Zawhna: Ka pu, pavalai kum 50 lai ka ni tawh a. Ka pile that loh vangin ka buai thin hle mai. Kuhva hi ka ei na khawp mai a, ni khatah Rs 500 man chu ei reng ang ka ni. Zu in pawh ka ching. Ka pile hi a na deuh fo mai a, ka ngaih a tha lo thin khawp mai; zunthlum ka nei bawk. Engtinnge ka in enkawl dan tur, min pui hram teh. Huna, Lily Veng

Chhanna: I nunphung leh chinthan (habit leh lifestyle) chu a tha lem lo hle mai. Zunthlum i neih avang hian zu in leh kuhva heh hian i zunthlum harsatna hi a ti zual ngei dawn a. Chu mai ni lovin i thin (liver) lam pawh a khawih buai ngeiin a rinawm. I rih lam pawh a san a rinawm a, thau lam i nih ngei ka ring a. Chuvangin nunphung thlak danglam i mamawh hle ang. Engpawhnise pile harsatna i rawn sawi hi han sawifiah hmasa dawn ta ila.

Pile kan tih mai hi kan mawngkaw lai bawr chawmtu thisen zam (veins bik) vung vanga lo awm a ni a. Varicose veins tia kan hriat lar, ke vela thisen zam (veins) rawn puar ang tho hi a ni. Medical term ah chuan Hemorrhoid tiin kan sawi thin bawk. A lo awm chhan hi ek laia san vak vak thin vang te, ek khal rei lutuk ah te, thau lutuk ah te, naupai laia ek buai vang te in a lo awm thin a. Thin tha lo nei, a bikin zu in nasat vang thin tha lo nei te hian an nei duh viau bawk.

Pile tha lo hian ek thi te, mawngkaw thak/mawngmirh te a thlen thei a, chutiang chu an insawiselna tam ber ani a. A tam zawkah chuan a na lem lo fo. Tin, bawk anga mawngkua atanga rawn tawlh chhuak te pawh a awm thei. Grade pali (4) in an then thin a. Bawk rawn dawk chhuak a awm chinah hian grade II a ni tawh a. Amahin a let thei emaw, nawr luh a ngai thei a, a then chu a lut hlei thei tawh lo thin bawk (Grade IV).

A enkawl kawngah chuan a la nasa lo anih chuan tui in tam leh ek siam tha thei fiber tam chi ei leh in a tih tam a pawimawh a. A thenah chuan ek nemna damdawi te pawhin a ti ziaawm thei bawk. Damdawi hnawih chi hman a tul thei a, tin, tuilum chi al ah mawng chiah te pawh a tangkai hle. A nasa chin ah chuan zai a ngai thin a, mahse hmanrua te a that tawh avang hian zai hi an ngeih phian. Pile nei chu Surgeon Doctor te inentir ngei a pawimawh.

Pile ni si lo, pile anga kan sawipawlh fo chu ek zawnga mawngthip leh thi rawn chhuak hi ani a, chu chu Anal Fissure kan ti a. Mawngkaw bang pilh emaw thler/pem vanga awm ani thung. Heng pawh hi a chunga kan sawi enkawlna hmang tho hian enkawl a ngai a, zai erawh an chawh meuh lo thung. Kan sawi tak angin i kuhva ei nasa lutuk hi tih tlem emaw sim a ngai dawn a, zu in pawh i ti lo thei lo anih pawhin in tlem a pawimawh hle ang. Thau lam i lo nih bawk chuan intih cher a sawt hle a. Taksa sawizawi leh ei leh in uluk a, mawm, thau leh thak lam chi insum a pawimawh viau bawk ang. I zunthlum neih hi fimkhur hle la, control thuai a, regular taka damdawi ei a, a khat mawi tawka in check fo a pawimawh hle bawk.