Policy tha neih hi hmasawnna ni ta se la chuan Mizote hi khitah kan awm tawh ang. Sorkar kan neih tawhte hian tlangram lo neih bansanna tur te, rethei khai chhuahna tur te, buh-bala intodelhna tur leh ram hmasawnna tur policy te hi tha tak tak an siam tawh thin a. Sum pawh cheng tluklehdingawn fe an hmang ral tawh. Mahse, tun dinhmun hi kan thlen chin chu a la ni rih a, lo neitu leh kut hnathawka eizawngte dinhmun a ngai reng a, tlangram lo neih bansan ta ten eizawnna ngelnghet an neih phah lo a, hmasawnna ruhrel tha kan neih loh avangin harsatna kan la tawk reng a, buh-balah kan la intodelh hek lo. Policy tha hi hnam damna a ni lo a, hmasawnna thlentu a ni ringawt lo a, policy tihhlawhtlin tum tak tak sorkar neih hi a pawimawh ber zawk.

Kum 1972-a UT kan nih atang khan Mizoram sorkar (Govt. of Mizoram) a lo piang ve nghal a, a hma kha chuan Assam sorkar hnuaia awm kan ni a, Assam budget ring ve mai kan ni a, thiltih tak tak a har a. UT hnuaiah chuan budget hran te kan lo nei ve ta a, sum pawh a lo tam a, hmasawnna tur ruahmanna mumal zawka siam te a lo theih ta a ni. UT hnuaia inthlan hmasa berah PC party an vung hle a, sorkar an siam ta a, chief minister Pu Thena  kha development tuipui tak mai a ni a, a ngaihtuahna pawh a zau hlein a lang.

Indopui II-na zawh hnua economist-ho sawi lar em em, retheihna tikiang tur chuan mihring mamawh bulpui hrang hrang (Basic needs) ngaihtuah a ngai, tih kha PC sorkar khan a tuipui hle a. International Labour Organisation-in kum 1976 a mumal taka ‘the Basic Needs Approach’ a puan zar takte khan a hmin hle tih a lang a, UT hun lai atanga vawiin thleng hian MPC party hian ‘Six Basic Needs’ an la sawi bâng thei lo. Tlangram lo neih tihbanna tur policy tha tak, ‘Garden Colony Scheme’ tih chu kum 1977-78 atangin an kalpui a. Mahse, sorkar a inthlak chho a, he scheme pawh hi hlawhchhamin a zuzi zui ta a.

State kan nih hnu a Pu Laldenga hruai MNF sorkar khan ‘Jhum Control project’ an buaipui leh a, kum 1987-88 annual plan-ah an dah a. A hming ang chiah hian tlangram lo neih tihtawpna tura duan a ni a, Rural development department hnuaia kalpui a ni a. A tak takah chuan PC sorkara garden colony scheme nen khan a inzul deuh reng a. A bul tanna atan Aibawk Community Development Block Aibawk thlan a ni a. Mahse, sorkar a lo inthlak chho leh bawk a, hei pawh hi a zuzi leh a.

Pu Hawla hruai congress party-in sorkar an siam leh tak hnu kum 1990 atangin tlangram lo neih bansanna tur leh retheite khaichhuahna tur policy thar NLUP an kalpui leh a. Rural development department hnuaia kalpui a ni leh a, sum tam tak a luang ral a. Mahse, hei pawh hi mualpho takin a zuzi zui leh ta a. Chumi hnuah kum 1998-2008 chhunga MNF sorkar, Pu Zoramthanga kaihhruai khan Mizoram Intodelh Project (MIP) an kalpui leh a. Hei pawh hi hlawhchham bawkin a zo der a. Pu Hawla hruai congress party-in sorkarna an siam leh a, 2011 atangin NLUP an kalpui a, a kalphung tur tha takin an duang a, sum pawh an hmang tam. Mahse, a hlawhtlinna sawi tur awm mang loin a tawp leh ta a ni.

Nikum (2018) kum tawp atangin Pu Zorama hruai sorkar a lo piang leh a, a hma atanga an vauchher ber SEDP kalpui tumin an inbuatsaih chho leh mek a, eng tak ang ang maw. Heng sorkarin policy a lo kalpui tawhte hi an kalphung inang lo mah se, an tum ber chu tlangram lo neih bânsanna tur te, thingtlang mite eizawnna tha tak siam sak te, buh leh bala intodelh te, eizawnna ngelnghet siam a kut hnathawkte dinhmun chawi san te, lo neih tihhmasawn a hmun danga hralh chhuah tham thar chhuah te, ramngaw humhalh te a hi a ni.

SEDP hi engtianga kalpui nge an tum a la hriat tak tak lo a. Sorkar laipui leh hmun dang atanga project siam a kalpui an tum hle tih erawh an sawi thin. An kalpui dan azirin minister chak leh chak lo kar a hla viau maithei. Engpawnise, SEDP hmanga hmalak tak tak hi an tum a nih chuan a kalphung tur mumal taka siam a hun viau tawh. Budget-a SEDP sum dah pawh kha, a enkawltu tur ber department (Finance, planning dept., etc.) hi a la chiang lo a, a viltu tur leh thuneitu tur ber committee din a la ni chiah lo a, a la hman theih loh niin an sawi. SEDP hmanga thawh tur ruahman pawh a la chawl thuap niin an sawi.

Chief minister-in a tuipui em em Mau/Rua chungchang pawh hi hmalak dan tur mumal taka siam a ngai ngei ang. Hetia CM thusawi ang chin hi kalphung tur a nih chuan a la buai thei dawnin a lang a; chuvangin, sum tam tak senna tur a ni a, mi tam tak nghawng tur thil lian tham a ni bawk a, ruahmanna mumal tak siam a fuh ang. Tuna kan hriat chinah chuan kum thar lamah chin pun tur a ni anga, kum 3/4-ah a puitling dawn a, tih vel a ni a. Kan ram mau/raw chi hrang hrangte hi a hmantlak ve tho em? Mau/rua chu kan chin tur chu a puitlin hnuah chuan engtia tih tur nge? A sawngbawlna (Processing) lama hmalak a ngai nghal em? A puma hmun danga thawn chhuah tur nge kan ramah Mau hmanga thilsiamna din a ni dawn? Khawchhak lama mau hmanga thilsiamtu lian tak takte hi kan ramah an rawn inbun dawn nge? Mau hmun zau tak kan nei anga, hmanna tur awm si lo hian a puitling thuau anga (Tunhmaa Tung chingtute ang khan) a neitute hi mangangin an phun luai luai mai ang tih te a hlauhawm.

Hetianga sorkarin beihpui a thlak dawn hi chuan mipui hi zirtir a, hrilhfiah a ngai a, a nghawng tur (a chingtu turte) phei chuan hmalak tum dan leh thil dangte chipchiar taka an hriat a ngai. Sorkar pawhin mau chi chungchang te, a supplier hming te, supplier thlan dan te, sum sen so zat te, etc., mipui hriatah puang zar se. Chubakah mau/raw hmun neituten an hlawkpui ngei tur leh kan economy chawi kang thei tur policy tha tak neih a ngai a. Chu policy chu tihhlawhtlin ngei erawh a ngai.

Mau atchilh chief minister kan nei hi kan vanneihpui thei a, a mangphan ram min hruai thleng thei a nih chuan kan economy a kang awk ang a, mipui kan lawm viau ang. Kan ram hmula thing tam ber mau/rua hi beihpui thlakna tlak chu a ni hrim hrim a, hetia kan buaipui chiam hi a awm khawp mai. Mahse, tunhma lama sorkar beihpui thlak tawhna te ngaihtuahin mau chungchang pawh hi sep rawtui chiam a, nuihpui hluah hluahah hian kan zo mai ang tih erawh a hlauhawm.