Vawiin tahrik ni 28, Ramtuk thla, kum 2025 hian ka thian duh tak chuan nupui a nei dáwn a. Ka kal ngei ngeina tùr inneih inkhâwm, inkh urhsûn tak a ni. Ni e, inneihna, Pathian Kohhran Dàn Puitling (kan unau thenkhatten Dân khatna an tih) hi thil tih namai a ni lo a; kohhran serh leh sâng pawimawh tak a ni a; kohhrante paw’n kan ngaihlut deuh deuh a va tûl êm!

Kal tùr ka nih laiin kal theih lohna chhan lian tak ka nei—treatment la lai ka ni miau a. Kal thei dáwn loa ka inngaih laiin an tán flyer/tléma mi hlui deuhte hriat thiam thei tùrin “poster” ka siamsak a. Chuta ka rilru min ti buai riau­tu—thil ho deuh pakhat chu, kan thalaiten inneih sàwmna an siam rêng rênga an hman (ziah) tâk thu pakhat—“Save the Date!” tih ka dah ang em? tih hi a ni.

Ka va buai êm!

Photoshop leh Canva ka hawng kawp a. An preset/templates (an design neih sa) lamah “Save the Date!” chu ka’n search ta a. Duh aia tam thlan tùr chu ka hmu—ka thlana erawh tlêm të a ni.

An thlalâk pawh ka bel lëm lo a, template-a awm kha ka siam tha (edit) mai a. A ni thla leh kum leh dár zât zawng zawng ka thlâk hnuah buaina ka nei ta—“Save the Date!” tih intár vùng chu ka hmang ve ang em?

“Hmang ve lo ang,” tih chu ka thu­tlukna a ni. Mahse, Mizo tawngin engtin nge ka dah ang?

Duhthlanna #1: “Vawiin kan inkuihsuih ní.”

Vawiin flyer ka siam ní hi an inneih ní a ni tho a; a va rem êm! Ka hmang nghal pang mai. Tin, anmahni pawh ka thawn nghâl a; tha an ti ve viau!

Mahse #1

Mahse, a awm ta tlat! Kum 1964 kuma the Los Angeles Time-a an hman tan, inneih sàwmnaa an hman chhoh tâk zêl, he tawngkam “Save the Date” tih hi, “Vawiin kan inkuihsuih ní” tih emaw, “Vawiin kan inneih ní” tiha dah a rem leh ta tlat lo mai! Hêng thute hi chu inneih ní-ah chauh hman a rem leh si.

Hetin ti ta ila:

“Kan inneih ní tùr aw…” tiin emaw, “Tiam tlat e, kan tih ni tur aw…” tiin emaw dah ta ila, kan inneih thu chhamah hian “Tiam tlat e,” tih kan chham tel si lo a; Upaho lung kan ti awi leh si lo ang!

Tin, kohhran upa kher lo, MUP member chinin chiang lo an ti ang. Anni chuan inneih inkhâwm bàna thlalâk dàn tùr indawt zawng zawng rem nghâl vek an duh ang a; ruai kîl nghâl tùr mawlh kha an thupui ang!

Kan va buai êm! Kohhran thiltihna rêng rêngah hian a réltu an tam poh leh thu rèl a nawi a, Committee meeting kan rei ziah tih hi ka ring. Biak in sa lai zíng apiangah engineer—Local EE an tam ziah!

Heti hian i ti mai ang

Heng thil kan sawi la, “Save the Date!” kan hmanna ang hi chu, social media-a tàr lan tùr, status-a Story tùr chauh a ni. A inkhâwm program, thlalâk dàn tùr zawng zawng kha chu, Biak ina inkhawmte chan tùr Usher-ho sem tùr innei tùrten an siam fel mai ang. 

A hrim hrim thuah:Ka àn hla

Hmân atang tawh khán kan rual ú-te, kan senior-te khân an lo vei daih tawh a; an helh thu pawh an lo sawi chamchí tawh—Mizo tawng kan hman theihna laia Sap tawng chelek sek hi. Hei hi chu kan inen nguna insiam that kan ngai hle mai.

Entír nán, tû huatthu kan sawi lo ang chu maw—Mizorama thalai pawl lian ber pahnih KTP leh YMA te chu an inti “Central” ruih mai; an inkhâwmpui hmingah pawh “Central YMA/KTP General Conference” an la ti fan—Sap tawng ngatin. A chhima te kha Sap an ni àwm chuang si lo a! Mizo tawng chawi nun hi sawi sawi mah se, a réltu chu Central Young Mizo Association, Executive Committee member, Mizo hming tel miah lo ho thut khâwm an ni dáwn si! Chutiangin Kohhran thalai páwl kan neih len ber paw’n, Mizo tawng hman uar kum puang dawn se, a réltu tùr chu “Central” tih tel tho an ni si! Hahthlak hlawm hian! Thlâk lah chu kan la tum dèr mai si lo a!

Biak inah han inkhâwm ila; a chhung luh hma hauhin “Khualchhawn” ni lo, “Usher”-in thutna min lo kawh hmuh zo ta vek a nih hi! Ziaktu aiah Secretary-te thu puan hi lo ngaithla chiang mah rawh, Sap tawng hmang miah loa thu puang  chhuak parh thei i hria em? 

A khaw tin pawh hi, English Medium, chu pawh Primary-English Medium Sikul chauh awmnaah pawh han zin ila, an khaw luh dáwnah “Welcome to …” tih an lo tár fur zêl a; an khua chhun pelh dâwn ila, an khaw daiah, “Safe Journey” tih an tár zêl tawh nia maw le!

Zirlaiho pawh kan bâng chuang lo. Coaching an kal hi chu ka la hre thiam a, “Exam an pe kher zêl” hi chu ngaihtuah tham a tling. Exam ber an pêk daih ten… Eng nge an exam leh ang? Pêk chi a ni lo a; exam mai chi a ni. “KA exam a,” tih an harsat tlat tawh nia!
Admission te, Entrance te hi “tih” emaw “beih” emaw te pawh an tum tawh lo; an “try” kher zêl tawh a nih hi! 

Thlèr tina kan thil tàrah hian A! “Welcome to…” hi chu lo dah tha ta pawh ni ila, Sap tawng deuh hlîr a ni ta—kan signboard ho hi. 

VC in pawh kan nei tawh hleinêm, “VC House” a ni deuh vek tawh!. Ropui ta viauah leh “Power house” riau hian kan inngai emaw ni chu aw … kei chuan ka ti tlat. YMA thleng paw’n  “YMA House” tih kher hi kan chíng ta emaw ni chu aw…
Bazarah han kal ila, dàwr hming atanga Mizo ta ni àwm hi chu a váng ta pharh nia. Kei chu, 2 Wheeler taxi/Taxi/City Bus “fare” ai chuan “a chuan man” hi pe ila, a tlàwm deuh te ka ring hial asin!

I tlip mai ang!

Saphoin min awp a, kan chaw thing leh kan bekang min paihsakin an culture min barh lui a. An mahni ngaih sànna chu, generation tin hian a sáng zêl a. Hei vànga changkànna leh hmasâwnna kan hmuh pawh a tam mai. Mahse, kan Zo tawng dal zawng hi chuan i hmang lo hräm ang u. 

Hêng thil ka ngaihtuah chhuahna ber chu: innei tùrten Sappui tawng “Save the Date!” tih atangin a nih chu. A aiah hian, kan Zo tawng mawi tak i hmang ve tawh zâwk ang u, kan ti a ni zâwk e. Kei chuan, khita ka rawt tawh, “Inneih kan tiam hun tur aw…” tia dah mai ka rawt e.