Mihring hi kan kum a tam chhoh zel hian taksa chet kawngahte leh fitness lam hrim hrimah kan tlahniam ve tial tial a ni tih hi chu hriat saah ngai ta ila. Chutichung chuan kum upa lam tawh, active sports-a inhmang theite pawh hmuh tur an awm fo mai. Olympic-ah te leh Cycling lamah te pawh chutianga kum tam tawh hnu pawha an discipline-a champion te pawh hmuh tur an awm fo mai. Tennis kanenchuan Roger Federer pawh kum 37-ah Wimbledon final a la khel tih ka hria a, football-ah phei chuan Japanese player Kazuyoshi Miura hi kum 50 tling tawh chungin professional club-ah a la khel mek bawk.

Kan taksa hi physical activity sang tak nei tur chuan kan boruak (oygen) hip luh hi a tam thei ang ber kan lung (heart)-in sem darhin kan tihrawlin a lo hman tangkai a ngai a. VO2max hi chu mi tehna atan chuan an hmang a, kant aksa rih zawng mila kan taksain oxygen a hman tangkai theih zat tehna a ni ber. Kum a lo tam hian kan taksain Oxygen a hip luh a hman tangkai theih dan a lo tlahniam tial tial a, kan lungphu (heart rate) a lo tlahniam zel a, chu chuan taksa chak rei tur (endurance) kha a titlo lo ta tial tial thin a ni. Kum a lo tam hian kan thisenzam a lo chhah ve tial tial a, chu chuan thisen kal (circulation) a tichak lo va, kan chau hma a, physical activity kan tihluih khan kan lung chak tawh lo khan a tuar a, heart attack emaw, cardiac arrest (lungphu chawl thut) te a thlen hma ta bik a, thluak lamah thisenzam chat emaw, oxygen kham loh vanga stroke te a thlen awl ta bik a ni.

Hetiang hi kantaksa awm dan a ni a, chuvang tak chuan professional sports lamah pawh kum 40 an pelh meuh hi chuan a tam zawk chu an chuai lam a ni thuai thin reng a ni. Thluak, lung leh chuap lam chak lo chu thuhran nise, kan ruhchuktuah (joints) hi pawh a lo khawng tial tial a, intihpalh (injury) a awm zual bik thin a ni. Sports hrang hrangah hian a bikin basketball, football, badminton leh boxing te hi fitness a mamawh sang zual hle mai a, taksa sawizawi that pawh a pawimawh hle. Inhliam leh intihpalh pawh a tamna pawl tak a ni awm e. Professional player sang tak tak chinte hi chu hetiang avang hian a nei leh in te, ni tin routine te hi an uluk em em mai a. Cristiano Ronaldo phei chu a hranpain dietician leh physical trainer a ruai a, chutiang avang tak chuan kum 30 a pelh hnuah pawh fitness lama sang ber pawl a la nih theih phah reng a ni.

Heng thil kan han sawi tak duah chhan chu kum tam lam tawhah fitness ngai pawimawh thar kan awm nual a. Sports leh exercise kan intihhmuh a, a lawmawm hle mai a. Chutih rualin kum a lo tam tawh vanga naupang zawkte kan phak lohna hi kan hriatthiama kan fimkhur a pawimawh hle a ni. Kum 40 pelh tawh hnua strenuous exercise te, physical activity mamawh sang sports (badminton) te hi fimkhur taka kan inhman thiam a pawimawh hle mai. Kum naupang zawkte bula inkhelh emaw, infiam phei chuan taksa a lo lum tawh hnuah an theih chen thei ve turah inngaih a awl khawp mai a. Taksain a lo tlin tawh si loh avangin kawng tina palh an awm fo mai a, chu mai ni lovin heart lam problem neih phahte pawh an awm zauh zauh bawk. Cardiac arrest nei ta mai te, heart attack nei thutte leh stroke vanga nunna chânte an awm ta fo mai hi kan inenfiah nan hman a tha hle.

Kan taksain a tlin chin hriatthiam hi a pawimawh khawp mai a. Chutiang avang chuan taksa sawizawi kan duh pawhin hetiang lam mi thiam, qualified trainer te rawn hmasak theih nise a duhawm hle. Tin, medical check-up te pawh regular taka neih thin a tha a, lung lam chak lo kan neih phei chuan taksa hah lutuk laka invente pawh a him ber. Kawngngil thaa hah lutuk lova regular taka walk hi a him ber pawl chu a ni a. Ei leh in lam uluk tel pawh a tha hle. I fimkhur teh ang u.