Tun hnai khan ruling MLA 12-te chuan Assembly Speaker hnenah oppostition MLA pakhat chu bântir (disqualify) turin ngenna an thehlut a, he thil hian Mizoram politics a chiah hneh viau mai. Titil engvak pawh a tam phah hle mai.

Tun hma atang tawhin kan ram hruaitu/politician-te hian thu inchuh an lo nei fo tawh thin a. An inpuhmawhna tam zawk hi ram hnuk khawih thil a ni lem lo. Tunah pawh hian ruling MLA-te duh dan ang hian MLA pakhat hi lo bân (disqualified) ta tehreng pawh nise, chu chuan eng rah tha nge a chhuah chuan ang le? Ei leh barah kan intodelhphah chuang lo ang a, kawlphetha (power) kan thar chhuah pawh megawatt khat pawhin a pun phah hek lo ang. By-election neih a tul phei chuan inthlan sensoah sum tam tak a kal ral leh ang a, sawrkar tan pawh hlawkna aiin hlohna hlira ni mai.

Sawi leh sawi hnu, kan politician-te inbeihna tam zawk hi chu ram hnuk khawih thil ni lem lo a ni fo a, hei hi hmasawnna kawnga kan thanmawh bawk lian tak pawh a ni. Inthlan dawn apianga ‘Lalthutthleng a kian/A kian lo’ tih sawi thar leh fo mai te, ‘MNF-in zalenna an sual/An sual lo’ tia inhnialna thar thawh leh fo maite hi ram tan hnemhnanna pakhat mah a awm lo. ‘Pu Lalthanhawla’n lalthutthleng a kian’ emaw, ‘A kian lo’ tiin nasa takin sawi sawi mah ila, chu chuan kan buh thar chhuah hi fang khat pawhin a tihpun phah lo ang.

Chuvangin, kan politician-te hian thu puarpawleng mai mai hmanga inbeih hi sim tawh se le, ram hnuk khawih thil tak takah hian inhnial rap rap tawh zawk se a va tha dawn em! “Mizoram sawrkara Power and Electricity Minister chuan sawrkarna an chan hnuah Mizoram state power deh chhuah chu megawatt 150-a a pun thu a sawi a. Hetih lai hian opposition party chuan tun hnaia power thar chhuah punna hi megawatt 150 ni loin megawatt 120 nia an ngaih thu thuchhuah siamin an tar lang ve bawk’ tihte hi kan ram hruaitute inhnial dan ni tawh zawk se, tun ai chuan kan changkan phah zawk ang maw le.

Ram tha tak kan nei a, ruahtui kan dawng tha em em a, central sawrkarin kum tin cheng vaibelchhe sing telin min tuamhlawm a, ei leh barah kan intodelh thei chuang si lo. Mipui zir loh nge sawrkar zir loh zawk? Engtikah nge ei leh barah hian kan intodelh ve ang le? Kum 30 chuang zet state puitling kan ni ve ta. Intodelha mahni kea din chu a hun ve ta hle mai. Inthlan dawn apiangin ‘Ei leh bara intodelh’ tih chu kan politician-te auhla ber a ni a; mahse, heti mai hi kan la ni si. Intodelh lo, chawmhlawm mai kan ni a, vaiho pawhin min zah lo hle a ni ta ve ang, hei, kan ram chhungah ngei an rawn sapatal ngam a, kan thlamte pawh min halsak tak a nih hi! Mizote kan va thangtlawm vawng vawng em! Zikpuii Pa tih dan takin, kan pi leh pute chuan heng Bengali vai leh Cachar vaiho lu hi an la thin a sin maw le!

Hmasawn kan duh a, changkan kan duh a, kawngpui tha kan duh a, ei leh bara intodelh kan duh a, tumah hmasawnna duh lo kan awm âwm lo ve. Kan politician-te pawh hmasawnna duh hlei hlei an nih a rinawm. Mahse, heti chung hian hma kan sawn mawh hle mai si. Kum 30 chhung hian ei leh barah kan intodelh lo a, kawlphethaah kan intodelh lo a, kan kawngpuite a chhe deuh reng mai bawk si. Engvang nge ni ang le? Kan politician-te hian ram leh hnam an hmangaih tawk lo ti dawn ila, tuna sawrkarna chelhtu ngatte phei hi chu ram leh hnam tana martar huam, nunna thapa kum 20 chhung tehmeuh lo rammu tawhte an ni a, ram leh hnam hi an hmangaih a rinawm hle mai si. Hmasawn duak duak hi a harsa a ni ang ti dawn ila, keini aia a let za chuanga mihring tamna Bihar state-ah te chuan reilote chhungin Nitish Kumar-a te chuan ‘change’ an thlentir lawi si.

Hnam zahawm, hnam intodelh kan lo nih a, kanthenawm vaite pawhin min palzut mai mai loh nan kan politician-te pawh hian thil tak tak, ram hnuk khawih thil chauh hi buaipui teh se. Mipui pawh hian kan politician-te lakah hian thikthu tichhia ila, inthlan dawna an thutiam tihlawhtling lote chu i hnawl hmak hmak ngam ang u. MLA pakhat bântir tura kan buai kan buai lai leh, ‘Zalenna an sual, an sual lo’ tia kan inhnial mai mai chhung hian khua kan tlai takngial dawn e.

“Hnutiang hawi lovin, nghilh zai rel ila,

Kan hliam hluite dam rawh se.

Khua a sang ta hle, khua kan tlai ang e.

Tunah hian i kal ang u.”