Thufing chuan, “Pa hlawhtling zawng zawng hi chhungkaw pa tha an ni vek lo va, chhungkaw pa tha erawh pa hlawhtling an ni (Not every successful man is a good father. But, every good father is a successful man),” a ti a, a dik ngawt mai. In leh lo din kawngah te, ei zawnnaah leh sum leh pai deh chhuah kawngahte hian rual pawl pha lo mah ila, kan chenna in chu mau rap in mai mah nise, kan banpuamte hian pa vangtlang banpuam pawh tiat mah suh se, nupui fanaute thlamuantu, an thlakhleh leh an innghahna ber kan nih chhung chu pa ber tan hian dam man a awm hliah hliah a, hei ngawt pawh hi puan ven sawi chhinga beiseina thar nen thatho taka hringnun chona hmachhawnpui tham a ni.

Kohhran leh khawtlanga inhmang tak, a kaptu ang hrima khawtlang thiltihnaah chuan hman loh nei lo, hnatlan nikhuaa hmahruai zat zat, inpe zo tak, chhungte tan erawh hun nei thei mang lo, nupuiten chhungkaw thil pawimawh an sawipui dawn pawha ngaithla hman mang lo khawpa mi buai, chhungkaw inrelbawlna chu nupuite kuta dah hlawm tawp mai, fate zir chin leh thlen chin pawh ngaihtuah mang lo, ina awm ve chhun pawha thingpui no dawm paha chanchinbu bih ngur ngur mai, titipui dawna remote control chuh thurh a, TV ensan leh daih ang chi kan nih chuan, khawtlang tan inpein miten min fak viau mah se, chhungkaw pa tha tak (good father) erawh kan ni thei ngai lo ang.

Pawn lamah chuan pa kawm nuam tak, pa thil phal, nui huah huah mai, thiante tana ui nei lo, ‘Nangin han show la’ an tih tawh chuan, ‘Nia maw le’ ti thei zel mai, in lamah erawh nupui fanauten an thlakhleh miah loh, chu ahneha a lo hawn hun an huphurh ruk em em, phunchiar bawk si, sawisel tur hre bawk si, kawngka a pen luh ruala chhungkaw hlimna reh nghal duak mai, savawm hliam ang maia nel awm loh leh biak huphurh awm kan nih si chuan pa hlawhtling (successful husband) kan ni ngai lo ang.

Pa pakhat chu sawrkar hna sang tak thawk a ni a, an office-ah chuan hotu ber (head of office) a ni a, a staff-te pawhin an fak thin khawp mai. A hnuaia thawkte chu a te ber, peon thlengin an harsatna a ngaihthlaksak peih a, an harsatna sut kian dan kawng a zawnpui hram hram thin. Chu pa vek chu in lamah erawh a nupui fanaute chuan an nel lo khawp mai. A tawng tlem em em a, a nupui fanaute nen titi phungleng an sawi ngai lo a, a fate nen chuan an inkar a hla tial tial mai. Chutiang pa chu pasal tha (good husband) a ni thei ngai dawn em ni?

Pa pakhat chu mi biangbiak thiam tak a ni a, mi tihlawm a thiam em em a, tawngkam a thiam a, a tul hunah a inphah hniam peih bawk a. Chu pa chu politics-ah a inhmang ta a, a chemkalna a ni chek a ni ang chu, reilo teah unit hruaitu atangin block hruaituah a invawrh chho ta mai a, MLA candidate hial a beisei ngam ta. Party-a lungawi lote thlemtu ber a ni a, party tan a thawk hlawk bawk a, hruaitu lawkte hmelhriat pawh a hlawh a, an lakah a tlatlum viau mai bawk. Chutiang a nih avang chuan contract leh supply hna lian a hmu thei ta em em a, sum buaiin a buai a, inah a awm hman ngang lo a ni. A sum lak luh a san ang zelin an chhungkaw khawsak pawh a sang chho ve ta zel a, kar loah a fapate chuan drugs an addict a, an fanu a lerh em em bawk. Chu pa, mahni tanghma hai kawnga fing tak mai chu chhungkaw pa hlawhtling (successful husband) a ni chiah em le?

Pa thenkhat erawh pawn lama an lan dan ang lo taka chhungkaw tana pa nelawm leh pa tha an ni ve leh tlat bawk. Ram buai hma khan Happy Valley, Shillong-a Assam Regiment hmunpuia Quarter Master Office-a an hotupa chu a thinchhiain a sual em em mai a, a hnuaia thawkte chu office khawk rum ruma hauh loh leh vin loh a nei lo an ti thin. Mahse, chu army officer chu in lamah erawh a zia a dang daih a, a nupui fanaute bulah chuan a nelawmin hlim hmel a pu reng tlat a ni. Office atanga thinrim teuha a hawn tum pawh hian a thinrimna chu a nghak dai tete a, an kawta pangpar leh thing hnahte chu a zut zut a, a thin dam thlap hnuah in chhungah a lut chuah thin an ti. An chhungkua hrechiangtu chuan, “An nupa an hlimin an chhungkua an hlim em em a ni,” an ti tlat. 

Hman deuh khan ka cousin pakhat chuan sumo a khalh thin a, kawla nichhuak chhiarin nitla vanvuaiin a long run ziah thin. Passenger-te a thlah vek hnuah khaw thim rualin a hawng ve thei chauh thin. In a thlen chuan kawngka a pen luh rualin a faten an lo bawr a, ani chuan hlim em emin a pawm a, a tlan kualpui a, a chang leh a lâmpui lawp lawp bawk. Keini ila, “Ka chau em mai, min lo bawh teh suh u,” ka ti duh mai ang. 

Mite tana pa tha, pa nelawm nih hi a tha e, chu aia tha leh pawimawh zawk chu kan chenpuite tana pa tha leh pa nelawm nih tum hi a ni.