RAN KHUAHKHIRH CHUNCHANGA VILLAGE COUNCIL THUNEIHNA

T. Lalnunsiama - Oct 19, 2022

Mizote hi kan pi leh pute hun lai atanga ran vulh thin kan ni a, chhungkaw khawsak tha leh tha lo tehfung atan pawhin ran hi kan hmang nasa thin hle. Hun a inher danglam a, khawvel changkannain min chim chho ve ta zel a. A bikin khawpuiah chuan chenna In bul hnaia ran vulh te pawh hi a lo remchang ta lo fo a, chutih rualin Mizotea bet tel tlat, ran vulh hi kan thlah hlei thei si lo a, chu vang tak chuan ranvulh chungchangah hian dan leh hrai mumal tak kan neih a tul ta viau a ni. 

Mizote hi kan pi leh pute hun lai atanga ran vulh thin kan ni a, chhungkaw khawsak tha leh tha lo tehfung atan pawhin ran hi kan hmang nasa thin hle. Hun a inher danglam a, khawvel changkannain min chim chho ve ta zel a. A bikin khawpuiah chuan chenna In bul hnaia ran vulh te pawh hi a lo remchang ta lo fo a, chutih rualin Mizotea bet tel tlat, ran vulh hi kan thlah hlei thei si lo a, chu vang tak chuan ranvulh chungchangah hian dan leh hrai mumal tak kan neih a tul ta viau a ni. 

Ran vulh chungchanga tuna Mizoramin dan kan neih mek hian Aizawl Municipal area hi a huam lo tlat mai a, Aizawl khawpui tana dan leh hrai tha tak kan siam chhoh a tul hle. 

Ran khuahkhirh chung-changah hian The Mizoram Animal (Control & Taxation) Act, 2014 leh Rules 2016 kan nei a, he dan hi Munipal area (Aizawl) leh District Council pathumah hman a ni lo a, Mizoram chhung hmun dang zawngah chuan he dan hi hman a ni. Municipal area (Aizawl) ah hian ran khuahkhirh chung-changah dan mumal tak kan la nei lo niin a lang a, sawrkar ang pawha hmalak thuai a tul dawn hle niin a lang. 

Mizoram Animal (Control & Taxation) Act, 2014 leh Rules 2016 hnuai kan hriat tur pawimawh zualte lo sawi ila.

Ran neitu chu Village Council-ah a in report ang:
  Ran neitu chu Village Council hnenah thla khat chhungin a in report tur a ni a, a ran vulh zat te, a note leh puitling a neih zat te leh a ran vulh hming te chhinchhiah tur niin sawrkarin chhiah a bituk zat a pe ang a, Registration fee chu Village Council fund atana hman a ni ang a, Village Council chuan ran chhinchhiahna leh chhiah pekna register chu felfai takin a vawng ang. Chung register chu District Local Administration Officer emaw, a aiawh sawrkar mi leh sa te en fiah theihin a awm tur a ni.

Ran chu khuahkhirh tur a ni:
  Ran enkawltu venna hnuaia a awm a nih loh chuan ran engmah hi chhuah zalen loh tur a ni.
  Ran neitu chuan vantlang leh mi mal tana harsatna thlen turin a ran a awmtir tur a ni lo.
  Vawk leh ar hi khung tur a ni a.
  Kel chu uluk taka venna hnuaiah a tlatna tur hmunah tlattir theih a ni a, zanah erawh chuan khung tur a ni.
  Bawng, sial, sakawr leh lawi te pawh kel ang thova a tlatna tur hmun bik tura Village Council-in a ruahmanna hmunah uluk taka venna hnuaia tlattir theih a ni.
  A chunga sawi bak ran dang reng rengte pawh hung chhungah dah tur a ni a, chutiang a nih loh chuan uluk taka thlun tur a ni.
  Ran reng reng chu mi dang tana hnawksak a nih loh nan thianghlim taka enkawl thin tur a ni.
  Ran neitu chuan ran zun leh ek te mi dang tana hnawksak lo turin a senghawiin a vawng thianghlim tur a ni.

Village Council-in ran an khuahkhirh ang:
  Village Council te chuan sawrkar nen inberawnin ran tlatna hmun tur an ruahman ang.
  Mi mal leh vantlang hmuna ran chhuak chu man tur niin Village Council hnenah hlan a ni ang a, anniin a dahna tur hmunah an lo thlung ang. Village Council-in ran a dahna hmun hi mi dang tana rimchhia leh hnawksak thlen theihna hmun a ni tur a ni lo.
  Mi mal leh vantlang hmuna ran tla te chu tihpalh thil thua a lo inhliam palh emaw, vanduai palh avanga ran thihna hial a thleng a nih pawhin (tihluih avanga hliam tawrhtir emaw tihhlum luih emaw ni lo) a tlatna hmun neituin mawh a phur lo ang. Chung thilah chuan Village Council-in ran chu a neitu hnenah an hlan ang.

Ran mante chhinchhiah dan tur:
  Ran a tlatna tur hmun ni lova tla mante chu Village Council chuan a hnuai ami ang hian a chhinchhiah thlap ang:-
(a) Ran nihphung/hming leh a number.
(b)  Village Council hnena hlan ni leh darkar.
(c)  A mantu hming leh address kimchang.
(d)  Ran neitu hming leh address kimchang (hriat a nih chuan).
  Village Council hnena ran mante hlan a nih hnu darkar 24 chhung ngeiin tlangau hmangin ran man a nih thu puanzar tur a ni.
  Ran chhuak man te reng reng chu riltam tuihala dah tur a ni lo a, Village Council-in chaw leh tui pein chawmna man sawrkar bituk zat ang chu ran neitu hnen atanga dil leh tur a ni.
Ran mante enkawlna man (feeding charge), a neituin Village Council hnena a pek tur zat:
                                 Ran puilting      Ran note 
                                 (ni khat zelah)
(a) Vawk                   Rs 100.00         Rs 50.00 
(b) Kel                      Rs 100.00         Rs 50.00 
(c) Bawng (Cattle)    Rs 100.00         Rs 50.00
(d) Sial                     Rs 100.00         Rs 50.00 
(e) Sakawr               Rs 100.00         Rs 50.00 
(f) Lawi                    Rs 100.00         Rs 50.00 
(g) Ran dang           Rs 100.00      Rs 50.00 

Village Council atanga ran man sa khul chungchang:
  A neitu chuan ran chu a khul thei ang a, Village Council chuan ran enkawlna/ chawmna man bakah lei-chawi (fine) tur an dawn hnuah a neitu hnenah ran chu a hlan ang a, receipt-ah pawh an sign hnan thlap ang.
  Ran chu man a ni tih tlangau puantir a nih atanga ni sarih (7) chhunga a neitua inchhal an awm lo emaw, a neituin pawisa chawi tur a pe duh lo emaw a nih chuan Village Council chuan an lilam (public auction) ang. Lilam manhla lo tur thil leh lei duh tur pawh awm lo tur ang a nih erawh chuan Village Council chuan tha a tih angin ran chu a tiral thei ang. Heng rante hi Village Council member emaw, an chhungte emaw pawhin an lei thiang lo. Ran hralhna man chu Village Council sum atana dah that tur a ni ang. Amaherawhchu, hralh a nih atanga ni 15 chhunga a neituin a ran hralh tak chungchangah claim a nei a nih erawh chuan ran hralhna man zat leh pawisa chawi tur ang ang te a rawn pe a nih chuan ran chu a neitu hnenah chuan pek let leh tur a ni ang.

Chhiah chu Village Council leh State sawrkarin an insem ang:
  Ran chhiah/tax (registration fee ni lo), sawrkar bituk zat chu Village Council in a khawn ang a, chhiah lakkhawm atanga zaa sawmnga chu Village Council fund a ni ang a, a chanve dang erawh chu sawrkar consolidated fund-ah chhun luh tur a ni. Village Council chuan chung a chhiah khawnna leh a sem darhna record te chu mumal takin a siam ang.

Hremna awm thei te:
  Ran khuahkhirhna dan bawhchhiaa mi mal ramah emaw, vantlang hmunah emaw ran tlattirtu chu Rs. 500/- thleng pawisa chawitir theih a ni a, ranin thil tihchhiat a nei a nih chuan ran neituin a hu tawk zangnadawmna a pe ang. Ranin mihring a hliam a nih chuan ran neitu chuan damdawia a enkawlna senso a tum tur a ni a, a tuartu hnena pek turin pawisa Rs. 500/- thleng chawitir emaw, a pahnih emawa chawitir kawp theih a ni.  
  Mi tu pawh, ran chhuak mantu tur lo dangtu emaw, ran man tawhsa dan ang ni lova lak let tum emaw, la let emaw an awm a nih chuan Rs. 500/- thleng chawitira hrem theih a ni.
  Ran man tawhsa lo vengtu/kawltuin dan ang ni lova ran chu mi dang hnena a hlan chhawng emaw, chaw leh tui a pe tha lo emaw, danin ti tura a tih ang ti lo emaw leh  dan ang ni lova ran khultu emaw te chu dan anga hremna/lei-chawitir an nih bakah Rs. 500/- thleng chawitir theih a ni.
  He dan hnuaia chhiah pek tur ang pe duh lo emaw, ran thlah zalentu emaw chu Rs. 200/- thleng pawisa chawitir theih niin chawitir hnuah pawh dan an bawhchhe leh a nih chuan Rs. 300/- zel chawitir chhunzawm tur a ni.

Hnukharna: 
Mihring leh ran te hi inring tawn leh mamawh inpe tawn, hmasang atang tawha inngheng riala khawsaho kan ni a, amaherawhchu tun lai hunah chuan kawng hrang hranga kan lo hrisel zawk nan leh anmahni ran ngei pawh an lo himdam zawk nan keini mihringte nen inchiahpiah lutuk lova kan inhlat (distance) thiam deuh te pawh a tul hle. A bikin khawpuia awm te hi mihring kan bitin chenna In a insi rial hlawm a, amaherawchu ran vulh leh khuahkhirh chungchangah dan mumal (Municipal area tan) a awm rih tlat lo a. Thuneitu leh dan siamtu lam ten tan kan lak thar a tul takmeuh a ni. 

 

Share now