Zawhna: Mipa kum 36 mi ka ni a, zunthlum ka nei si lo a, kum khat vel kal ta atang khan ni khatah vawi 10 dawn dawnte ka zung a, thla hnih thum liam ta atang khan sex-ah hian kan chak lo ta viau mai bawk a, engnge a chhan ni thei ang le? Ka zun hian na leh thisen a awm chuang lo a, a changin a eng a, a changin a var bawk. Min puih theih chuan ka lawm ngawt ang.

Chhanna: Zun tam lutuk (increased urinary frequency) hi a chhan hrang hrang a awm thei ang a, chung zingah chuan zunthlum (Diabetes) hi a common ber chu a ni awm e. A chhan dang ni theite chu – Prostate Gland (mipa phing hnuaia thal chi khat) thang te (benign prostatic hyperplasia-BPH), phing emaw zunkawnga lung awm (bladder or ureteric stones) te, kidney function buai te, damdawi thenkhat, a bikin zun tamna avang te, tui in tam lutuk te, zu in nasa ah te, coffee in nasat vangte a ni thei a. Hei bakah hian mental disorder chi khat Anxiety disorder vang te a ni thei bawk. Diabetes dang chi Diabetes Insipidus vangin a awm leh thei a, hetiangah hi chuan an zun tam lutuk a, taksa electrolyte imbalance an nei tel thin bawk.
I kum ngaihtuahin BPH hi chu a nih hmel loh phawt mai a. Zunkawnga lungte awm eng emaw ber a nih duh hmel viau a, chumi chu hre chiang turin ultrasound lo ti thei la a tha hle mai. Thyroid function buaiah hian a awm ve theih bawk avangin thyroid function test lo ti tel ta la. Sex lama chak lohna i neih tel avang hian phing leh a bul bawr te enchian tel a tha viau mai a, ultrasound-a en chian a, kan sawi tak natna te hi rule out hmasak a tha ang. Tin, i hnathawh emaw mi mal nun lamah rilru tihahtu i neite a nih chuan stress vangin sex drive a hniam thei bawk tih hriat a tha. Rilru a vei neih rengte hi mental disorder common tak – Anxiety disorder a ni a, chutiang avang chuan i insawiselna chi hnih hi a awm thei bawk. |ha berah chuan surgeon doctor lo inentir hmasa la, surgical cause i nei lo a nih chuan medicine lamah an refer leh mai che ka ring a, i harsatna hi an puih theih ngei che ka ring.

Zawhna: Ka pu. nula kum 26 ka ni a, thla kalta khan ka mît paih a ni a. Tunah hian a zaina vel chu a dam tan tawh a; mahse, ka thin na a la awm a, ka luak a chhuak bawk thin a, ka hnungzangte hi a na tel thin bawk a, ka kua a tha thei der lo mai a. Mît paih vanga lo awm nge ka pum that loh vang ni ang? Khawngaihin min pui hram teh.

Chhanna: Mît (gallbladder) hi kan thin (liver)-in kan thil ei digest tura a siam tuihnang “bile” lo khawl khawm a, thil kan ei veleh a rilte a zuk chiah zawp tura pump chhuaktu a ni a. A tel lo pawh hian kan awm thei nachungin han paih hian side effect a keng tel ve thei a, chung zingah chuan tuna i insawiselna ang hi a common pawl a ni awm e. Bile hi a bik takin kan thil ei a thau “fats” te digest tura puitu bik a ni a, mît paih hnu hian chaw inthial sawm fel lo “indigestion” a awm ve thin a, chu chuan luak chhuak te, pum nuam lo te, puma gas insiam tam vanga pum hnawh te, ek mumal lo te, pumpui acid insiam tam phah vanga pum lawng te a siam thei a, chu chuan hnungzangte a tina thei bawk a ni. Pum tha lo i nei tel hrim hrim sa pawh a ni thei a, engpawh chu nise, i digestion pui tur hian enzyme lam lo ei tel ta la (Aristozyme, Vitazyme etc chaw ei kham apiangin), hei bakah hian i pum acid insiam control nan Pantoprazole/ Rabeprazole te pawh lo ei tel bawk la (zan mut dawnah), chu chuan i harsatna a puih theih che ka beisei.