Mihringte hian kan damchhung reiloteah hian lalna te, thuneihna te, thiltihtheihna leh nun nawmna te kan thlahlel theuh a, sum leh pai hian chutiang thilte chu min pe thei dawn emaw kan ti a, kan zawng a, kan bawh huam huam a, sum hmuhna a nih phawt chuan mawi leh mawi lo pawh kan thlu lo a, sum ngainatna bawihah kan intulut thin.

Officer, sum ngainatna bawiha tang tawh vek vek sum ringawt a ngaihtuah a, ei ruk tur a dap a, ei ruk tur menin a meng a, ei ruk tur tamna chu atan post tha a ni mai a, ei tur tur awm mang lohna chu atan post chhia a ni leh mai. A dinhmun a san poh leh, a hna chelh a len zawh poh leh atan eirukna khawng a in hawng zau ting a ni mai. Chutiang mi, a ngaihtuahna leh suangtuahna vir vel zawng zawng pawh sumin a sal beh tawh chuan a ei rukna kawng daltu chu a thuneihna hmangin a thian fai mai thin. A hlawh phu loin a in leh lo a thang lian tual tual a, in pakhat a sa zo a, a dang a sa leh a, in mai duh tawk loin mi vangtlang in aia tha leh mawiin thlam changkang tak a sa leh a, a thlam nuam takah chuan zu leh sa nen a han in tawllen vei thin a, a hlim chuang lem hlei lo va.

Sumdawng pawh nise, sum ngainatna bawiha tlu lut tawh vek vek chuan hlep ringawt a ngaihtuah tawh a, Silchar kawng a pin dek tawh chuan a bungraw neih sa chu a chheprelh hreh lo a, a van hunah man to taka hralh leh atan a vauchher thin a ni. Hlep a that phawt chuan engmah tih hreh a nei lo a, zawrh hreh a nei hek lo. Dan kalha sumdawnna pawh nise hlep a that a, thamna hmanga check gate a paltlang theih chhung chu atan danin awmzia a nei lo a, suma a tham lungawi theih mihring chu atan thian tha an ni mai a, a tham theih loh mihring chu atan hmelma an ni leh mai. Chi leh kuang, mihring inlaichinnaa a lamhnaite chuan a nunah hmun an chang lo a, hlawkna uchuak taka a sumdawn pui theih, a sangawi zawnpuite chu a lamhnai ber berte an ni tawh thin.

Ram hruaituin sum a ngainat viau a, ram siam tumna aia hausak tumnain a rilruah hmun a luah thuk zawk tawh chuan ram ropui thlen a har ngawt ta ve ang. ‘A fim hmasa Lalngovi’n thal zo zel e’ tih ang maia sum tling hmasa apiang ram hruaitute leh an vua leh vangten an thal hmasak zel chuan mipui chu dangro dang charin kan hawihil reng mai dawn a ni. Ram hruaitute ber an thau kung kung a, an hausakna a pun thur thur a, an in leh lo a than uak uak chuan ram inrelbawlnaah thil fel lo a awm tihna a ni mai. Ram hruaitu tha, mahni nawmna aia ram hmasawnna dah hmasatute chu an hausa thur thur ngai lo.

Retheih hi a hrehawm a, mahni inhmuh hniam a awl a, rilru tha lo put mai pawh a awl thin. Chutihrualin uchuak taka hausak a, dik lo taka sum lak luh ruih ruih a, dam chhunga hman zawh sen loh tur sum leh pai neih tun hi engnge a sawtna awm chuang le? Sum leh pai hi ngah viau pawh ni ila hlim pui vak dan a awm chuang lo. Nuamtawlna khawpui Las Vegas-ah meuh pawh bar-ah an kal a, zu an in a, hmeichhe lam lai an thir a, pawisa an khel a, a baka intihhlim dan teh vak an hre chuang lo. Mizorama kan mi hausate pawhin thlam changkang tak an sa a, an picnic leh ringawt a, a bak nawmchen dan vak an hre chuang bik lo. An nupuiten rangkachak thi leh zungbun an ngah hle ringawt a ni mai. 

India rama pa hausa tawntaw, Mukhesh Ambani pawh hian sum hman ngaihna vak a hre chuang lo. A fanu pasal neih tuma invitation card a siamtir chu pakhat pawh cheng nuai khat man a ni a, Mumbai-a a chenna in chu khawvela chenna in man to ber a ni a, car 168 dah theihna a ni. Chutianga in ropui uchuakah chuan bungraw tha pui pui leh car man to pui puiin hual khup mah se a chang chuan a ipik ve hluah hluah mai thei. Tum khat chu Aizawla sumdawng pa hausa inah kan leng lut teh mial a, chu pa hausa chuan, “Ka sumdawnna hi hlawk viau mah se kumpui lingleta sum ringawt ngaihtuaha hun hman hi a chang chuan ka ning thin. Thingtlang hmun fianrial takah sangha dil nei ila, inthiar fihlim daihte ka châk thin,” a ti ve tho mai. 

Khawvelah hian hausak tumin nasa takin bei ila, Mizoram mai ni lo, India rama hausa ber pawh ni ila, mihring piang tawh zinga hausa ber Solomona hausakna ne pawh kan ek kher lo ang. Solomona hausakzia chu, ni tin ruai a theh a, ni tin bawngpa 30, beram 100 leh ramsa chi tinreng a talh thei nia. Temple a han sate chu a hneh rem rem khawp a, head mistiri ringawt pawh 3,600 a ruai a, rangkachak hman sen loh a nei a, tangkaruate lek phei chu lung ang maiin a let rem rum mai a ni. Nupui 700 leh hmei 300 a nei a, a mit it zawng apiang a hlah lo leh nghal. Khawvel nawmchenna zawng zawng hi Solomona hian a ti kim hial mai thei. Chuti khawpa hausa tawntaw, duh duh nei thei, it zawng apiang hlah lotu chuan nun hi thlahlel a, thihte pawh hlau hliah hliah awm a nih vei nen, “Nun hi ka hua a, ni hnuaia thil reng reng hi min tilungngaitu vek a ni,” a ti tawp mai a ni.

Hausakna zawng zawng neitu mah chuti taka a lungngaih chuan dik lo leh hlemhle taka kan sum lak luhte hi min tilungngaitu, Seol thlan thima min hnuk luttu a va ni dawn chiang em! Mi pamham chu pamham zel se, an sum bawm chu lo pung thur thur se, an hausakna a pun nasat poh leh an lu chungah meiling an chhekkhawl nasa ting a ni  si a.