Sorkar laipuiin India ram sum leh pai lama inrelbawl dan kalphung a tidanglam mek a, finance commission-in a rawt angin state pachhe zualte (special category states) hamthatna dawn thin pawh tihtawp a tum tak avangin hmarchhak a chief minister-te an lawm lo hle a. Tun thla (May) laihawl khan hmarchhak state pasarih leh Sikkim chief minister-ten a huho a thuchhuah siamin state hnufual zawkte hamthatna tur (special category status) tihtawp tuma sorkar laipui hmalakna reng reng dodal an tum thu an puang. Special category status hi tihtawp a nih chuan sorkar laipui atanga hmarchhak state-ten sum an dawn thin tam tak a bo dawn tihna a ni a. Chu chuan harsatna nasa tak a thlen ngei dawnin a lang. Chief minister-te hian an thutlukna siam hi prime minister Narendra Modi hnenah an thawn nghal a. Hetia thuchhuah intawm an siam bakah hian chief minister thenkhatte hi chu na takin an tawng a, sorkar laipui an nawr zui bawk. Hmarchhakah hian BJP sorkarna state a awm lo a - Nangaland-ah NPF (BJP telna) an sorkar mek a, Assam, Arunachal Pradesh, Mizoram, Manipur leh Meghalaya te hi congress sorkarna a ni hlawm a, Tripura-ah CPM an sorkar a, Sikkim-ah SDF an sorkar bawk. Special category status-ah hian tun dinhmunah state sawmpakhat an awm a, hengte hi state hnufual bik, sorkar laipuiin a bika a puih ngaite an ni a. Hmarchhak state pasarih leh Sikkim bakah Himachal Pradesh, Jammu & Kashmir leh Uttarakhand te hi chutiang dinhmunah chuan an awm mek a ni. A tirah chuan Assam, Jammu & Kashmir leh Nagaland te hi dah an ni phawt a. Chu chu kum 1969 kha a ni a, Fifth Finance Commission-in heng state pathumte hi an hnufual bik avanga leh harsatna an tawh avangin a bika tanpuina pek a rawt a. Chumi hnuah hun a lokal zel a, state dang pariat dah belh leh an ni ta a. Tichuan tunah hian vohbik (special category) state chu sawmpakhat an ni mek a ni. Sorkar laipuiin special category state-te sum hman tur a pek dan hi 'Gadgil formula' an ti a, five year plan palina atanga hman tan a ni a, he formula duang chhuaktu Dr. D. R. Gadgil hi chutihlaia deputy chairman, planning commission chu a ni nghe nghe a. Chumi hnuah he formula hi siam danglam a ni a, kum zabi thar (2000-ah) pawh khan ennawn leh a ni a. Chumi tum chuan tanpuina pekna tehfung atan hian state hnathawh dan (‘performance’ by the respective states) tih chu telh a ni. Special category state-te hnena sum pekna atana tehfung (Gadgil formula)-ah chuan mihring tam lam te, mi pakhat sum thawhchhuah zat te, chhiah lak zat leh sum hman dan te leh state-in harsatna an tawh mek te an hmang thin. A tawi zawngin sawi ta ila, sorkar laipuiin heng tehfung (Gadgil formula) hmang hian special category state-te hi pawisa a pek belh thin a. Mahse, chu chu tihtawp a tum ta a, chu chuan state pachhe zualte tan hian harsatna nasa tak a thleng thei a, a hmaa an dawn thin tanpuina a awm tak lohah chuan kawng dang dap an ngai dawn tihna a ni ang. Awlsam taka sawi dawn chuan sorkar laipui atanga special category state-te sum hmuh thin dan chu 90:10 ratio a ni a, sorkar laipuiin 90% a tum laiin state sorkarin 10% a tum ve thin. Kan hriat dan tlanglawnah chuan kan state budget a sum mamawh zawng zawng za zela 90 hi sorkar laipui atanga dawn a ni a, chu'ng chu sorkar laipui nena chhiah intawm kan lak atang te leh thil dang atanga dawn thin a ni. Za zela 10 chu kan thawhchhuah ve tura ngaih a ni a, mahse, hei pawh hi hmarchhak state-te hian kan tlin meuh thin lo. Chutiang dinhmun a ding tan chuan special category status tihtawp tumna hi a nghahhlelhawm lo khawp ang. A bik takin sum hnar dang dap ngaihna hre vak lo kan sorkar ang chi tan phei hi chuan a huphurhawm zual awm e. Hmarchhak state hrang hrang hruaituten thawm an neih mek lai hian sorkar laipui chuan a bika hamthatna an dawn thin hi sorkar laipui tih tawp ni loin 14th Finance Commission-in tihtawp tura a rawt vang niin an sawi thung. NDA sorkarin kum khat a tlin hma lawk May 23, 2015 khan union finance minister Arun Jaitley chuan special category state te hamthatna titawptu chu sorkar laipui ni loin 14th finance commission zawk hi a nih thu a sawi a. Chutiang chiah chuan minister of state for finance, Jayant Sinha pawhin tunhnai mai khan a sawi bawk. A nihna takah chuan Modi-a sorkar hian state-te thuneihna sang zawk pek a tum a, sorkar laipui rinchhan lo a kal tum turin a fuih tan mek a. Chutiang a nih avang chuan sorkar laipui tanpuinaa innghat hlawm tawp state pachhe zualho pawh hian chu kalphung thar chu zui ve se a duh tihna a ni ber. Chu chu finance commission 14-na report-ah khan a lo lang chiang ta reng a, hmasawnna tura hmalak dan thiam deuh leh a ngaihna hre deuh, hnathawh tak tak tum state sorkar tan an inhawng viau ni pawhin a lang. 14th FC in a rawt angin chhiah lakkhawm atanga state sorkarte chan ve tur nasa takin tihpun a ni a (32% atangin 42% ah) a, state sorkar sum hmuh tur a pung dawn hle a. Heng special category state 11 te hnenah hian sum harsatna an tawh mek phuhrukna atan tanpuina (non-Plan revenue deficit grants) pek an ni dawn bawk. Heng hi kum danga an sum dawn thin nen chuan a inang chiah lo a, kawng hrang hranga harsatna tawk mek state hnufualte tan hian a hnemhnanpui tham kher lo ang. Sorkar laipui rinchhan rei tawh an nih bawk avangin vawikhata thlahthlam thut chu an dawl zo dawn lo tih a lang reng bawk. Chutiang karah chuan hmarchhak bial chief minister-te leh sorkar laipui hi an innawr chho zel dawn niin a lang.