".... a kotu che u a thianghlim angin, nangni pawh in chetzia zawng zawngah lo thianghlim zawk rawh u,"  "Nangni in thianghlim tur a ni, kei ka thiang­hlim si a," I Pet. 1: 15-16.

He thu hi Tirhkoh Petera'n Ponto ram te, Galatia ram te,  Kapadokia ram te, Asia ram te, Bithunia ram te a Darhho te hnena a thu chah a ni. Nun thianghlim nei mawlh turin a chah a ni.

Bible pumpuiah hian Thianghlimna hi vawi 650 vel lam chhuah a ni a. Thianghlimna hi serh hran, danglam bik, awmna tura awm, tihna a ni, an ti a. Saptawng chuan sanctity, holiness, separated, difference tih a ni a. A rîl hle a ni. Awmze thûk tak a nei. 

Thianghlimna hi hringnun bul thut a ni a. Faina pawh hi thianghlimna huang ata lak hran theih a ni lo. Phir ang maiin ze inang nei, kawh inang nei a ni a. Thianghlimna tel lo chuan a fai theih lohva, faina tel lo chuan a thianghlim theih hek loh. Kristianna nena inkawp tlat tur a ni a. Kristian thianghlim lo leh fai lo chu engahmah chhawr tlak an ni ngai lo. Nun tlabal leh nun kawrawng hi Kristian nun dik nen huang khata khung theih a ni lo. Dikna leh Rinawmna te, Felna leh thuawihnate hi Kristian dik tak ze ropui em em a ni a. Nun thil ti thei a ni. Hetiang nun duhawm hi chuan rah tha a chhuah nge nge thin a ni. Chung rah thate chu remna te, hriselna te, hmuingilnate hi a ni a. Dam reinate pawh hi thianghlimna rah chu a ni ngei ang. 

Thianghlimna hi sum a lei a ngai lova, thawhhlawh chi pawh a ni hek lo. Man nei lo a ni a, beih hram hran erawh  erawh a ngai thung. Insum theihna te, dawhtheihna te, nghah peihna te hi a ngai a. Thil paltlang tur pawh a awm a ni. Huaisen taka harsatna paltlang tur a awm. Beih hram hram te, nghah hram hram te a tul thin. Taimakna te hi thianghlimna leh Faina kawng a ni. Thatchhe Thianghlimna in hmun a chang ngai lo. Mi thatchhia a felin an fai ngai lo. He Thianghlimna kawng hi taima te tana buatsaih a ni a. Mi insum theite, awhna nei lote tana kawng sial a ni. Duham leh pamhamin hmun a chang lova, hengho tan hian thianghlimna leh hmuingilna chu vana rah ang chauh a ni thin. Chuvangin thianghlimna nun nei tur chuan kawng engkima insum thei mi, dawhtheihna ngah mi, mi rinawm nih a ngai ani. 

Pawn lam thianghlimna leh chhunglam thianghlimna hi inkawp tlat tur a ni. Pawn lam lan dan thianghlimna, fainate hi chhunglama thianghlimna tel lo chuan awmze nei lo a ni. Hmai tlang fel fai tha, mawina tinreng inbela nalh tak hi a tha, hmuh a nuam khawp mai. Mi a hip a, mi a lêm thin. Mahse, chhungril lam nun tha in a chawm loh chuan engmah lo mai a ni. 

Nula pakhat chu a hmel tha a, a inchei nalh thei hle mai. Zuk leh hmuam pawh a ti ngai lo. A rim pawh a tui. Mahse, miin an ei tlat lo! Mak lutuk! A chhan engnge? A nungchang a tha lo a ni. Mi dang sawisel a ching a, a rel a, a thik thu pawh a chhe hle. Hetiang mi hi a nih avang hian a mawima leh thatna zawng zawng chu engmah lo mai a ni a. A hmel thatna leh ngaihno beina te chuan awmzia a nei thui hek lo. Mi nuihzat a ni a, mi in an kal pel mai mai thin. A hmel chu a tha, a fel fai, a thianghlim a ni. Mahse, a chhungril nun a that loh avangin pawn lam thatna leh thianghlimna a kawl ve chu nuih tizatu mai chauh a ni.

Pisa Babu pakhat chu Kohhran Upa a ni a, a inuluk a, a smart hle. Thusawi a thiam a, a fingvar hle. Mi a hniak ngai lova, mi a haw ngai hek lo. Mahse, eiruk a hrat hle a, a hlawh phu lovin a khawsa a, a in leh lote chu a ropui en un khawp mai. Mahse, a eiruk thin avangin miin a thu sawi an ei ngai lova, a hnung lam atangin an 'kawh' rawn thin. An ngaisang lova, an tu leh faten an tuar phah hial a ni. A pawi em em! Hetiang lan dan mawina ringawt hi chu zawi muanga mahni intih boralna a ni a, thianghlim nun a tling lo a ni.

Kan Pathian biak hian thianghlim turin min duh a. Chhung ril leh pawn lam nunah kan thianghlim thei a ni. Mahni hmasialna nun hian rah tha engmah a chhuah lova, rei lo te chhung atan erawh kan hlimna a ni mai thei e. Rei erawh a daih ngai lo a nih hi! Chu mihring nuna ril em em a zung kaih nghet tlat mahni hmasialna chu chhungkuain a tuar a, ram leh khuain a tuar thin. Duhâmnate hi nun thianghlim tichhetu a ni.Kristian tha entawn tlak i nih theih nan i nun fimkhur hle ringawt rawh. Corruption huain do la. I chan tawkah lungawi la, i neih ang ang sawr chhuak ngam la,chân huamin midangte tan inpe la, i hmelah ngaihno beina awm lo mah se, miin malsawmna ni eng an hmu ang a, i nunah par vul mawi tak an hmu ang, tui nung an hmu dawn bawk a ni. Chu chu Lal Isua zara Thianghlimna nun kan chan theih chu a ni.