Kan ramah hian heng natna pahnih hi kan hre lâr chho ta hle mai. Scrub Typhus phei chu “Rannung Seh Natna” tiin kan hre awm e. Mihring leh mihring inkara kaitheih natna ni lovin a hrik paitu rannung/thosi atanga kan kai a ni a, Vector-Borne diseases tiin an sawi. Heng natna pahnih hi kan buaipui ta hle mai a, tunhma kum 10-15 hmalama kan hriat tam loh kha tunah chuan kan ramah natna awm nghet (Endemic Disease) an ni ta ber a. Thih phah pawh an awm ta nual reng a. Chuvangin kan hriat chian atan ka han ziak a ni.

Scrub Typhus hi rannung te tak, mit lawnga hmuh mai harsa tak, Chiggers (Mites) seh atanga kai thin a ni a. A natna thlentu hrik hi Orientia tsutsugamushi an ti a, Bacteria chi khat a ni. He hrik hi Chiggers te hian an pai a, mihring an seh atangin a hrik hi taksa ah lutin natna an rawn thlen ta thin a ni. Heng chiggers te hi ni hmu vak lo lei hnawng, hnim hnah awmna hmunah an awm thin a. Chuvang chuan feh kal leh ram kal te hian seh an tawk duh hle a ni.

Chiggers ten mihring an seh hnu hian a hrik a hi thisen ah lutin an inthlahpung ta thin a. An seh atanga ni 10 vel chhungin an rawn damlo/in­sawisel tan ta thin a ni. A sehna hmuamhma hi Eschar an ti a, bial deuh pem ang hian a awm thin. Thenkhat ah chuan a lang kher lo bawk. An insawisel dan tlangpui chu khawsik tlun, taksa sil, tihrawl kham, lu na, thâl thoh te a ni a, a nasa ah chuan hriatna buai deuh, nikhaw hre lova awm te pawh an awm hial thin. Enkawl har chuan septicemia thlenin septic shock an nei a, an taksa khawl – thin, kal, lung te hnathawk hlei thei lovin an awm thin a ni.

Hriat hma hi a pawimawh khawp mai a. A chunga insawiselna kan sawi te kan nei anih chuan thisen test nghal a pawimawh hle. Test an hman deuh ber chu Rapid Diagnostic Test an ti a, mahse hei hian result dik lo (false positive) a thlen ve thei a. Chuvangin IgM ELISA test emaw, a tha berah chuan Indirect Immunofluorescent Antibody (IFA) hmanga confirm thin a ni. Hriat hma chuan a enkawlna damdawi antibiotic Doxycycline 200mg (single dose) hi a tha hle a. Chutih rualin 100mg nitin vawi hnih in ni 7-10 te pawh an pe bawk thin. A nasa zual deuh ah chuan n khatah 400 mg te pawh an pe bawk. Naupang dose tur erawhchu an rih zat (weight) a zira pek tur ani thung. Mahni thua damdawi hi ei mai loh a pawimawh thung.

Inven dan a vâng viau mai a. Ram kal emaw feh tur te chuan kawr/kekawr ban tlawn hak te, pheikhawk pum bun te a pawimawh. Insect repellent (entir nan a hnawih chi) te hman a tangkai ve thei bawk. Tin, 0.5% Permethrin hmanga thawmhnaw leh mutbu te chiah hian a sehtu Chiggers te hi a that thei bawk.

Dengue Fever thung hi chu those seh atanga kai a ni thung a. Malaria thlentu thosi hi Anopheles ani a, Dengue Fever thlentu thosi erawh chu Aedes thosi ani thung. A hrik hi bacteria ni lovin Virus ani thung. Dengue hi chu a kai zinga 75% hian insawiselna nei lem lovin an kai thei a, a bak 25% zinga 5% hian nunna atana hlauhawm (serious Dengue) an vei thei thung.

A lan chhuah dan tlangpui te chu – khawsik sang (104 deg­ree te pawh a kai hial thei), mitkhur na, tha/tihrawl/ruh chuktuah na tak, luak chhuak/luak te, vun vual te a ni a. A nasa ah chuan pum na vak, ek emaw luak thi te, ha hni emaw hnar thi te, chau ngawih ngawih leh thawhah te a awm thei. Thi put hi a chhan chu thisen a thi ti khaltu timur (Platelets) an tlem thut vang a ni a. Blood count ah Platelets hi a normal chu 1,50,000 – 4,50,000 vel ani a. Dengue ah hian 50,000 – 1,00,000 velah a tla thin tlangpui a, 20,000 aia a hniam chuan taksa tan a hlauhawm thin a ni. Khawsik a awm atanga ni 7-10 velah an rawn tha chhuak ve leh tlangpui.

A enkawl danah hian damdawi hman tur bik a awm hran lova. Supportive care an tih mai – taksa hahchawlh, tui in tam (dehydration ven nan), khawsik sang control nan paracetamol pek te ani a. Thingfanghma hi a tihdamna ani lova, mahse Platelet count a tihsan ve theih avangin a tangkai thei thung a ni. Kan sawi tak angin pumna vak, luak nasa, hnar emaw ha hni thi, taksa chau ngawih ngawih, rilru lam chiang lo, taksa vawt thler leh zun tlem lutuk te a awm erawh chuan damdawiin pan vat a pawimawh ang. 

A inven dan chu thosi seh laka invent ani deuh ber mai a. Thosilen hman that te, kan inbul hnai ah tui tling, thosi inthlahpung lo tura tihfai te a pawimawh bawk ang.