Tlem lai deuh atang khan Pathianni leh inrinni leh sorkar pisa chawlhni a ka len chhuah chang hian Aizawl kawngpuia sorkar motor veivak ka hmuh te hi chhiar ka ching a. Thla hmasa July-a inrinni vawi khat ka len chhuah tum pawh khan Chanmari atanga Dawrpui Biak in peng thla inkara min tawk zawnga lo tlan zingah sorkar lirthei (officer-ho kawl) sawm ka chhiar a, Bungkawn leh Treasury inkarah pasarih ka chhiar bawk. Chung zingah chuan VIP light vuah pathum ka hmu a, minister car pakhat a tel a, designation plate an phawi fur a, a then chuan chhiar theih loh turin a letling zawngin an vuah a, a ngai ngaia vuah ka hmuh zingah PHE, PWD, Forest, etc., a inziak hlawm. A khalhtu thenkhat chu motor kawltu officer an ni hlawm a, official thil ni lo a lirthei hmang zingah hian hlemhletna leh thil danga hming chhiatna nei lem lo, kohhrana inhmang tak te pawh ka hmu nawk a. A then chuan private car an nei tho tih ka hre chiang bawk. Holiday a officer-ten anmahni pawipanga sorkar motor an lek chhuak thin hi han ngaihtuah chian chuan a mawi lo a, mahni ta ang chiaha lo hman ve ngawt hi thil zahthlak tak a ni. Sorkar motor kawl thenkhat chuan naupang school kal hruaina atan te, chhiat ni/that ni a kalna atan te, bazar-na leh fehna atan te inthlahrung miah loin an hmang mawlh mawlh a, an faten lenna atana an hmansak pawh an awm a, zinna atan hiala hmang pawh an awm thin, inthiam lohna an neih lem loh vang hi a ni maithei mipui lah hian kan thlir liam mai mai bawk a. Mizoram sorkar hian sorkar lirthei hman leh enkawl dan mumal tak a neih leh neih loh ka hre chiah lo na a officer leh minister-ten an car dawn hi an duh duha an chei bawl tur ni loin official duty atan chauha hman tur a ni a, a man chawia hman (Hire) pawh a rem lo. Mahni pawipang ilo sorkar lirthei hman a nih chuan dan bawhchhiatna a tling a, chu officer chu pa fel tak pawh nise corruption langsar tak chu a ni hrim hrim. Chubakah, leiba ngah tak sorkar kan neih mek avangin sum (Mipui sum) renchem a tul tak zet a, chuvang tal pawh chuan hna pawimawh atan lo chuan sorkar motor tihchet loh hram hi a tul a ni. Mizoram sorkar officer-ten lirthei an lawm zia an sawi hi ka hre fo a, a dik loh ka ring lem lo. MNF sorkar lai khan sum renchemna atan officer motor kawl thei tur chin siamthat a ni a, sorkar motor 534 zet hralh a ni a, 'privatization of government vehicles' an ti nghe nghe a ni kha. 'Privatization' hming han puttir atan em chuan a awm ang lo deuhin ka hre thin a, motor hlui tlawm taka hralh (sell-off) tih mai zawk awm ka ti deuh thin. Khami tum pawh khan zep thu a awm lo a, sorkar officer thenkhat lirthei dawng tawh lo turte khan an lirthei kawl laite kha sorkar sum tam tak sengin an chei thattir a, khatih laia officer pakhatin, 'Gypsy soft top te pawh hard top ah an let a, a kawngkharte an thlak a, rawng an kah thattir vek bawk,' a tih kha ka la hre reng. Officer tam takin an mortor kawl lai an duh ang thal a an chei that chu man tlawm te (Book value) in an khul a, sorkarin driver a rawih sak a, POL man thlengin a tumsak chhunzawm a nih kha. Kan ram hruaitu MLA rualte hlei hlei hian lirthei an lawm emaw tih tur a ni. Anmahni hamthatna tur dan 'The Mizoram Salaries, Allowances and Pension of Member of the Legislative Assembly Act' an siam a, chutah chuan MLA nih hrim hrim vanga nihlawhna leh hamthatna chi hrang hrang zing an in siam teuh a, chu dan hmang chuan car leina tur pawisa an dawng thin bawk. Kumin hian Cheng nuai 6 sing 5 ah an tisang nghe nghe. MLA zingah hian mahni a lirthei nei sa lo an awm lo ang, a then phei chuan pahnih aia tam te pawh an nei hlawm. Inthlan dawna tuna MLA-ten ECI hnena an hausakna leh an thil neih an puan zar (Asset declaration) atang phei kha chuan kan ram hruaitute hi mi hausa tak tak vek an ni hlawm. Chuvangin, sum harsatna manganthlak tak kan tawh mek lai a ni bawk si a, he hamthatna (Car advance) MLA nih vanga an dawn thin hi mipui hmangaihna vang leh sum renchem duhna vanga hnawl ngam an awm mai te kha kan lo beisei maithei a, mahse, kan beisei sual hle a lo ni. Speaker, Dy. Speaker, Minister-hote phei hi chuan anmahni ta tur car an dawn bakah hian sorkar motor an duh tawkin an hmang thei lehnghal. Lirthei an lawm em vang hi ni tur a ni kan pute ho hian mipui phun thawm pawisa miah lo a car thar an lei leh tak deuh deuh hi. Car thar Cheng nuai 341.50 zet seng a an lei ngawt mai hi nakin thlenga mak kan tih reng tur a ni ang. A chhan pakhatna ah chuan kan pute ho hian car thar an mamawh lo, tuna an hman laite hi hluihlawn ngai khawpa chhia a ni hlawm mawlh lo. Khawpui chhung kawng thaah an tlan tam deuh ber bawk si a, sum tam tak senga a thar lei hi a la hun lo. Pahnihnaah chuan tuna sorkar sum dinhmun han en hian ram hruaitu lu berte hi chuan tul lo a sum hman hi an hreh em em tur ni awm tak a ni a. Inrenchem chungchang te, chhiah lak a tul thute an sawi fo laia chhuanlam tur mumal nei hawt lo a, 'A tul a kan lei' min tih khum mai kha chu a zialo tak zet. 'Sum harsatna vangin kan lei leh lo mai ang' ti ta zawk se la chuan mipui hian kan state sum dinhmun siam thatna atan chhiah chawi pawh kan hreh lo zual sawt ngei ang maw le. Mahse, an thu a ni a, an lei lui ta tho chu a ni a, mipui rilru erawh a hmin lo hle tih a hriat a, kan ram hruaitute hian sum harsatna an sawi fo thin hi an vei thlawt lo a, leiba a pun zel chhan te pawh hi an vei tawk loh vang leh inrenchem aia nawmsak an duh vangah an ngai ta niin a lang. An khawsak nawmsakna thilah te hian insum ngam se le chuan kan leiba pawh hi a tlahniam sawt ngei ang tih hi mi tam tak ngaihdan a ni a, ram hruaituten chhiah lak an ngaih pawimawh chhan pawh hi ram hnuk khawih thil atana hman tur leh leiba rulhna tur ni loin an hamthatna leh an duh zawng thil atana sum an mamawh vangah an ring mai ang tih pawh a hlauhawm dawn alawm le.