Khatia Taylor Swift-i chanchin ka’n sawi tak tak kha—a tàwp lamah khán “a chawlhkár leha sawi chhunzawm” ka intiam zet a; ka sawi chhunzawm leh si lo a nih kha! Min rawn haua min rawn sël titihtu kha—kei akár ka’n ngah ve roh khawp a! Khíta ka U Marema te, Làmchhip lam lama ka nau “Englo-i” te, kan ZALEN hotute zínga mi fanute nèn lam khán in rawn chiar a, min rawn chuk tuk tuk hlawm a—in thiamawm e; kei ka demawm thung!

A dik a dik chuan, TS-i hla “lolm” ber kher hi chu, sawi fiah emaw, sawi zau emaw hi—thawh thuta pulpita sermon thlâk thut tùra innawr tluk zeta ka thil huphurh a ni. A hla thu hi har hi ka tia! Tehkhin thu (metaphor) mawi, ril fán raihin a zam chhuak chiat a. A tìrah nuam ti deuh leh rilru dam dapin min awmtír veng veng phawt a; a thunawn tlar tàwp lam atangin min chaih buai tan a; a tàwpah phei chuan, min “Pi-chhe mur”-tír hlauh a! Hla bumhmang a ni a; keia sawi fiah thiam zawh rual loha love song ropui leh un, ngaihtlâk liam satliaha mawi zet si a ni. Eng pawh ni se, i’n sawi chho dáwn poh ang hmiang. Tum khata sawi zawh chi erawh a ni dáwn lo a nia aw…

Chang khatna … kan sawi hmain

Swift-i album duhawm leh hit, “The Tortured Poets Department (TTPD)”-a hla dangdai leh “A va TS-i lo e!” tih theih tùr chu, he “lolm” hi niin ka hria. Kha album, khati fakauha Swifties zíngah leh non-Swifties zíng pawha a’n tlâk nat tâkah khán ka ngaithla ve a; he hla bîk hi dang ka ti zar mai! A TS-i loh êm êmna chhan ber pakhat chu, làm leh sûkpui a rem ve hlawl lo! Concert-naa side dancer mamawh lo ber hla a ni ang.

Piano-in rimawi a tluan parh a. Mawng han tih sawi bâwih bâwihna tùr pawh, a hla thlûkah a zep eih lo! A thlûk a muang fánin lairil a ti dam sawng sawng thei a; mahse, a hla thu thung chuan mi a chaih buaiin mi a bum chiang êm êm mai si! Chu chu TS-i themthiamna, artist dik tak a nihna a ni.

Cháng khatna kan tan hmain—a hmaa kan lo sawi tawh—bialpa hluite hla phuahsak hrât Taylor-i hian, “loml” hla hi a bialpa hlui zínga a kawp rei ber (kum ruk chhúng a zui) Joe Alwyn nèna an inthen hnu (April 2023), a thla leh maia a a nunna rawn lang leh nghâl chat, The 1975 lead singer, thla khat chhúng vêl lek a kawp, Swifties hoin an duh lohpui êm êm, Matty Healy tána a phuah a ni tih, Taylor-i chanchin ngaihven îk tán chuan hai theih a ni lo.

Cháng 1-naah lût ang

A bul tan nán hian a’n thlep ném khawp a: “Khatia muang fán raiha kan làm dun thin dàna mawng min dawmsak paha hmangaihna mei kan chhit nun dun thin lai te kha—kan làm dàn step te kha a la ngai vek a nih hi ti raw? Kan thiam bel sa a ni miau a; tu’n nge maw min dâla min dang chuang ang le?” tiin bul a’n tan a. A va hmangaih hmèl tak! Who's gonna stop us from waltzing / Back into rekindled flames? / If we know the steps anyway / We embroidered the memories / Of the time I was away / Stitching, 'We were just kids babe” tih Sap tawng mawi bîk hmang zuiin an pan lai nun duhawm a’n chham zui a ni. Love song duhawm a la ni rih.

Thunawn 1-na

A thunawn hmasa zâwk hi Taylor Swift-in Matty Healy a tawn tan tirh laia a phùrna, a hlimna vàwrtàwp leh an hma hun atána beiseina ëng tak leh sáng tak a neih dàn, run taka a sawi chhuahna nia ngaih theih a ni—a tìr lam hi chu!

“I felt aglow like this / Never before and never since,” tiin “Khatiang rënga hlimna leh lungawina vànga hmél èn phét phétna (aglow) kha ka la tawng ngai lo a; tûn hnuah pawh a thleng leh tawh ngai hek lo!” a ti.

Taylor Swift hian Joe Alwyn nèn kum ruk chhúng an inzui hnu khán, ipikna leh khawharnain a nun a rún zui a. Chutih lai tak maia a nuna Matty rawn lang thut khân a ipikna a chhém kiansak vek a; hlim leh lungawi takin a awm a ni—rih-ina!

“Inmelh zawk pawha thil awmzia i hriat thiam nghâl chat chuan, chu thil chu hriat reng tlâk, thil ropui tàwp a ni ang,” (If you know it in one glimpse, it’s legendary) a ti a. A chhan chu, an pahnih hian 2014 khán an lo inhre daih tawh a; an lo “ni” ve zuk tawh. April 2023-a an intawn leh khán, sawi buai leh mi dang “tihpui” ngai miah loin, intawn ruala thawnthu ropui ni nghâl tawp tùr ang maiin “nun” an tanah a ngai a; he hlaah hian a chham chhuak nia ngaih theih a ni. 

“Ti khán—fawh khat lek atang pawh khán, inneih hial kan sawi dùn nghâl ta mai a nih kha,” (You and I go from one kiss to gettin' married) a ti a. Joe Alwyn nèn inzui fé mah se, hlimna tluantling a thlen zo si lo; Matty nèn erawh chuan, an intawn tirh phat atangin inneiha dinhmun sawh nghet nghâl inbeiseina sáng tak an neih nghâl thu a sawi a ni.

“Still alive, killing time at the cemetery / Never quite buried”: He metaphor mawi tak hi sawi fiah thiam harsa ka ti ngang mai! “Thlànmualah khán nung reng siin kan inphúm a; thi si lo khán—mahse, kan inphúm hlen lo hlauh a,” a tiha thlànmual a hmanna ni theia lang chu, kum 2014-a an inthen zet tawhna kha a ni thei ang. An inkár kha thihna hmuna awm ang maiin a chan a ni ber a. Eng mah thleng tawh lo tùra ngaih a duh laiin, a thinlung chhúng rilah chuan a lo la thi hlen tak tak si lo a…

“In your suit and tie, in the nick of time” tiin, “Suit leh tie nèn, Khuanu hun ruatah tak i rawn inlár ta hlauh a le!” a tih hi, Joe Alwyn nèna an inthen hlim; a rilru na leh khawhar lutuk lai tak maia Matty Healy—nungchang mawi leh inringtâwk tak maia a nuna a rawn petek luh thu a sawina a ni a. Mahse,  a dawt chiahah mipa mize pahnih pu angin Matty hi a rawn chhuah zui leh si! (You lowdown boy, you stand up guy)

Chuti chung chuan, chu mipa chuan (ti tawh mai ang aw), a nun a hneh a; a thu sawi engkim a ngaihlu a, a ring tâwk êm êm mai a—“Holy Ghost” tiin Thlarau Thianghlim ang hiala thianghlima sawiin a thu sawite chuan a nun a hneh zo a! “Holy Ghost, you told me I’m / The love of your life” tiin, a dam chhúnga a hmangaih ber a nih thu, vawi duai lo a hrilh chamchí mai a ni.

Cháng 2-na

He chángah hian TS-i hian na mangkhêngin Matty Healy-a phakarzia leh an inkár thu chu dâwt (scam) mai a lo nihzia a rawn puang chhuak ta phiar phiar mai le!

He pa hian a hmaa a thu lo sawi tawh thin te, a tiam thu sawi fo te leh tawngkam mawi vawi tam a lo chhâk chhuah tawh thin chuan Taylor-i rilru chu a ti na ta tlat mai le! Uangthuang miah loa vawi tam biah thu a lo hlan thin, amah Taylor-i’n a lo rin ngheh hmak hman kha, a hnuah dâwt leh inphatsanna thu vek a ni tih a hre leh ta tlat si le! 

“Who's gonna tell me the truth / When you blew in with the winds of fate / And told me I reformed you / When your impressionist paintings of Heaven / Turned out to be fakes / Well, you took me to hell, too” tiin, “Khuanu ruat (winds of fate) ang maia ka nuna i rawn luh khán, ‘Mi tharah ka siam che’ tiin thu min hlàn a nih kha! Khatiang khawpa thu mawi, dâwta chantír leh thiam i nih si chuan, a tù hian nge maw thu dik chu min hrilh ta ang le?” tiin a kâp ta phiar phiar mai!

Metaphor “Impressionist painting” a hmang tel a: hei hi, lem ziah/ker (art)—ràl atanga thlìra mawi êm êm; en cheta fel lo leh buaichuar nuai sawina a ni. He tehkhin thu (metaphor) hmang hian, “Kan hma hun tùr i sawi thin chu, vànram ang maia mawi a ni a; mahse, a takah chuan Gehena ang lek, vànram lem (fakes) a lo ni si. Vànram min hmuhpui i tum laiin, hremhmunah zâwk min hruai lut ta a nih ber hi!” a ti a. Suangtuahnaa thil mawi engkima a pêk thin, a lem lo ni vek si chuan, a hma aia ná-in a nun a sawp ta a ni.

“And all at once, the ink bleeds / A con man sells a fool a get-love-quick scheme / But I felt a hole like this / Never before, and ever since” ti zuiin Matty chu “Con man”—mi bum hmang ah a chhuah a. “Get-love-quick scheme” tiin—“kheh puamer”-ho ang maia hausak thutna mi zawrh chíng ang maia chhiain a chhuah ta a nih hi!

“Vawi leh khatah kan inkár thawnthu kan ziah dunna lehkha tui chu a rawn pherh zo ta vek a! Mi bum hmang khân hmeichhe ä leh bum sam ka nihzia min hriattír ta si a nih hi!” tiin tláwm a inti vawng vawng ta mai a. “Ka thinlung hi hetiang khawpa nêp, nawi leh kawrawnga a awm ka la hre ngai lo! Tin, ka awm leh tawh ngai bawk hek lo ang!” a ti chhuak ta hial a ni!

A hmain, “hetiang khawpa hlimna hi ka la tawng ngai lo,” a lo ti tawh a; mahse, khati khawpa hlimna a tawn sàn avàng khán, a tlâkna pawh a sáng leh si a ni ber mai!

Thunawn 2-na

“If you know it in one glimpse / It’s legendary / What we thought was for all time / Was momentary” a rawn ti leh a; a thunawn hmasa a thu sawi ngai tho kha a rawn sawi nawn la nâ a, a key erawh a dang ta daih mai!

“Mit sìr zeuh pawh thil ropuia chantírtua ka lo ngaih reng thin (for all time) kha, thil rei lo te chhung (momentary) sawina chauh a lo nih hi!” a ti ta daih! “Still alive, killing time at the cemetery / Never quite buried” a ti leh pawh hi, a thunawn hmasa nèn khán a thu chu a la inang reng tho a; mahse, a awmze dik tak chu a inpersan daih tawh! 
    
“You cinephile in black and white / All those plot twists and dynamite” a tih chhunzawm a. “Cinephile” tih awmzia chu movie/film ngaina tak leh film siam dàn chungcháng pawh hre ve tak sawina a ni. Taylor-i’n he metaphor a hmanna chhan ber pakhat chu, amah Matty Healy khân film leh art/aesthetic a ngaina hle a; a mize tak tak, a M.O. (mode of operation) rawn sawi chhuah kher a duh vàng a ni ang a… a tih theih.  TS-i hian Matty-a mizia a’n thlír lêt a: an inkár kha lemchan (film)-a “plot twists” ang lekfang a lo nih zâwk thu a sawi chhuak ta a ni.

“Nang zawng, film hlui (black and white/classic) ngaina êm êm mi (cinephile) i nih ang chiahin, a tak takah pawh dâwt sawia lemchan thiam lutuk i ni bawk a. Kan inkár pawh, i duh leh duan ang ngeiin, a thawnthu i her kîkawi kual vêl (plot twist) a lo nih hi!” a ti ta chiah a ni.

Chutah na mangkhèngin Matty chu heti hian a’n address zui kher a—“Mr. Steal Your Girl” tiin. “Mi bialnu rûksak chíng pa, chuta la tahtír zui thìntu; chu nula hnênah chuan, ‘Ka dam chhúnga ka hmangaih ber i ni,’ i la ti ngam a maw!?” tiin a khak ta siah siah mai a! Heta “Mr. Steal Your Girl” a hman kherna chhan hi, Matty Healy hian Joe Alwyn hnu chiaha Swift a rawn chuh nghâl chat vàng a ni ber ang.

Pop culture/Riki-ah chuan he lai thu hian, Trey Songz-a hla, “Mr. Steal Your Girl” kha a páwl viau. Mipa pakhat chanchin a sawi thla char char a, “Mr steal girl is back” a ti a. A tàwpah, amah inpuangin, “Mr steal girl … I’m back” a tih tâk nèn khán, a “loml” hla pum pui pawh hi a inkungkaih thûk viau mai … tih ka’n zep tel hräm teh ang.

Cháng 3-na

Cháng thumna, tih lëmah, a bridge a ni mah zâwk ang chu. “You talked me under the table / Talking rings and talking cradles / I wish I could un-recall / How we almost had it all” tih kan hmu a. “Talked me under the table” tih hi, tawngkam thiam leh mawihnai tak hmanga mi lèm leh mi thlèm heuh heuh thiam tak sawina a ni. 

“I tawngkam thiamna hmang khán min hneh êm êm a; inneih chungcháng leh naute mut báwm chungcháng hial hial te pawh i sawi thleng a nih kha. Kan pahnih khán engkim kha kan lo nei hman têp mai a! Khatiang khawpa kan inhnim hnaih lai kha kumkhua atána theihnghilh hlen hmak theih ka va’n châk tehlul êm!” a ti zui a.

A hnuah, “Dancing phantoms on the terrace / Are they second-hand embarrassed / That I can’t get out of bed?” tiin keini ang duang, Sâp tawng lama pa chhe ve tak hi min chaih kual a. Ni àwma lang chauh ka’n zëldin ang e: In chung záwla hlim taka tual an lo chai dun tawh thinna khawvêl te kha, tûnah zawng, a rilru ti natu an ni ta si a. A rilru na lutuk chu, khum atang takngial paw’n a tho chhuak zo tawh lo a ni ta ber! “Kha hun hlimawm tak ka lo tawn vete khân, tûnah chuan zahna kàwnah min hnûk lût ta zâwk em ni? tiin ka inngaihtuah ta hial,” a ti.

A chhan a sawi zui: “Cause something counterfeit’s dead” tiin. “A chhan chu thil lem/thil dik lo (counterfeit) chu a thi tawh miau a!” tiin Matty Healy nèna an inkár leh an inhmangaihna, hlu tak anga a lo ngaih thin kha, a tak takah chuan “thil lem” mai a lo ni tih a hmu chhuak tawh miau a ni.

A hnuah, a hmaa a lo sawi tawh—“legendary” leh “momentary” te chu a rawn sawi nawn leh charh charh a. Thil tül lo tawp (unnecessary) tih a belh ta bawk! A thil lo tawn tawhte chu, thlànmuala phùm hlen hmak (stay buried) tlâk a nih thu a sawi tel tawh bawk.

“Kan inkár kha, thawnthu ropui (legendary) a ni thìn a; mahse hun rei lo te chhúng (momentary) daih chauh a lo ni si! A tàwpah phei chuan thil tül lo tawp (unnecessary) a lo ni ta hial zâwk a nih hi maw le…” a ti a ni.

Outro
    Oh, what a valiant roar
    What a bland goodbye
    The coward claimed he was a lion
    I'm combing through the braids of lies
    “I’ll never leave…
    “Never mind”
    Our field of dreams, engulfed in fire
    Your arson’s match your somber eyes
    And I’ll still see it until I die
    You’re the loss of my life

He lai hla tlar hi “loml” hla tlipna (outro) a ni a; he hlaa Taylor Swift-i thinrimna leh a natna vàwrtàwp pho chhuahna tiin a sawi theih ang.

Mipa huaisen ber anga inchhál ve si, a tàwpa mipa dawihzep taka tlânchhia leh dâwt hmanga a hring nun lo tih chhiatsaktu Matty a chhuahchhàlna a ni.

A tlipna cháng hi—sawi tawh angin, he hla vàwrtàwp, Taylor Swift-i thinrim inhrîkthlâkna a ni a; a tlar tlarin i’n sawi làw lâw teh ang:

“Oh, what a valiant roar / What a bland goodbye / The coward claimed he was a lion”

Sakeibaknei chu huaisen leh hlauhawm taka rüm thìn (valiant roar) a ni a; chu chu Matty Healy nèn an intawn tirh lai boruak a sawina a ni. Amah véng himtu, mipa huaisen leh rin tlâk ber anga lo inchhál thìn chu, an inthen dáwn meuh chuan mi dawihzep tàwpkhâwk a lo nih si thu a sawina a ni.

Sawi tawh angin, Swifties ten Matty hi an haw êm êm mai a. TS-i demna thäwm pawh hriat tùr a tam hle. Chutianga mualphona leh sawisèlna a lo thlen meuh chuan, huaisen taka din ngheh ai chuan, awlsam tê-in, tlän chhe chungin a then (bland goodbye) ta mai si a. Swift-i hian, mipa huaisen nia a lo ngaih thin kha, mi dawihzep tak (coward) a lo nih thu a au chhuahpui ta a ni.

“A hma chuan huaisen takin i rüm dur dur a; mahse a tàwpah chuan, holam takin min thlah leh si a! Nang mi dawihzep tak hi, Sakeibaknei rùmin i lo rüm thìn lek a lo nih hi!”  tiin a dem ta a ni.
    
“I’m combing through the braids of lies / ‘I’ll never leave’ ... ‘Never mind’ ”

Sam tàwn thlah hniang (braid) ang maiin Matty dâwt sawite chu a’n thlah uai ve hnuang a. Chûng chu, a mal tê tê-in a’n thian mial mial a. A dâwt sawi zawng zawng zínga pawi ber mai chu, ‘Ka kalsan ngai lo ang che’ a lo tih thin kha a ni. A tàwpa a mizia tak tak a rawn lan chhuah meuh chuan, ‘A ho lutuk ka thian, theihnghilh daih rawh,’ tiin awlsam tê-in a kalsan leh daih bawk si!

“I dâwt phiar kual hniang maite kha ka han chhui/zút leh mial mial a: ‘Ka kalsan ngai lo ang che,’ i ti a. A hnu lawkah, ‘A ho lutuk, ngaihven duh suh’ i ti leh bawk si!”
    
“Our field of dreams, engulfed in fire / Your arson’s match your somber eyes”

An pahniha inneih leh chhúngkaw din tùr anga suangtuahna mawi tak (field of dreams) an lo din dun tawh zawng zawng pawh chu, he Matty Healy hian ama duh thu ngeiin a mei chhèmah ngei a häl ral ta (arson) vek mai a! A mit meng thûk leh ngui tak (somber eyes) nèna inrem chiahin, pawi ti miah loin Taylor-i thinlung leh suangtuahnate chu a mei khuah a chantír ta vek a ni.

“Kan pahniha kan beiseina leh suangtuahna hring hniang mai kha (field of dreams) kha tünah chuan meiin a kâng chhe vek (engulfed in fire) ta! I mit meng phakar leh ngui tak nèna inchawih chiahin räwng takin nang hian mei i chhém chu a ni si a maw…”
    
“And I’ll still see it until I die”

Matty-a’n tawngkam mawi leh thlum tak hmangin a rawn thlèm kual a. Mahse, a tàwpa a kalsan dàn erawh a räwng hle a; a beiseina zawng zawng chu a meipui chhehah a hàl chhiatsak vek mai si a. Chûng chuan TS-i nunah hnu hma thûk tak, chhe zet a hnut chhiah a. A mar phu a tàwp thlengin a hliam tuar chu a hre reng tawh dáwn a ni.
    
“You’re the loss of my life”

“Nang hi ka dam laia ka thil chàn lian leh pawi tak (loss of my life) i ni ta!”

He hla tlar hi, he hla pum pui awmzia hrilh fiahtu a tih theih mai ang em aw… A hla thupuiin mi a bumna lai ber pawh a ni ang. 

A tìrah chuan, “loml” chu “love of my life” tihna a ni a. Ni e, a cháng khatna leh a thunawn hmasaahte kha chuan an hlim êm aläwm! Matty khân vawi duai lo (million times) “love of my life” a ti awn awn thìn rëng aläwm!

Mahse, engkima hrila a sak chhuah hnuah erawh thil a chiang ta uar a. Matty Healy nèn khán, an hun hmasa lamah hun duhawm tak hmang dùn mah se, a tàwpna erawh a kha fak fak ngei mai! Matty ngei mai chu, Taylor-i’n “loss of my life” (loml) a tih chu a lo ni ta daih si a!

Matty Healy hi a dam laia a mi hmangaih ber a lo ni íkháw lo mai a; amah Swift-i pawh Matty-a’n a hmangaih ber a lo ni hauh hek lo! A hring nuna a thil chàn pawi ber, rilru natna leh inchhìrna nasa ber hnut chhiahtu, a “loss of my life” zâwk a lo ni tiin thinlung keh sawmin a hmáwr a bawk ta a nih hi!