Kar kalta Ningani khan thawnthu ziak thiam C Lalnunchanga (Taitea) hoin zirlai te nen inkawmhona hun kan hmang a, zirlai te’n an duh duh lam hawiin zawhna an zawt a, ani’n tha takin a chhang zel a, hun hlimawm tak kan hmang niin kan inhria a, Taitea chungah pawh kan lawm hle a ni. C Lalnunchanga (Taitea) hi zofate zinga thawnthu (novel) ziak thiam ber a nih em loh pawhin a thiam ber pawl chu a ni ngei ang.

Mi thenkhat chuan thawnthu hi phuahchawp a nih avangin an dah hniam a, ho an ti a, chhiar pawh an chhiar ngai lo. Mahse, chutiang chu a ni ngawt lo. Thawnthu hi mahni duh dan dana ziah ngawt chi a ni lo a, behchhan (setting) mumal tak neia ziah a ni thin. Chuvangin thawnthu (novel) tha chuan a hun lai boruak a pho lang tha hle thin reng a ni. Entir nan, thangtharte, a bikin kum 2000 hnu lama piang te chuan Mizoram buai laia kan ram hun tawng rapthlak ziak te, kan pi leh pu, kan nu leh pa te tawrhna nasat zia te, khaw tam tak hal leh sawikhawm a nih avanga an tawrhna rapthlak tak te, pawi sawi lo mi tam takin sipai laka nunna an chan dan thu lungchhiatthlak tak te kha suangtuah ngaihna pawh kan hre tawh lo hial ang. Amaherawhchu, C Lalnunchanga thawnthu (Ruamrai thuruk) atang te, Zikpuii pa thawnthu (Nunna kawng thuampuiah) atang te, Lalhmingliana Saiawi thawnthu (Lungrang Hmangaihna) atang te hian rambuai laia mizo te tawrhna rapthlak tak chu fiah takin kan hmu thei a ni.

C Lalnunchanga thawnthu pakhat, ‘Pasalthate Ni Hnuhnung’ tih phei hi chu a ngaihnawmin belhchian a dawl tak zet a, ‘Book of the Year’ a an thlang pawh hi a awm hliah hliah mai. He thawnthu atang hian kan pi leh pute huaisen zia te, mi huaisen, sa leh ral laka khawtlang humhimtu pasaltha huaisen an ngaihsan zia te, indo mi an nihna leh ralrel an thiam zia te, hnahthel tlak dan atang ringawt pawha ram awm dan leh mual dung inkhawh dan an ngaihruat thiam dan te, lalte thuneihna leh khawtlang inawp dan fel tak te, nula leh tlangval inrim dan leh hnathawka an in lawm ho dial dial dan te kan hmu thei a ni. Kumpinu sawrkar khan mizo te min awp bet tur khan a ti mai mai lo a, thapui an thawh hle a ni tih he thawnthu atang hian kan hmu thei bawk ang.

Tin, thawnthu (novel) ziah hi a harsa a, thawnthu tha tak ziak tur phei chuan namen loa inbuatsaih a ngai ngei ang. C Lalnunchanga pawh hian he thawnthu ziak tur hian nasa takin a bei a, ‘Pasaltha te ni hnuhnung’ hi kum 1994 atangin a thawnthu ruangam a duang tan a, theihtawp chhuahin a chak (material) a dap khawm a, research a bei a, kum riat hnuah a khawr pum thei chauh a ni. A chhuah (publish) tak phei chu a ziah atanga kum 14 naah a ni dawrh mai. A thawnthu ropui tak pakhat, ‘Kawlkil piah lamtluang’ tih pawh kha kum 10 chhung teh meuha a ziah a ni a, hei pawh hi lehkhabu dangdai tak leh ngaihnawm tak a ni. ‘Book of the Year’ a an thlang pawh hi a awm hliah hliah mai.

‘Pasalthate ni hnuhnung’ tih thawnthu hi Taitea hian ram leh hnam hmangaihna rilru pua a ziah a ni a, ram leh hnam a hmangaihna thinlung chuan he thawnthu ropui tak ziak tur hian a tur lui a ni pawh kan ti thei ang. He thawnthu ziah duhna thinlung a neih tanna pawh kum 1994 a Gospel Centenary kan lawm tuma Lammuala drama changtute chuan kan pi leh pute chu vai run an chin lai leh Mary Winchester an man lai vel chuan hnam mawl tak, zawng u awrhah an chhuah a, chutih laiin sap ho chu hnam fing chungchuang, pathian tenau ang hial leh deh loh sakei huai ang riakah an chhuah thung a; Chu chuan Taitea rilru a ti na a, he thawnthu ziah duhna thinlung hi a put phah ta a ni. “Keimahni kan inphochhuah dan hian thangtharte leh hnam dang te min hmuh dan turah kawng ro a su thui hle si a, chuvangin, kan pipute kha an khawsak hniam hle mahse hnam changkanglo leh dawihzep an ni lo tih hi thangthar zel te hriat tura ziaka dah hi tulin ka hre ve tlat a ni” a ti reng a ni.

British in India ram min awp lai khan kan thluak an su nasa a, Indian ho lakah khan hnam ropui tak (superior race) angin an inlantir lui tlat a, Indian te chu hmakhawsang ata hnam changkang lo tak angin an lantir lui tlat a, India rama hmasawnna thil thar zawng zawng pawh British ho vanga lo awmah an puh lui tlat thin. British in khatiang thil an tih chhan kha eng dang vang ni lovin, Indian ho khan an mahni leh an mahni kha in hmusit se, in ngainep se, in zahpui se, an hnam thil (culture leh tradition) te chu hmu hniam hliah hliah se, sap ho erawh ngaisang hliah hliah se an duh vang a ni. An thil tumah khan sap ho kha an hlawhtling thawkhat viau a, rei tak India ram an awm bet thei ta reng a ni. 

Amaherawhchu, kum zabi 19 leh zabi 20 na tir lamah ram hmangaihtu tak tak (nationalists) te an lo chhuak a, chung ho chuan hmakhawsang ata tawh India ram ropui zia te, Akbar-a ropui zia te, Mauryan lal ram ropui zia te, khawvela civilization upa ber pawh Indus Valley Civilization a nih zia te, kan culture san zia te, India ram chu khawvela sakhaw ropui tak tak pianchhuahna ram a nih zia te, puk leh ramhnuai vela sap ho an khawsak mai mai laiin India ramah chuan zirna in sang tak tak (Nalanda, Taxila University etc.) kan lo neih tawh dan te an rawn tlangau pui a, chu chuan Indian thinlung mu hnu chu a kai harh thar leh a, mahni inzahna (self-esteem) leh inrintawkna (self-confidence) an lo nei thar leh a, chu chuan chakna thar a pe a, zalenna sual turin an lo harh thar leh ta a ni. Taitea thawnthu pawh hi chutiang chiah chu a ni. Kan thinlung chhungrila mizona rilru, tlawmngaihna, huaisenna, tawrhchhelna leh mizo nun ze mawi tak, sap leh Korean culture ngaihsanna thlipuiin a nuai mek hi a thu ziak hmang hian kaih harh leh a tum a, he zoram khawvelah hian hnam ropui tak, tu hnam dang mah ngaisang a, hmusit chuang lo tur hnam ropui din a duh a ni.

C Lalnunchanga (Taitea) thu leh hla hian ram leh hnam hmangaihna rilru min put thar tir se, kan hman zia rang, kan tawng, kan sakhua leh mizo hnama bet thil tha zawng zawng hi hmangaih thar leh ila, thangthar te hian Nghalthianga thinlung paukhauh ang kha pu thar leh ila, Puilura ang maiin kan rilru hi nghet chuah mai se, tu hnam mah hi a loa luatin ngaisang lo ila, mahni indahhniam hek lo ila, mahni inrintawkna nen khawvel hi hmachhawn ila, chu chu Taitea duhthusam, thu ziak hmanga tih hlawhtlin a tum pawh a ni ngei ang.