Dr Hrekima Titi

TAP CHUNGIN

Dr. C. Lalhrekima - Aug 11, 2019

TAP CHUNGIN

Tleirawl pakhat chu lehkha a thiam theih avangin science laktir a ni. A nu leh pain doctor ni se an duh avangin NEET an exam-tir a, doctor zirna tur a hmu ngei dawn si. A mangang ta a, a mittui a tla a, rilru doctor a pan tawp nia! Doctor a zir peih lo alawm. Literature lam luhchilh a, zirtir hna thawh a châk zawk asin!

Mi thenkhatin an châk em em kha a chak ve lo. Mahse a luhchilh dawn ta tlat si. Nu leh pa thuawih loh a hreh si alawm.

A nu leh pa a sawipui ngam thlawt lo. A dawihzep reuh em vang a ni ngawt lo. A nep hni hne em vang a ni ngawt lo. A va sawipui turte hi a hlau em a ni. An duh ang bak engmah an ngaithla duh ngai lo. An fanu chu doctor a ni tur a ni tawp mai. A nu leh pa chu biaksak hial ka duh a. Mahse, tap chungin a lu a thing a, a chunga an tuan leh dan tur a ngai ngam lo.

Nu leh pa thu a awih theihna ka ngaihsanzia ka hrilh a. Tihtheih dang a awm miau si loh avangin doctor chu zir phawt mai turin ka fuih a. Nu leh pa thuawih chu malsawm dawnna a nih thu ka sawi nawn a. A tira tui vak loh thil pawh hi han luhchilh hnuah a tui zui theih thu ka hrilh bawk a. Pathian tih chunga nun hmang turin kan inchah a. Tap chungin kan inthlah ta kha a nia. Engtin tak awm ta zel maw?

Lehkha thiam theih avanga ‘doctor ni rawh’ intih ngawt maite hi a fuh ber em? Doctor zir tura lut ve thlap; mahse, tui thlawt loa bânsan leh taa hna dang tha tak thawk tate ka hria a. Doctor zir hlawhchham, kawng danga hlawhtling ta em em site an awm bawk. Doctor zir zo thlap, thawk leh peih si lo te, an hming bulah pawh Dr. tih dah duh hauh lo khawp hialte pawh an awm mahna!

Dam chhunga kan thawh tawh tur hna hi uluk taka ngaihtuah a ngai. Zing atanga zan thleng, darkar tin, ni tin, kar tin, kum tina kan thawh tur leh kan nih tur hi mahni tuina ngei nise a nuam bik. Aikal la duh hauh lo tur khawpa tui chilh theih hna, hlim taka thawh theih tur hi zawn a fuh. A hlawh vang leh a sum lama hlawkna chauh en miah loa khawiah pawh nui chunga kan thawh peih tur hna thlan hi a tha. Tap chunga hnathawhte hi a hahthlak em asin.

Lehkha thiam thei tan zir tur leh thawh tur a tam. Tui taka zir theih, hlim taka thawh theih tur ngei luhchilh hi a pawimawh ber chu a ni e.

Nu leh pa thuawiha tap chunga doctor zir tum tleirawl hian tuipui ngei se ka va ti em! A nih loh chuan engmah sawipui ngam loh khawpa hlauhawm nu leh pate kha an tap ve palh ang e!! Tap chungin an tan ang a, tap chungin an zo ang tih a hlauhawm.

Share now