Israel lal ropui Solomon-a khan nupui zasarih leh hmei zathum a nei a, sum tam tak, hman sen loh khawpa tam a nei bawk a. A in leh a velah te chuan rangkachak leh tangkarua te chu lung ang maiin a let rem rum a, a mit it zawng apiang a hlah lo a, a duh apiang a nei thei a, a duh apiang a ti thei a ni ngawt mai. Chutiang taka hausa leh thil tithei han nih chu, tu emaw tih dan takah a nuam pang pang ngawt ang. Keini ang duang, thla khat hlawh lak tlai hlek pawha chhungkaw khawsak phung khaihlak deuh nghal mai thin te nen chuan kan kar a hla mang e. Keini mahin khawvel hi nuam kan tih a, dam kan thlakhlelh chuan Solomon-a phei chuan a let tam taka khawvel hi thlahlel leh zual tur a ni. 

Amaherawhchu, Solomon-a khan chuti takin khawvel hi a thlahlel vak tlat lo. A hausakna a thlir a, khawvel a thir a, a nun a thlir a, “Thil zawng zawng hi engmahlo mai a lo ni e” a ti tawp mai a ni. Khati khawpa hausa chuan dam te pawh thlahlel hliah hliah awm a nih vei nen, nung dama awm te ai chuan mitthi tawh te chu a awt zawk a, mitthi tawh te ai pawhin la piang lo te chu a awt zawk a ni. “Nun hi ka hua a, ni hnuaia thil reng reng hi min tilungngaitu vek a ni” a ti tawp mai.

A ni tak a, mihring nun hi a ho zawnga thlir chuan ho deuh a ni. Kan vanglai leh that lai hun te hi a va rei lo em! Hmanni lawka pa chak leh phiar sek fuat mai Arnold-a te pawh an chul rup tawh a, cowboy rorum Clint Eastwood-a te pawh tar kiring an ni ta der mai. Hmelthatna te, sakruang mawina leh vun mawina te hian a va daih rei lo em. Hmeichhe hrin tawh phawt chu engtik niah emaw chuan chul leh vuai mai tur kan ni. Kan vanglai leh that lai, kan arpa chan lai hian han in vaivung viau thin mah ila, engtik niah emaw chuan thi vek tur kan ni.

Kan thih niah chuan kan hnukchah rual rualin mihring kan nih anga kan hlutna chuan min kian san nghal ang a, thlan khur thuk taka min zalh hma hauhin ‘Ruang’ tih chu kan chan tawk a ni tawh ang a, lainat taka min kiltu te pawh ‘ruang kiltu’ mai an ni tawh ang. Kan hnukchah leh thlanmual inkara kan thlen chin apiang chu ‘ruang thlen chin’ a ni tawh ang a, min vui zawh rual rualin khawvel chuan min hnuchhawn nghal ang a, kum sawm sul a vei meuh chuan khawvelah hian kan lo awm ve tawh a ni tih pawh hre lo mi thar hlirin he leilung hi an luah tawh ang. 

Kan dam chhung tawiteah hian ramsa leh chungleng sava te anga a awmsa ringa khawsa tur tal ni ila a zia deuh tur. Chu a hnehin kan ei tur thawkchhuak turin rim taka kan thawh a ngai a, khawsak phungah mi pangngai pha ve tur chuan nasa taka kan beih a tul thin. Ei leh in tlakchham hlauin, mi an tumin, mi aia hnufual bik hlau reng rengin kan hmanhlel a, kan damchhung hun tawi te hi buainain a khat a, buai reng rengin kan kan hun kan hmang ral thin. Mi pangngai nun pha tura thawhrim a tul zia te, kan damchhung tawiteah pawh harsatna leh vanduainain min tlakbuak nasat thin zia te ngaihtuah chuan Solomon-a anga la piang lo te awh rum rum mai pawh awl tak tur a ni.

Hmeichhe naupang pakhat pawhin a nau, nausen lo piang chu “Ka khawngaih e” a ti reuh a. A chhung te’n a chhan an zawh chuan, “Homework te a la ngah dawn si a, a thiam lohin a rilru te a hah ve awm si a” a ti reuh a. He hmeichhe naupang thlir dan ang deuh hian, nausen lo piang te pawh hi lawm viau thin mah ila, buaina an la hmachhawn tur zawng zawng te ngaihtuah chuan, “Ka khawngaih reuh mang e, lo piang lo zawk se’ tih mai pawh awl tak tur a ni.

Amaherawhchu, hringnun hi a hahthlak zawnga thlir reng tur kan ni lo a, buaina te hi tawk thin mah ila hlimna tur leh lawmna tur hi a va tam si em. Pathian thil siam zinga ropui ber, Pathian anpuia siam kan ni ringawt pawh hi ngaihtuah chian chuan lawm veng veng na tur a ni. Pathian thil siam ropui tak te hi han thir ila, lawmna tur hlir a lo ni. Mi tam takin ngaia kan neih, eng hehua kan ngaih loh leh kan kal pelh mai mai leilung mawina te hi Rokunga chuan nasa takin a hlimpui a, “Aw, lei mawina thinlai tihlimtu, zantiang chhawrthla leh siar eng mawi, aw, zing eng mawi leh tlai tla eng mawi, dam lai khuavel nun khua tinuama’n lo vul rawh” a ti vawng vawng mai.

Solomona anga hausakna, sum leh pai leh tisa nawmchennaa hlimna kan zawn chuan kan tlan nasat poh leh kan bei a dang nasa ting ang a, ‘Nun hi ka hua a ni’ kan ti chuai raih mai ang. Rokunga anga thil te tham teah pawh lawm nachang kan hriat a, khawvel thil (material) ah hlimna zawng loa khawvel mawina leh a phena siamtu ropuina hmu thiam mi kan nih chuan, “I mawi mang e piallei kan chenna, rianghlei tan par ang vul zel la, tah lai ni kawlkungah liam zelin, hlim lai ni par ang vul rawh se” kan ti hep hep ang a, lungawi takin kan damchhung nun tawite hi kan hmang liam dawn a lo ni.