1: Isua leh Tehkhin Thu

1.1: Isua’n Judai rama rawng a bàwl tan khán, a zirtír mipuiho khawsak phung (way of life) te, an chènna leilung leh sik leh sa milin tehkhin thu a sawi thìn a. A sei lenna hmun, Juda hnam zia leh rinna lama an rilru put hmang mil zêlin a zirtír thìn. Chuta a zirtírnaa a leklam leh a hmanraw tangkai ber chu tehkhin thu a ni. A tìr chuan a zirtírte ngei ngei paw’n tehkhin thu a hman fona chhan an hre thiam lo a; amah Isua ngei pawh an zâwt hial a, a sawi fiahsak a ni (Mt 13.10; Mk 4.10). 

Chanchin Tha ziaktu zínga mi, Marka chuan, “… tehkhin thu loin an hnênah thu a sawi ngai lo; amaha zirtírte hnênah erawh chuan fianrialah engkim a hrilh fiah thìn,” tiin a ziak a (Mk. 4.34). Matthaia paw’n, “Chûng zawng zawng chu Isuan tehkhin thuin mipuite hnênah a sawi a, tehkhin thu loin an hnênah eng mah a sawi ngai lo,” (Mt 13.34) tiin a ziak bawk.

Chanchin Tha pali zínga a hmasa pathum, ‘Synoptic Gospels’ an tih: Matthaia, Marka leh Luka ziahahte hian tehkhin thu kan hmu hnem bîk a ni.  
1.2: Isua khân tehkhin thu chi hrang hrang: Similes, metaphors, parables mai bâkah tehkhin thu uarna, hyperbole (‘hai-par-baw-le’ tia lam tùr) leh elsènna tawngkam, irony pawh a hmang uar hle. 

Thu leh hla huangah chuan, hêng tehkhinna bungraw hmang thiam leh a hun leh hmuna hmang fuh chat chat thiam hi mi ril, thu leh hlaa mi hausa kan tihte an ni thìn a; Isua pawh hi thu leh hla thiam tak a ni, tih hi thil chiang tak a ni.

2. Isua Tehkhin Thu Hman Thiam Hyperbole

2.1: Kan thlùr bîk tùr chu, thu sawi uarna tehkhin thu, hyperbole hi a ni. A thu sawi ang ngau ngaua pawm theih loh; mahse, a sawi tum ti chiang tùra tehkhin thu, uar taka hman thin hi hyperbole chu a ni. ‘A … hetiang êm êm chu a ni thei dáwn em ni?’ tih hial tùr khawpa sawi uarna tawngkam; mahse, a sawi tum ti fiah êm êm si, hyperbole hi Isua’n a hmang nasa hle.

Mizote pawh hian hyperbole tha deuh deuh kan ngah a. Entírna tha deuh mai, naupan laia kan sawi thin kha ka hre chhuak zawk mai—miin thil a tiama a nemngheh nána kan sawi thin kha! ‘Hlen chil char! Lungpui seh keh rap! Sai leh Pathian ngam! Samzai khata belpui vuak keh! Thingthi chunga vàna uite vár lâk!’ kan tih zuah zuah thin kha maw le! Khatiang thu kha hyperbole tha tak a ni.

Isua’n hetiang tekhin thu uarna a hman zawng zawng kan sawi vek séng lo ang a; a hman thiamzia tàr lan nán chauh, a tehkhin thu thenkhat i han en thuak thuak teh ang:
2.3: Tláng chunga a thu sawi (Mt 5—7)-ah hian hetiang tehkhin thu uarna hi Isua’n a hmang nasa hle a. “Tin, engati nge mahni mita khanchhuk (log) awm chu ngaihtuah si loin, i unau mita hmawlh te tak tê chu i hmuh ni? …Mi vervêk! i mit ata khanchhuk kha la chhuak hmasa rawh; chutichuani unau mit ata hmawlh te tak tê lâk chhuah tûr chu fiah takin i hmu ang.” (Mt 7.3, 5)

Tú mitah mah thing tlâwn lian tha tak, in chung dàwl zo thei tùr khawpa inkham ruah kan hmu ngai lo! Chatuan pawha thil awm thei lo tùr chiang sâ a ni. Mahse, Isua chuan tehkhin thu-ah rawn hmangin, mahni thil tih dik loh lian tak inhmu thei mang si lo a, mi dang thil sual tih hmu zut zut thìn kan nihzia tehkhin nán a rawn hmang a ni. Heta tang ringawt pawh hian Isua thu leh hla thiamzia—hyperbole leh irony a hman thiamzia a lang chiang hle.

2.4: Matthaia vêkin, Isua tehkhin thu a ziah, “…mi hausa, Pathian rama luh aiin sanghâwngsei hriau benga luh tlang a awl zâwk,” (Mt 19.24) tih te hi thil theih loh hulhual tùr a ni. Mahse, a thu ken (context) kan en chuan, Lal Isua’n tlangvál hausa, Mosia dàn zàwm kim thlapa inhria; mahse, a hausakna zawng zawng pachhiate hnêna pêk hreh tlat si hnêna a sawi a ni. Chu tlangvál chuan lungngai takin Isua a kal bosan thu kan hmu zui a. Chutiang mi, engkim chàn emaw kalsan emaw inhuam lo tána vàn ram luh a harsatzia sawi uar nána tehkhin thu (hyperbole) a hman a ni.
2.5: Isua’n lehkha ziaktute leh Pharisaite vervêkna a dem tum paw’n, “Nangni hruaitu mitdel, thosi thli faia sanghâwngsei lem thìnte u!” (Mt 23.24) a ti siah siah mai a nih kha!

Hetah hian a ngaithlatu Juda-te tána chiang êm êm tùrin Isua hian tehkhin thu a rawn hmang leh a. An tán chuan rannung thlà (wings) nei, ke pali nei, a kala kal chi zawng zawng chu thil tenawm a ni (Lev 11.4, 21–24) tih Isua hian a hre chiang a. Tin, nungcha lian sawi nána Africa rama awm daih Sai aia Sanghâwngsei a hmanna chhan pawh, a thu sawi ngaithlatute hmuh theiha nungcha lian ber a nih vàng a ni.

A thu ken kan en chuan, Pharisaite chuan dànin a phût ang an ti kim biai a; mahse, “…dàn thu pawimawh zâwk—felna te, khawngaihna te, rinawmna te chu—in ngaihthah si thìn,” tia a sawi ti fiah tùrin, an tána rannung tenawm leh an hmuh phâk china nungcha lian ber chu a khaikhin ta a ni.

3.5: Thla em ât, zirtírten an tih dam theih loh, Isua’n a tih dam hnua zirtírte’n an tih dam ve theih loh chhan Isua an zawh khán, Isua chuan, “In rin tlèm avàngin,” tiin a chháng a. Hyperbole mawi êm êma chhunzawmin, “… Tih tak meuhin ka hrilh a che u, antam mu fang khat ang rin in neih chuan, he tláng hnênah hian, ‘Heta tangin sawtah sâwn va insawn rawh,’ in ti ang a, a insawn mai ang; in tán tih theih loh rêng eng mah a awm lo ang,” (Mt 17.20) a ti a ni.

Hetah pawh hian, ‘Êm êm a!’ tih tùr khawp tehkhin thu a rawn hmang leh a (Antam chî a tehkhinna dang Matthaia 13 .31–32 leh hmun danga tláng sawn theihna a sawi 21.21 en tel ila). 

‘Tláng sawn theihna’ a tih hian a thu hi a ngialngana pawm tùr tihna lam ai mahin ‘thiltihtheihna nasa tak neih theihna’ tih lama ngaih tùr a ni ang. [Ziaktu pakhat chuan, “He thu a sawi lai hian an piah lawka tláng toh lûrh mai, feet 9,200 vêla sáng Hermon tláng kâwk chungin Isua hian he thu hi a sawi ka ring!” tiin a ziak nghe nghe! (Edward D. Andrews, “The Great Teacher: Jesus Taught with Vivid Hyperbole”, Chritian Publishing House https://christianpublishinghouse.co/2018/04/09/the-great-teacher-jesus-taught-with-vivid-hyperbole, (March 4, 2023)] Mahse, rinna tlem tê tal pawh an neih chuan, mihring tána tih theih loh anga lang pawh, tih theih a nihzia a sawina a ni. An rinna chu thlai chî ang a nih chuan, a lo to a, a lo thang lian a, thing a lo ni thìn, tih Isua’n a sawi tawh a (Mt 13.32). Chutiang an neih chuan, mihringin a tih theih loh an neih thei anga, Amah angin ramhuai pawh an hnawt chhuak ve thei ang, tih a sawina ni ngeiin a lang. Rinna neih tam lam aiin rinna nghet neih a pawimawhzia a sawina pawh a ni, a tih theih bawk àwm e.

3. Tlipna    

3.1 Hêng kan sawi bâk pawh hi sawi tùr a la tam ang. Kan sawi tâkte hi Isua zirtírna sawi hnàwnna lam emaw sawi nêpna lam ni loin, tekhin thu a hman thiamzia leh a zirtírna a tih fiah bîkzia sawi tumna a ni tih hria ila. Tin, ziah sâ ring pawh ni loa chawp leh chilha fing taka tehkhinna a hmang nghal thei mai zêl khan, Isua ropuizia leh Pathian Fapa, mihring ni chung sia ‘Divine Nature’ pu a nihzia a ti lang chiang hle a. Chu chu, rin tlâk leh belh tlâk, Pathian mize dik tak pu mi a nihna pho langtu pawh a ni.

Kan sawi tâk tlem tê atang hian Isua thu leh hla thiamzia te; mihring hrin mah ni se, a thiamna leh a hriatna sàn filawr bîkzia atangten Pathian Fapa ngei chu Amah hi a ni, tih chhar chhuah nán hman tum theuh ila a duhawm hle mai.