Zep thu a cheng lo a, mi tin ban phakah phone a lo awm ta a. Internet te lah a chak tulh tulh a, a hman man a tlawm tulh tulh bawk si. Tunah chuan social media hi media zingah hman nasat ber leh darh zau ber a ni hial tawh awm e. Kan vai hian social media-a chanchinthar lo chhiartu mai kan ni tawh lo a, chanchinthar puangtu pawh kan ni nghal vek bawk a ni. Kawng dangin han sawi ila, social media kaltlangin chanchinthar leh ngaihnawm tak tak kan lo hre thei a, chu chu kan lo awi thei a, kan lo awi lo thei bawk. Social media hi tangkai taka kan hman theih laiin pawisa tam tak min chawi tir theitu emaw, lung ina min nawr luh tir theitu emaw a ni ve thin bawk.  Chuvang chuan, social media hi fimkhur taka hman tur a ni. 

Kan fimkhurna tur hi tum khata sawi sen a ni lo a, a then a zar han sawi ila. Hmeichhe thenkhat chuan mipat hmeichhiat kawngah vanduaina an tawk a. Pawngsual emaw, khawih bawrhban emaw te an tawk a. An duh reng vanga thleng ni hauh lo mah se, an zak ngawih ngawih a. Pasal hmuh loh phah nan hiala hman te an hlau thin. An pasal te chhungin an hmuhsit phah ang tih hlau pawh an awm bawk. Chutih laiin an thlavang kan han hauh a. Kawng kan zawh a, thuchhuah kan han siam ta a. A hre lo tur zawng zawng hnenah tawhsual a tawh thu chu kan puang darh ta thin a. A thlavang hauhtu rilru chu tha hle mah se, a tuartu tan chuan a tha hle lo thei. Dan hian mipat hmeichhiat kawnga vanduaina (sexual offence) tuartu (victim) nihna tihlan hi a khap tlat a nia. Dan bawhchhetu chu lung in hial tan tira hrem theih a ni.  

Mizoramah hian Juvenile Justice dan kan hmanna pawh a rei ve leh ta fu mai. Kum 18 la tling lo naupang dan bawhchhia nia thubuai siam sakte hi lock up-ah dah theih an ni lo a, court-ah hruai theih an ni lo a, lung in tan tir theih lah an ni hek lo. An chungthu chu Juvenile Justice Board-in a ngaihtuah tur a ni a, a tul dan zelin Observation Home emaw Special Home-ah emaw dah thin an ni. Naupang, a bik taka ngaihsak leh humhalh ngaite chungchang hi Child Welfare Committee-in a rel ve thung a. Heng naupang kum 18 la tling lo dan bawhchhiaa puhte leh a bika ngaihsak leh humhalh ngai, an chungthu ngaihtuah laite nihna tilang thei reng reng puanzar hi danin a khap tlat zu nia! Hei pawh hi lung in tan theihna bawk a ni. 

Court-a thubuai kal lai, social media lama lo sawiho leh lo chai chiam changte a awm fo thin. Heng hunah hlei hlei hian fimkhur a ngai. Court-in mi thiam loh a chantir hma chuan dan bawhchhiaa ngaih a la ni lo. Chuvang chuan, rukrutu emaw pawngsualtu emaw, tualthattu emaw lo tih maite hi a pawi thei. Rukrutu nia puh, pawngsualtu nia puh, tualthattu nia puh han tih maite hi a finthlak viau awm e. Thubuai chungchangah mahni ngaihdan (own version of the facts) lo phul pui chiam hi a him miah lo a nia aw. A bak chu, ‘I dawt ngam leh dawt rawh’ tih ang kha a ni mai e.  

Court emaw chuta roreltu judge/magistrate emaw te chungchang rinthu nena lo sawh bawla, mipuiin court an rin loh phah theihna emaw, an hmuh hniam theihna emaw tur hawi zawnga thu lo tui tam lutuk te hi a him miah lo a nia aw, jail a hnai. Chutiang chiah chuan, court thurem dan chu kan rilrem zawng a nih loh pawhin, engmah loa ngaia, sawi chhiaa, pawm lo tur zawnga kan lo au chhuak pek a nih chuan, ban phak maiah jail a inhung lurh thei tlat. 

Thawk khat lai khan, hmeichhe thlalak thenkhat mit la tak, thlarau nun chawm miah si lo a darh leh chuai thin a. Tam tak chu, mipain hmeichhe phalna thlapa a lak sak niin an sawi. A thente erawh chu, hmeichhiain remti chiah lo mah se, a bialpain a phut tlat si a, thlem ti tih, nawr ti tih, vau titiha a phut tlat avanga lakte pawh a ni awm e. Mahse, hei hi ka sawi kai duh. Hmeichhe duhthu renga thla chu lak pawh ni se, a phalna loin midang (third person)-in thlalak chu a hmu thiang lo a, a kawl a thiang hek lo. Hei pawh hi jail tan theihna bawk a ni. 

Inthlan dawn reng rengin, NGO emaw LC/VC, MDC, MLA, MP etc. emaw pawh ni se, thu belhchian dawl lo hi a darh hluai duh viau. Fimkhur ang u aw. Mi tih chhiat tum rana dawta dik lo taka mi chungchang sawi kan nih vaih chuan defamation case a awm thei a. Pawisa tam tak chawi theihna a ni a, jail bang zut theihna a ni bawk. I thil post chu a dik ngei tih i chiang meuh maw? Court-ah case awm se, i tang zo ang em?

Sawi sen a ni lo, thil pakhat chauh han sawi leh ila. A dik leh dik loh finfiah hmaa social media-a thil post hi a pawi em em a ni. A chang chuan, thil tisualtu nia kan hriat chu mipuiin an lo chil hlum a, a then chu a hnuah thil tisualtu a ni lo tih hriat leh hnuhnawh te a awm. Thil thleng pakhat han sawi ila. Times of India, 1.7.2018-in a tarlan danin Maharashtra-a Dhule District-ah naupang ruk bo ching ni anga thu dik lo theh darh avangin mi 5 sawi sak hlum a ni. Hetiang hi sawi tur tam tak a awm. 

Thil kan post hmain, a dik leh dik loh finfiah (fact-checking) hmasa zet ila. Tin, a lo dik ngei a nih pawhin, thil thleng zawng zawng hi chanchinthar (news) atan tihchhuah a tha vek kher lo thei. 

Hmanah chuan sual lian tak khawih turin, mi hnek chawrh te, chema vih te, thingfaka vuakte a ngai a. Tunah chuan, mahni pindan chhung rilah mu chunga phone kan khawih neuh neuh laia social media-a kan thil dah leh sawi (comment) te avangin rei zek lung in a tan theih tawh zu nia!

Hengte hi ka han sawi duah chhan chu, tunah hi chuan, media zingah social media hi a tlanglawn ber leh thiltithei ber a ni tawh a. Lar nan a tha em em. Khawvel huapa mi larte hi social media hmang tangkai an ni deuh zel. A lehlam zawnga sawi chuan, mi lar ni tur chuan social media hi hman tangkai a ngai. Social media-a lar hi a pawimawh tawp a ni mai. 

Sum hmuh nan pawh a tha hle tih kan hre vek awm e. An ti alawm, tun hma chuan mipui hi thawk chhuaktu (producer) an ni a, tunah chuan sum hmuhna hnar (consumer) an ni tawh. Miin sum a hmuh nan, a lar nan, view-tu tam, like-tu tam, subscribe-tu tam an duh. An thangah awh duh bik miah loh tur. 

Social media hi mi rilrua ram lak nan hmanraw tha mangkheng a ni bawk. Social media kaltlangin inpuhna leh inhnialna a tam thei hle. Social media war an puang a ni ber mai.  
Tun tumah hian social media hman leh awih kawngah i fimkhur ang u kan ti a ni ber mai. Tun lai khawvelah chuan right kan changchawi nasa tawh bawk a, duh duh sawi theih nan right kan nei a nih chuan ngawih theih nan pawh right kan nei e. Silent reader i nih ngat chuan, dan i bawhchhe ngai lo ang.