Kum thar kan chuang kai a, kan hlim em em ringawt a. Kum thar kan lawm a, inkhap ngai khawpin kan lawm a ni. Kan sahâwk a, kan bi ling ba lang a ni ber. Kum thar lawm thenkhat chuan khap thil, puah theih an tih puah tâlh avangin thubuai an neih phah hial a ni awm e. 

Heti khawpa kum thar 2025 kan lawm hi a chhan leh avang hre uk lo hi a tam zawk kan nih hmel. Kum thar lawmna ruai kan theh a, kum thar nî-ah Kristian te kan inkhawm a, kan zai khawm a nih loh pawhin intihhlimna chi kimin programme kan hmang a, ni kan tum tawi a ni ber. A nuam a ni! Pathianin kum thar min hmuh tir hi lâwm tur chu kan ni chhap e. 

He tih lai hian kum a thar ruala mahni thar si loh hi thil hlauhawm a tling. Bâl rim chhe tak chunga thawmhnaw thar inbel ang a ni. Thinlung thar nei chuang si lova, kum thar chuan kai hian awmzia a nei thui lo khawp mai. Chuvangin kan thupui hi a pawimawh a, a nêp lo hle a ni. 

Thinlung thar tih awmzia hi i han sawi dawn teh ang. Pathian thu zir mite chuan thinlung thar tih chu 'ngaihtuahna thar, simna, sual kalsanna, thil tha ti tura inbuat­saihna a ni e, an ti a. 

Sam 51-naah chuan Lal Davida chuan hetiang hian Pathian a au a ni. "Aw Pathian, keimahah hian thinlung thianghlim tak siam la, Ka chaw chhungah hian thlarau dik tak siam thar leh ang che" a ti a ni. 

Pathianin Davida hi a chhang a ni ngei ang. Malsawmna tam takin a vur a. Mahse, Davida hian Pathian malsawmna chu a dai bua a, mî nu a uire ta mai mai a. Davida kha mi dangdai tak pawh a ni mahna, a that vek vek chuan tha leh fel chung chuang tak kha a ni a. Pathian ngeiin "Ka rilru ang pu mi" a ti hial a nih kha. A tlâk hawlh tawh vêk vêk chuan a tla chhe nasa ve hle mai. Kan sawi ang hian Uria nupui kha a han chetsual pui a. A fapa a thih ni la la in tlaiah Pathian in a kalin Pathian chibai a buk ang lawi a. Mahse, Davida ang tluka Pathian tih leh zah kha an awm kher nang! 

Keini ve hi, rilru thar neih kan harsat khawp mai. Kum thar kan chuangkai dek dek a, kan 'thar' lem lo chu a nih hi! Thilsual ti thangin sual an bansan chuang hlei law, mahni inbih chiang a, khaw nge, ka han in sang mar teh ang ti kan awm chuang hek lo. Mi thenkhat erawhin 'new year resolution,' an siam a ni âwm e. Siam loh ai chuan a tha. January-ah kan thar fu, February-ah kan thar lo deuh, hetiang vel mai mai hi kan ni lawi hlawm! A hah thlâk duh khawp! 

Dawt sawi chîng mi chuan dâwt bansan se la. Eiruk chîng chuan ei ruk bansan ngam se. Pisa tlai thin kan awm em? Bansan tawh rawh se. Hlem hle leh hleih neih thinlung pu thin chuan bansan ngam se, kan ti a nih hi. Rilru thar, insiam that duhna rilru nei chuang si lova, kum thar lo lawm ve chiam chiam te hi Pathian duh dan a ni lo hle si a. Pathian chuan amah ang a thianghlim turin min duh a, min beisei bawk a ni. Thinlung thar min pêk a duh a ni. 

Khawi hmunah pawh awm ila, eng hun pawh tawng ila, thinlung thianghlim kan put a ngai. Kristian ram Kristian nun dik, belh chian dawl beiseina hmunah hian kan nun kan uluk a va ngai em! Kristian sumdawng, Kristian dawrkai, Kristian officer, Kristian hnathawkte kan ni vek si. Mahse, kan nunah hian dikna leh rinawmna hi a lang si lo, a hahthlak namen lo hle a ni. 

Biak In chhung leh Biak In hung chhunga kan ti ti te hi a mawiin a va tha em! "A kâ pawh zen ila min seh lovang e" tih tur deuh vek kan ni. Sumdawng, contractor, politician, zirtirtu, office babu te hi pawh hi Biak In hung chhungah chuan 'an thlarau mi' viau zel a nia. Mahse, mihring hlui ze paih lo nafam chu, Biak bûk pawnah chuan sualnain  a tlansan loh avangin a ngai bawkin sualah an tlu a, an ei ru leh a, pisa an tlai leh a, dawt an sawi leh a, mi te tan anchhia an lo ni leh thin. He nun kher hi chu ngei awm tak a ni. Thinlung thar chu nun tam neihna a ni a. Nun tam neitu chu entawn tlak, belh­chian dawl, rinawmna leh diknaa  khat an ni thin. Chu nun tam chuan sualna a hnawl a, dikna leh thatna a chawi sang thin. 'Fel lohnaah a lawm lova, thu tak erawh a lawmpui thin,' tih anginHe nun tam hi mihring nun innghahna a ni a. Nun tam nei apiang an ding chang thin. Chhungkaw din chhuahna a ni a, ram leh hnam innghahna tobul a ni bawk. Rilru thianghlim, ngaihtuahna fel chu khua leh tuite hma  chhuan  a ni. 

Hun kal tawha thil tha lo kan lo chin thinte chu paih bo vek a, thinlung thar nen hun thar kan chuang kai zel tur a ni. He thuruk ril leh hlu, lawmawm hi kan hmachhuan tur chu a ni. Pathianin thil tha ti turin min siam a. A siam chhan ang ngei a, nunga awm tur kan ni. Thenawm­te tana hnawksak, thawhpuite tana harsatna thlentu, rawngbawlpuite tana anchhia kan lo ni thin a nih pawhin he hun tharah hi chuan bansan tawh ila. Politician eiruk ching, officer eiruk ching, Kohhran Upa leh Pastor, Pathian thu tak pensan thinte pawhin bansan se, mi dangte tana malawmna ni mawlh rawh se. Chu chu thinlung tharin a thlen tur chu a ni.