ang. Pawn lam mawina, fel faina leh thianghlimna dah pawi-mawhtute an ni awm e. Lal Isuan Pharisai te mizia a tarlang zauh zauh a. Pharisaite anga nun hi thil duhawm lo ber zinga mi a ni ngei bawk ang. Anni hian nun belh chian dawl an nei lo a ni ang e. Anni anga awm lo turin a zirtirte pawh kha Isuan a chah hial a ni. 

Kan tunlai khawvelah hian mihring nun hi a inphiar tuai mai! Mi ho tak tak, lehkha zir sang fû 'takna' reng nei lo! Hruai-tu ngel nghet cherh chawrh, belh- chian dawl hmuh tur an va tam em? Kohhran leh ram thil han chawk let tak tak tur mi rintlak, innghahna tlak kan mamawh a nih hi. Ngaihsan tur dik ngai sang, ngainat tur dikna ngai nâ, belhchian dawl pai mihring kan mamawh a, nun tam, nun tlo, nun ngel nghet kan mamawh zel dawn. Chu nun chuan kohhran a ti nghet ang, chhungkua a thui khawm ang, khawtlang a vawng nung ang a, ramin a that pui dawn a ni.