A dam loh laia kan remchang lo tak chu a dam hnuah kan intawng fuh ta hlauh a. A dam tha zel em tihte ka zawt a. Kan titi zui dun ta a.

Covid 19 hri a kai ve avanga ZMC a va awm, dam taka lo chhuak a ni. Vaccine la lo lui ngat a ni. “ZMC doctor ho an fel si a, vaccine lak loh kha sawi a ngai fo si a, ka inthlahrung lutuk a, min hau miah lo naa an zahawm duh khawp mai a,” a ti a. Vaccine a lak loh chhan ka zawt a. “Tun hma atangin, ‘Ui ven nih pawh ka duh lo, Pathian ven nih ka duh tawk,’ ti thin ka nia,” a ti a. In vengtu atan pawha ui vulh duh lo lui ngat, Pathian vennaa innghat a ni.

Kei chuan, “Chu, i chhuah vah pawhin in in chu tala pawhin i kalh lo zel ang maw?” ka’n ti kher a (Ka sual ve kher kher mang e aw!). Ka nui lui deuh hlek, a huat ka hlau deuh si a. “Kalh tho e,” a ti a, a nui ve deuh a.

Kan titi zui zel a, “Vaccine chu ka la tawh dawn, a inthlahrunawm duh em mai, doctor ho an fel si,” a ti ta a. Thla thum hnua a lak theih tur thu hrilhin kan inthen zui ta a.

Pathian ring em em maite hi an fakawm a, ka awt thin. Pathian rin dan tur chinah hian ka ngam huai lo em em mai si a. ‘Tlang sawn theihna khawp hial’ rinna neihte hi chu huphurh tak ka ni. 

Pathian hian awm lo ata awmah min din a. Vawi khat pian manah vawi khat kan la thi dawn tih ka chiang. Pian leh thih inkarah hian min dintu chuan min enkawl a, min veng a, a kuta awm kan ni tih ka pawm thlap. Min ven nan leh min enkawl nan hian mawhphurhna min pe tel tih hi ka rin thiam dan tawk a ni.

Hmanah pa pakhat chanchin an sawi ka hria. A  piangthar a, Pathian a ring ta em em mai a ni awm e. “Amah chu ring la, Aman a ti vek ang,” tih kha changchawiin a zanriah tur a chhum duh ta lo a. Chhumsak turin Pathian a ring ta pek a, zanriah chhum hunah chuan ring chungin a awm ta mai mai a ni awm e. Mahse, a beisei chu a thleng ta si lo ni ngei tur a ni, zan laiah a riltam chu a vial a vial ta mai a ni awm e!

Pathian hnathawh dan hi hriatthiam a har hle naa, a hnathawh pui tur hian kan kuta dah chin hi a nei ta tlat zel tih hi ka hriatthiam chin a ni. Lazara a kaih thawh dawn pawh khan lung lum sawn turin mi dang a ruai ve tho tlat. Amah pawhin tawngka ringawt pawha a lum sawn theih dawn tehlul nen khan!

Kan taksa hriselna min vensaka min enkawl tur hian chaw kan chhum a, keimah ngeiin ka bar a ngai tlatin ka hria. Min rawn barh dawn lo a nih hmel. Ei tur kan neih theih nana thawk thei turin nunna min pe a. Kan hnathawh mal a sawm a. Kan ei leh in pawh malsawm theitu chu amah tho. Mahse, chaw chu ka bar ve a ngai tlat tih hi ka pawm dan a ni. Chaw ei loa min tipuar tur khawp hian ka la ring ngam lo nge ni? Pathianin mal a sawm theih tura țan lo lak ve hi kan tih tur a niin ka hria, kei rinnaa chak lo hi chuan.

Ring inti em em, biak inah pawh hmai tuamna pawthla ngam ngat, zai vak vak chak tawh thu sawia phun phun mai, “Pathianin min veng dawn alawm maw le,” ti ho pawh hian chaw chu an ei ve thoin ka hria. Chaw ei loa Pathianin a tihpuar tur khawp chuan an ring ngam leh bik si lo nge ni? Rin kim a har a niang, a venna ring inti pawhin kawngka chu a kalh ve zel tho kha a!

Kei chu, Pathian malsawm tura kan tih theih chin lo tih ve a, amah ring chunga inven zel a, nun uluk zel mai hi ka rinnain a phak tawk dan chu a ni. Ringtute zui tur chhinchhiahna, “Rulte kutin an la ang a, thihna tûr eng pawh in mah sela engmah an ti lo vang a, damlote chungah an kut an nghat ang a, an dam zel ang,” tih inziakte hi awm mah se, thihna tur zuk in luih kher ai chuan, in loh ka la thlang zawk a nih chu, kei rinna chak lo hi chuan. Zu in lui tlat, tawngtai ve tho, zu thihpui ta tho si an tam em mai.

Engkim hi Pathian kutah ka dah vek lo mai! Kan tih theih chin hi lo ti ve zel ila, chu mi bak zawng chu Pathian kuta dah ila, a rorel zui danah lungawi mai ila, a hahdam thlak ta berin ka hria. Mihringte tana tihngaihna awm tawh loh hnua Pathian hnathawh ropui tak lang thin hi ka hmu hnem viau bawk. Lung lum sawn chin hi kan kut ni se, mitthi kaithawh kha a kut ni zel mai se ka ti e.