Tun hnaia Central YMA Central Co-ordination Committee (CCC) meeting chuan October 24-26, 2023 a Biate-a Central YMA Inkhawmpui lian neih tura thu rel tur (agenda) ngaihtuahin a thlifim a, agenda chhawpchhuah tur zinga pakhat chu, ‘Quality Education a awm theih nan sawrkar-in tun aia chakin hma la rawh se’ tih a ni. He thu hi Central YMA inkhawmpui lianah ngaihtuah ho tur a ni a. Central YMA hian kan rama zirna quality hi a duhkhawp lo a, siam that tulin a hria a ni ngei ang. Kan ram zirna tihmasawn (improve) tur hian eng atangin nge bul kan tan ang? Engtin nge hma kan lak ang? 

Sap tawng hi kan ngaisangin kan uar hle mai a, kan ngaihsan leh kan uar ang ai erawhin kan thiam lutuk lo a ni mai thei. Sap tawng thiam hi lehkhathiamah kan ngai ni hmiang, sap tawng inthiam tir tumin school zawng zawng, sawrkar school nen lam English medium school-ah kan let deuh vek tawh a, thingtlang khaw kilkhawr berah pawh English medium school kan din ta zel mai. Tunah chuan naupang te hian school an luh tirh phat atangin sap tawngin lehkha an zir tan a, sap tawng an thiam phah em, an zirnaah hma an sawn phah sawt em  tih erawh ngaihtuah tham tak a ni. 

Pawl khat atangin sap tawngin lehkha kan zir tan a, kum 10 kan zir chuan sap tawng na na na chu thiam pangngai tawh tura ngaih kan ni. Thiam nal tak kan nih em loh pawhin kum 10 chhung chuan sap tawnga thusawi thei, sap tawnga tawng thei, sap tawnga biak theih leh sap tawnga dik taka ziak thiam kan ni tawh tur a ni. Eng tawng pawh, Chinese tawng a ni emaw, Korean tawng pawh ni raw sek sek, kum 10 kan zir hnu pawha kan la thiam fumfe lo a nih chuan kan zir dan system te, zirtirtute thiamna (quality) nen lam ennawn a ngai hle ang. Nge ni a, sap tawng hi chu a dangdai a, a changkang a, a zahawm a, tawng dang aiin thiam a har bik hrim hrim kan ti zawk dawn? Thiam harsa deuh pawh nise kum 10 zir hnu pawha kan thiam dan level en hian a lungawi thlak chiah lo a ni. Sap tawng a ni emaw, vai tawng a ni emaw, Spanish tawng pawh nise, kum 10 zir hnu pawha kan la thiam tha mang lo a nih chuan tlawm thlak tak a ni ang.

Rev. Vanlalbela hi Ranchi-ah Pathian thu zir tura a kal dawn khan mizo tawng bak tawng dang thiam a nei lo a, pawl thum thleng bak lehkha a zir hek lo. Ranchi-a Pathian thu a zirna tur Theological College-ah chuan Hindi-a zir tur a ni a, ani lahin Hindi chu kawi khat pawh a thiam si lo. An Principal chuan, ‘Kum thum Hindi zir phawt se, chumi hnuah Pathian thu chu a zir ve thei mahna” a ti chauh mai si. Amaherawhchu, patlingin tih tak arpa tuihalin a han bei ta a, lu tuak vek khawpa a beih hnu chuan thla thum chhung lekin Hindi chu a thiam nal ta hle mai a, thla thum hnuah College chu a zawm thei ta mai a ni. College a kal chhung zawngin ti tha ber a ni chho ta zel a ni. Hindi a mik a mak hre lo pawhin thla thum chhunga a thiam nal theih chuan eng vangin nge sap tawng hi kum 10 kan zir hnu pawha kan thiam theih mang loh le? 

College zirlai zingah pawh hian sap tawng ti hlei thei lo, mahni irawm chhuaka tlar khat lek pawh sap tawng dika ziak hlei thei lo hi an awm nawk mai. Affirmative sentence hi negative emaw interrogative sentence-a leh dawn a ‘did’ hman ngei ngei tur emaw ti tlat, ‘did’ leh ‘was’ hmanna pawh thliar hrang thiam lo an tam khawp mai. Entir nan, ‘When did your mother was born?’ tih te, ‘When did the Constitution of India adopted?’ tih te te hi dik hmel deuh, dik si lo a ni a, hetiang hi zirlai tam tak tih dik loh thin dan a ni. Thenkhat chuan a dik loh dan pawh an man thiam chuang lo. Sap tawng kalphung pangngai (structure and composition) te, Parts of Speech nih phung hrang hrang te, English Grammar tlanglawn- Tense, Voice, Narration etc. te hi High School level-ah hian thiam pangngai tawh tura ngaih kan ni a. Mahse, hetiang hre miah lo leh thiam miah lo hian matric kan pass a, mahni irawm chhuaka sap tawng tlar khat pawh ziak dik thei lo chung hian College pawh kan zo ve thin tho mai.

Chutianga matric pass ve hram hram, engmaw ti tia College inbang liam ve nawk nawk, ‘Verb to be’ leh ‘Verb to-have’ awmzia pawh hre lo, English Grammar a mik a mak hre chuang lo te pawh chu thingtlang khuaa English medium school-ah an han thawk ve leh lawp lawp a, note pek a, by-heart tir tawp bak zirtir ngaihna vak an hre lo.  ‘Mitdelin mitdel vek a hruai chuan’ tih ang deuh kha an ni mai a, nu leh pa leh naupang te an hmaizawhawm thin mang e. Chutiang zirtirtu chuan kum 10 pawh zirtir se a naupang te’n sap tawng an thiam phah chuang lo ang. Zirtirtu an that loh chuan a hminga English medium school-a inkal tir ve thawr hi sap tawng thiamna pawh a ni chuang lo. Chuvangin, school tinah hian sap tawng zirtirtu tur bik chu sap tawng thiam pangngai tak, English Grammar pawh thiam tak, zirtirnaa tui tak ni thei se naupang chuan hma an sawn ngei ngei ang. 

Tin, kan ram zirnaa thil vei awm tak pakhat chu private school tam zawkin exam tin zawn ngawr ngawra zirna an kalpui lutuk hi a ni a. Private school tam zawk hian board exam-naa tih that chu an thupui ber a ni a, board exam naa an tih that chuan zirlai an ngah ang a, an hlawk telh telh dawn tih an chiang a. Chuvangin board exam naa titha turin kum hmasa lama board exam question te chu zirtirtu te’n uluk takin an zir chiang a, exam-naa pawimawh tur atan chuan note tha tak an siam a, zirlai te an by-heart tir tluk tluk a, exam-naah chuan tha takin, ropui takin division sang takah an pass mai reng a, an zirlai erawh a bulthumah an man phah chuang lo. School naupang ka hmuh remchan te hi an zirlaibu (textbook) keu sak ka ching a, kum tawp tlengin an zirlaibu phek chhung lam hi a var thar sur thin. Hei hian zirtirtute note siamah an innghat nasa a, an text book chu an keu khatin an chul nel lo hle tih a tilangin ka hria. An zirlaibua inziak tal hi chu a tlangpui tal hre vek thei se tha tur. Exam-naa chhuak tur chuah zir lawr den den a, division sang taka pass leh ringawt hi Vairengte leh Vathuampui inkara inelna’n bak a tangkai meuh lo. 

Kan zirna siamtha tur hian sap tawng kan inzirtir dan te, board exam kalphung te, question set dan kal phung (knowledge test question ringawt lo deuh) te, kan inzirtir dan kalphung hrim hrim te hi siam rem a, ennawn a tha khawp mai. Board exam question pawh hi text book-a chapter tin atangin eng emaw zah set lawk vek ila,  chu chu computer-in random-in thlang (select) tawp thin se, nikuma chhuak pawh kuminah a chhuah leh chang a awm ang a, question hlui atangin kumina chhuak tur rin lawk (predict) theih a ni lo ang a, zirlai te’n an textbook chu a tlangpui tal an cover a ngai tawh ang a, exam-naah an division a tha ta vak lo a nih pawhin thiamna tak erawh an paw chhuak thei zawk ang.