Tun tuma ka ziah tum, Republic Veng lo awm tan dan hi, kar hmasa Republic Day nia chhuak awm tak a nih nen, ka lo ngaihtuah lem ta thin lo a, ka han ziak ta reng reng a ni.

January, 1950 hma kha chuan Tuikhuahtlang hlawmah hian Sikulpui, Sikulsen leh in te pakhat leh Bawrhsap in ral chhak deuhah Supera kan ti mai a, PWD hotu in, 1st Assam Rifles Commandant in leh tuikhuah enkawltu in hi in awm chhun a ni mai tain ka hria. Capt. L.R.Sailo (Kelsih House) in kha tunah Republic Veng Biak In khi a ni bawk a. Tuikhuahtlang mual hrim hrim chhuah chhawng lam hi chu Chhura ruak an tih ang mai ngaw durpui tak meuh a ni thin.

Kum 1935 laite kha chuan Sikulsen khi Mizo naupang Primary sikul a ni a, kei pawh naupang tak meuh niin A pawl ka zawm ve. Kum 1938 kha Lower Primary Scholarship exam thei ka ni a, ka chhungten i naupang lutuk (kum 6) an tih avangin ka chawl a, 1939-ah Mizorama 2-na tling phain Pawl III chu ka pass ve ta a; mahse, ka pain scholarship lak a phal lo a, “Kan aia harsa lehzual tan i dah ang,” a ti. Ka ui teh a sin aw... Chutih lai chuan Pawl III scholarship chu Rs. 3/50 a ni thin. Sikulpui chauh khi North Lushai Hills-a Pawl IV te, Pawl VI sikul kalna awm chhun a ni thin (A dawt chu MAV Schoool 1944-a Sialsika hawn kha). A! Tuikhuahtlang mual hrim hrim hi, ka sawi ang khan ngaw durpui mai a ni a, Primary/Middle sikul kan kal lai (1936-1942) chuan chawlhlawkte kha a lo rei awm thin! Pu Laldenga te kawmthlang daiha Theihnangtawm an tih maite kha hmanhmawh baksak loin kan zuk tlan thin nia. Thingvawkpui leh Beltur tlan Ramparva/Varung tih angreng thang kan kam a, thlasik sikul chawlh hlan hi kan nghakhlel em em thin.

Tuna Pachhunga University College tih angrengte hi chu silai nena Sakhi ilo channa, mi naran kal phak a ni lo.

Ka sawi hun laia Middle School Head Master chu Rahsi Venghluia mi - Pu Hrawva B.A kha a ni. A lo kal pheina turin kawng te tak tein sikulpui hi a pawh. Tuna vai sikul chhakah te sawn thingsemim zawngin kan thai nasa thin mawle! Sawkhar reserve ni mah se thing ro phurh tur hi a awm reng mai. Chung hun lai chuan Forester, Forest Guard ten reserve chhung thing hi an veng thin. A ro a awm chuan an lilam a, a chhang huai berin an chang ta thin a ni. “Sorkari dam ek rupiya,” atanga tanin.

Tuna Republic kawngpui phei khi - Pu Mena (E.L.Mendus) missionary lo zin leh awm lai tak a ni a, Sikulkawn atanga mipui (leilaihna hmanrua keng vekin) kan intlar put a. Kei pawh kum 21 ka ni ve tawh a, ka tel ve nghe nghe a, Pu Mena chuan a chek hmasa ber a, chutah mipuiin kan lai chhunzawm ta a ni. Republic Day hmasa ber, 26-1-1950 a laih tan a nih avangin Republic kawng (Avenue) tih a ni thin. Kawngpui na na na chu miin in an rawn sa zel a, tun hi kan thleng ta a nih khi. Republic Veng a ni ta uar mai a nih khi.