Hringnunah hian simna hi a pawimawh ber kan ti thei hial awm e. Simna hi mi tin nun țo bul leh tawp hrilh fiahna, a hmawr min bawksaktu a ni, kan ti thei ang. 

Kan nitin nunah hian simna hi a pawimawh lawt lak a ni! Simna tel lo chuan hring nun hi a kim thei lo, tih hi a ni dikin a pawm tlak em em a ni. Chuvangin thusawi lar tak pakhat "Simna tel lo pian tharna" tih pawh hian simna hlutzia leh kan mamawhzia chu min hrilh fiahsak âwm e. . Bible zirtirna pawimawh ber zinga pakhat pawh simna hi a ni a. 

Thuthlung Tharah hian kan Lal Isua pawh khan he simna thu hi a lo tlangaupui a, Tirhkoh Johana pawhin a sawi uar hle a ni. Chanchin Tha Luka ziak Bung 3-na Chang 8 hetiang thu hi kan hmu a ni, "Sim hming pu tlakin rah rawh u," tihte Bung 13-na thupui kan hmuh chu "In sim loh chuan in thi ang" tih a ni bawk. Simna chu nunna a ni a, sim loh chu boralna a ni, tih Lal Isua'n a sawi a ni. Chanchin Tha Matthaia ziak 3:2-ah "Sim rawh u... Vanram chu a hnai tawh e..." tih thu Isua thusawi ropui tak kan hmu bawk. Simna chu Pathian ram, Vanram thlen theihna a ni a. Nunna a ni. Dam chhung la lâ a nihlawhna pawh a ni. Chuvangin a thu ngaithlatute kha an nun sual bansan a sim turin Isua'n a duh a. Isua'n vanram kai a duhsak em em a ni. 

Pathian thu zirmite chuan 'Simna' tih hi hetiang hian an hrilhfiah a. "Simna chu inchhirna leh pawi tihna atanga ngaihtuahna thar nei a, awmdan hlui kal san tih leh kan thil sual tih thin tih tawh loh leh a that lohzia hre chhuak a, inchhirna neia intiamkamna a ni" an ti.

Chu simna chi hring nun bul țhut leh innghahna chu a ni a. Sim hnua sim loh leh hi simna dik a tling lova. Simna dik chu sim hlenna, dam chhung huna thil tha lo bansana thil tha tih chhunzawm zelna a ni. He nun hi nun duhawm a ni a, nun hlu a tling a ni.

Kan hring nun zin kawngah hian thil sualin bul kan tan a, thil dik loin min umzui zel a, thil thain kan nunah hmun a chang lo fo thin a ni. Kan Lal Isua pawh khan a zirtirte leh a thu lo ngaithlatute chu an thil tih sual leh thil chin tha lo te bansana kalsan turin 'order'a pe a. Johana pawh khan he simna thu hi a tlangaupui nasa hle thin a ni. Tirhkohte zinga lar tak tak Petera te pawh khan thupui berah an nei hial a ni. 

Simna dik tak leh dik lo hi a awm a. Simna dik chu a tlova, nun a siam tha thin a ni. Mihring nun tiseitu pawh simna tluan tling hi a ni. A pawimawh dan hi a na mai lova, a ril a, a daih rei bawk. 

Lei mihringte hian kan nuna bet tlat bansan tur thil tha lo tam tak kan nei. Kan mize tha lo tak tak, chhuanawm lo tak tak, thatna reng nei lote hi kan hluihlawn a ngai ta a nih hi. He nunze tha lo tak hian nun a ti buai a, a ti chiai a, nun a ti nghing a, mimal, chhungkua, khawtlang leh ram leh hnam chenin kan tuar ta thin a lo ni. 

Eng nge maw kan sim tur chu ni ang le? 

Heng mihring nun ze tha lo tak tak, mahni tha zawka inngaihnate duhamnate, chaponate, mi dang itsikna te leh huphurhna te, elsenna te hi kan nun tinuam lotu a ni a. Bansana sim san tur kan ni. Mahni hmasialna te, sum leh pai atchilhna te hi a tirah tha viauvin lang thin mahse, a tawpa min timualphotu an ni thin. Hring nun chhungril ber atanga ze tha lo, setana ze huat thla la tak atanga lo chhuak chuan thil tha lo min tih tir thin a nih hi. Hetiang hian kan titi zel ang. Simna hian rah duhawm tak a hring thei tih hriain i nuna i tana hnawk kha han sim san la, thil tha a lo chhuak zel dawn a ni. 

Kuhva khawr ei ching chuan sim se, meizial zuk ching chuan a tana tha lo tur a nih chuan sim bawk rawh se. Zu ruih chingte, ruih hlo ngawl veite hi tute tan mah an hnawk lo, anmahni leh an chhungte lung ngaihna khura hnuk luttu chauh an ni. Chutiang­in EI RUK leh HLEP RUK ching pawhin a ei ruk bansanin sim rawh se, kawng dik zawh rawh se. Chu chu thianghlimna lam lian a ni. Ram siam that nan pawh thinlung dik a ni ang. Kâ chauh a sawi lovin a taka NUNPUI a hun tawh.

Minister ka ni emaw, MLA ka ni emaw, Officer ka ni emaw, chhungkhat hnai vai duhsak mi chuan chutiang NAPOTISM chu ti lul tawh suh se. Nang pawh Ram leh Hnam siam thatna turin i zawn­ah sim tur i nei e. Thatchhia chu taima tawh se, pisa kal tlai thin pawh kal hmain a hun takah thleng thin rawh se. Mi rel ching chuan rel tawh suh se. Daw thei chuan dawt hmang suh se. Ruk ching chuan ru tawh suh se. 

Simna chuan Rinawmna te, Dikna te, Tlawmna te, Hmangaihna te, Taimakna te a thlen thin a, SIMNA RAH duhawm tak te an ni.