Pathian Lehkhabu Thianghlim Thuthlung Thar-ah hian Lal Isua chu thlêma a awm thu kan hmu a. Kan Lal Isua hi thlemna tuar chhuaktu ropui ber a ni. Diabola'n kawng hrang hrangin a thlem a. Amah, Diabola chu chibai buk tur leh khawvel zawng zawng nei turin a thlem a ni. Mahse Lal Isua chuan chu thlemna chu a do zo chang ni lovin Setana chu thlawk bo turin a ti nghe nghe a nih kha. 

Lal Isua'n a zirtirte chu thlemnaa an luh loh nana inring reng a awm tur leh tawngtai turin a hrilh a. Tirhkoh Jakoba chuan a lehkhathawnah khan "Thlemna tuar hram hramtu chu a eng a thawl e" a lo ti bawk a. Pathian thu zir mite chuan heta thlemna tih hi 'Fiahna' a ni, an ti a. Kan rinna chu fiaha a awm hunah rinna kawnga kan dinhmun chu tihlanin a awm dawn a ni. 

He Zoram, Kristian ramah hian Kristian te hian eng lai pawhin  thlemna kan tawk reng a. Thlêmna chi hrang hrang a awm. Chung thlemna te chu sawi vek theih pawh a ni lo. Kan mizia leh kan chak zawng hmang hian Setana hian min thlêm thin. Rinnaa derthawng tam tak erawh thlêm hran ngai lova, tlu sa te pawh kan ni a. Lal Isua Isua hnungzuitu nihna chhinchhiahna pu lo sa hrim hrim kan awm mek bawk. 

Heng Setana thlêm hran ngai lo ringtu intite hi chu khawiah mah hian huphurhawm an awm lova. An nêk a na he lova, an sîk a na hek lo. An buk a rit lova, an sut thluk theih pawh a tlêm sa reng a ni. 

Ringtu tha leh chak, pawimawh tak takte hian thlêmna pawh hi an tawk nasa thin a nih hi. Pathiannia rawngbawl rinawm leh tha, khûn khân, pawisawi a mawi lo, serafim tluka tha leh hmuhnawmte hi Thawhtanni a lo nihin thlemnaah an lut nghal a. Tam tak chu an indang  zo lova, chhe takin an nun ram an hmang thin a ni. Zu in mi chu zu leh sa hmangin thlem an ni a. Hmeichhiat mipatna lama buan chak lo mi chu helamah hian hruai luh an ni thin a. Mualpho takin an nun ram an hmang bawk thin. Eirûkna te, hlemhlênate hi thlêmna do zawh loh avanga lo awm a ni. Thuneihna hman sual te pawh hi thlemna chi khat a ni. 

Thenkhat chuan thuneitu ni reng tur leh lal reng tura inngaihna an nei a. An â ngawt mai. An lo chapo em em a, an inti lal em em a. An hnuaia thawktute, an thawhpuite lakah lal an hrawt ta thin a. Fel ber leh tling berah an inngai a. Engkim chunga thuneitu leh roreltu berah a indah a, mahni inhaivurin a bet mekte chu an bet tlawk tlawk thin. Heng thlemna tuar zo lo te hian thlemna an tawk tih reng an hre lo. Anmahni thil tih rah chu tuarin ramin a chhiat phah a, an tu leh fate ha a tim thin a ni. 

Thlemna do zo lo mi lian ho chuan sawrkar thilte chu an ta neih a, sawrkar thilte chuan an intithau thin a ni. Sawrkar sumin in leh lo an din a, sawrkar chakna hmangin anmahni tan ram an la duai duai a, mahse an biak Pathian chuan a lo chhinchhiah kiauva, a hun lohvah an tha a chhahsak fo thin bawk. 
    
Thlemna hian Pastor leh Kohhran Hruaitute a en liam mai mai bik lova, khawvel sum awhna thang chak tak maiah a hruai lut fo. Pathian thu tha tak takin an sawi a, an nunah awmzia a nei thei meuh si lo. Thu tha pui pui an sawi a, thlarau thianghlim pawlna changin an lam duai duai a. Setana thlemna chu a hnu lawkah tuar chhuak hram hram lovin an lamna kut bawk chuan sual an dawm leh thin zu nia maw le. 

Thenkhat Pastor leh kohhran khaipa, Evangelist chenin politics thli chhia hmanga thlem an ni a. Chhuanlam awihawm tak tak hmangin politics an khel a. Hmun dang ang lo takin inbumnate, dawtsawi zirna hmunah te chuan an lut duk duk a, an sakhaw mi nihna thuam kawra hmangin Pathian thil leh khawvel thil an kaih kawp a. Politics thianghlim khel inti in politics rim chhe  tak hnim chungin party politics an khel a. Ram mipui chhuanlama hmangin sum politics-ah an in chiah da zo ta vek thin a ni. An chawm kohhranin an lo hmu sakhi tawh laklawh si a. Thlemtu thlemna thangah an awkin tal chhuahna kawng hmuh tur a awm tawh thin lova. Chutiang karah chuan Kohhran nun a chhe em em a ni. 

Kohhran Upa nun thlahdah, nun pawlawh tia sawi fo pawh hi thlemna an do zawh loh thin vang a ni. Eirukna leh hlemhletna ata fihlim hauh lo kohhran hruaitu zingah engzat tak awm ang maw. Ram din chhuahna daltu chu thlemna do zo lo, sakhaw mi thlemna tuar chhuak zo lo politician te, thlemna tawn tlang zo lo hnathawktute hi an ni a. Ram mipui moral pawh hengho hian an tichhe zo ngei dawn a. Chutiang a thlen loh nan thlemna hi tuar hram hram a tul! Kan engthâwlna tur a ni si a.