Congress kaihhruai sorkar khan hmalakna pui ber (flagship programme) atan NLUP an hmang a, kum 2010-11 atangin an kalpui tan a. Inthlan campaign auhla a ni bawk a, an ngai pawimawh hle a, chief minister atanga party worker thlengin an sawi nasa a. Social media lamah pawh uar takin an sawi a, NLUP hmanga hmalakna hrang hrangte, a hlawhtlin chhoh dan turte an sawi kur luai a, Pathian lam tang programme ang hial ten an sawi a. Lo sawi hnawmtute leh sawiseltute chu mirethei hmangaih lo, thil tha duh lo ang hialah an chhuah thin.

Zep thu a awm lo, sorkar hmasa kha NLUP avanga thlan tlin an ni a, chuvangin party ang chuan an hlawhtlin pui tih loh rual a ni lo. An sorkar chhung khan an kailek nasa a, an tangkai pui bawk. Kum nga chhung project a ni a, a hun a tawp dawn hnaiah khan NEDP an duang leh ta a, chu chu kum 2016 khan an tan leh ta a ni. NLUP kha retheite khai chhuahna tura duan a ni a, NEDP hi chumi chhunzawmna tur rethei lei rem rap tawh te kal zelna tur, sumdawnna lama hmalakna tur ‘market-based economy’ siamna tura duan a ni. Dik tak chuan NLUP kha chu a politics thil em a, a kalphung an duan dan te, an kalpui dan te kha party politics nen a kal dun nasa a, a hlawhchham chhan langsar tak pawh hei hi a ni. Chutihlaiin, NEDP hi chu mithiam kut chhuak, a taka hman theih tur zawnga ruahman a ni a. Rei lo te chhungin NEDP hmanga hmalakna langsar tak tak hmuh tur pawh a tam reng a. NLUP aiin NEDP kha an hmingthat pui zawk.

Kum 2013 inthlan hma deuh khan MNF party hian campaign au hla tur leh NLUP elpui tur an buatsaih a. Chu chu Socio-Economic Development Programme (SEDP) tih a ni a. Mipui vantlang dinhmun chawikan leh ram ei-bar dinhmun siamthat (social-economic development) chu he policy hian a tum ber a ni. Mahse, SEDP hi an sorkar pui zo ta lo a, rorel lai congress party bawk an sorkar leh a nih kha. Chumi hnuah chuan SEDP chu an buatsaih tha leh a, a hma (2013 a an tlangzarh) aia changtlung zawkin, a buaipuitu committee-te dinin, an siam ta a. Nikum inthlanah pawh khan an vauchher ber pakhat chu SEDP a nih kha. Tichuan, MNF party chu MLA inthlanah hneh taka thlan tlin an ni ta a.

Thla ruk zet an sorkar tak hnu hian SEDP hi an chawi lar tawk lo hle a, congress sorkar laia an flagship programme NLUP an sawi lar dante ngaihtuah chuan SEDP hi sawi khât tak an ni. Chief minister meuh pawh hian a sawi ngai meuh lo, minister pahnih khat hian an sawi zauh zauh a, anni tih loh minister dangte phei chuan an sawi lang ngai lem lo. Chu chuan tun ministry a SEDP dinhmun a hril maithei a, a hril lo thei bawk.

Kar hmasa (13 June,2019) a budget pharh takah khan SEDP chu sorkar flagship programme a nih thu tarlan a ni a, hei hi an flagship programme a nih thu tarlanna hmasa ber a ni maithei. Budget pharh tak atang hian engtin nge an flagship programme hi an kalpui dawn tih hriat a har khawp mai. Budget speech-a SEDP hmanga hmalakna tur tarlan te hi sorkar hmasa hun a NEDP hmanga hmalakna te nen a danglam vak lo bawk. Chutih laiin, sorkar hmasain NEDP leh thil danga project a lo tan tawh te hluihlawn mai lo a enkawl chhunzawm a tum hi a ni a, heng hi SEDP ah chhun luh a ni dawn a. Heng (NEDP leh sorkar hmasa project hrang hrang) enkawl zuina atan hian SEDP-ah Cheng vbc 110 dah a ni nghe nghe.

Chief minister khan a budget speech-ah SEDP atan Cheng vbc 750 dah a nih thu a puang a. He pawisa hmanna tur pawimawh zual a tarlan zingah hian district thar pathum a sorkar inrelbawlna mamawh hrang hranga hman tur Cheng nuai 855 a tel a. SEDP hmanga district pathum bul an tan tur hi sawisel duh tan chuan a sawisel theih ang, a chhan chu ram hnuk khawih tura ruahmanna an siam (SEDP) a sum dah district thar pathumin heti zat an la hek tur hi hriatthiam a har viau a ni. A ram pum huap lo deuh maithei.

SEDP hmanga hmalakna tur langsar dangte chu Health & Family Welfare department hnuaia doctor leh nurse post ruak hnawh khah nan Cheng vbc 50, elementary level (primary & middle school) zirtirtu indaih lohna phuhruk nan Cheng nuai 30, kawng tlabal leh kawng chhia thawm thatna atan Cheng vbc 150, Mizoram Health-Care Scheme a hman tur Cheng vbc 20, Skill development lama hman tur Cheng nuai 500, infiamna hmunhma thuam that a enkawl nan Cheng vbc 10 dah a ni a, SEDP hnuai hna tam zawk hi project anga kalpui tum a ni a, chutianga project hmanga sum hai luhna leh a buaipuina leh a taka hlen chhuahna tur (SEDP normal fund) atan chuan Cheng vbc 300 zet dah a ni bawk. Heng tarlan bak hi SEDP a hman tur Cheng vbc 66 chuang a la awm bawk.

SEDP hi nikum lama inthlan campaign laia a bu a an siam anga an kalpui dawn a nih chuan kumin atanga hma an lak nghal mawlh mawlh a ngai dawn. A chhan chu a huam zau lutuk a, tha thlah lo a an buaipui char char a nih loh chuan hmalakna tur hlawm lian chin ngawt pawh hi kum nga chhung hian an zo hman lo ang tih a hlauhawm. Ram leh hnam kaihhnawih thil - Zofate zawng zawng inzawmkhawm a, rorelna pakhat hnuai awm, ILP kenkawh, Trading Regulation khauh zawk siam chhuah, local bodies tihchak, etc., atanga border trade, good governance siam, etc., te, phaizawl leilet siam, ramngaw siam, industry hmasawnna, thalaite eizawnna siam, zirna kalphung siam that, hmasawnna ruhrel din, Aizawla open stadium lian tak din, sum lakluh tihpun, etc., a huam a. Heng hian hmalakna tur kawng hrang hrang a keng tel zel bawk.

Heng thil hrang hrang kalpui a, tihlawhtling tur hian kan sorkar hian hmalak tak tak a tum ang em? tih zawhna a awm thei. A chhan chu hmalakna beihpui an thlak dawn chuan a taka kalpui dan tur, a indawta hmalakna tur te ruahmanna siam a hun tawh a. Chutiang buaipuitu tur (implementing/core committee) din emaw a duangtu tur pawl siam a la nih loh avang hian ministry leh Hnam run lam pawh hian an kalpui dan tur hi an la chiang lo tlang a nih hmel. Tun hnaia committee peng hrang hrang an din lah kha SEDP hmanga hmala tur an nih leh nih loh a la chiang bawk si lo.

Tunhma atanga MNF kalphung langsar tak pakhat chu chief minister ngaihtuah chhuah leh a ngaih pawimawh chin hi sorkarin nasa takin a kalpui thin hi a ni. Minister leh MLA zinga mi thiam zawkte leh ngaihtuahna seng thinte thiamna hi a uihawm leh viau mai thei. Chubakah, tunhma pawh khan chief minister-in a ngaih pawimawh zawng, sorkar hmalakna lian tak takte pawh hi chik taka sawiho leh relho a ni ngai lo emaw tih tur a ni thin. An sorkar hmasak a BAFFACOS tih te, MIP te pawh kha chief minister bak hre thiam leh hre thuk dang an awm ve lo emaw tih mai tur a nih kha.

Tunhma atangin Mau (Rua a ni mah zawk) chungchang pawh hi mi dangin an sawipui ve vak lo a, an hriatpui loh vang nge CM ngaihtuahna an hriatthiampui phak loh vangin an sawi ve ngam lo zawk. Kawng chhawng siam tihte pawh ani chauh hian a tuipui emaw tih tur a ni. Mi dangin sawi ngai loin, tuipui lo mah se hengte hi sorkar ngaih pawimawh tur chu a ni leh tho ang. Hmalatu tur committee leh mi thiam rawn vak pawh awm loin (tunhma ang khan) CM ngaihtuahna anga an kalpui leh pawp pawp a nih chuan an mualpho thuai mai thei. Chutiang deuh chuan SEDP pawh hi chief minister hian a tum dan leh a ngaihdan a hrual mum a, a taka hmalak dan tur (implementation) an ruahman hma chuan kan bangbo tlang rih a nih hmel.