Mi sual, hel hmang, tual that, a chungthu rel mai tura rip chhunga phuara lum reng kha a nia, Barabba kha!

Khami nia Barabba awm vel dan tur kha mitthla ta ila. Boruak inlumlet zawng zawng kha a hre vek dawn si lo a. Mipui pung khawm hut hut thawmte kha chu chhuata let reng chung khan a hre pha vuai vuai ang. A chungthu an rel a nih tawhte pawh a ring mahna!

"Khengbet rawh" tia mipui au thawm a hriat khan, ama chungchang a nih ngei a ring ang a. Thawm ngaithla chiang turin a tho ur ur mai thei! Pa rorum, mi sual, hlauh nei ngai lo tan pawh khenbeh kher kher chu a hlauhawm dawn asin! Rom sipai ho lah hian misualte tawrh hrehawm zualtir dan an thiam nasa mai si a!  Amah ang misual turu phei chu an dim lohzia a hre vek ang! A va huphurh ve dawn tak!

Chu! Mipuiin "Barabba" tiin a hming an lam ri ta ngei alawm! "Krawsah khenbehtir rawh," an ti rual ta thup thup mai le! Pilata țawng ri a hre pha si lo. Amah ngei a niang, a hun a thleng ve dawn ta ngei a nih hi. 

Khenbeh a phu alawm, tual a that miau si! Rawng taka mi tam tak nunna lo la tawhtu khan ama thihna tur a han hmachhawn ve dawn ta mai chu a nia! Chhuahna awm se aw, tlanbona awm se aw, chhanchhuaktu awm hlauh se la aw!! A awm dawn teuh si lo.

Mipui ri nuah nuaih karah chuan vengtu lo tlan thawm a hre ta! A kawngkhar an rawn hawng ta! A hun a thleng ta!

"I zalen! I aiah mi pakhat a thi dawn thung" an rawn ti ta mai a! 

Awih harsa a ti ve ngei ang a, mahse an chhuah miau si! Barabba, hel hmang, tual that, thi mai tura rorelna nghaka lum reng kha, a aia mi pakhat an khenbeh dawn avangin a zalen ringawt a nih chu!

Barabba hian a awih loh thu a sawi lo a niang! "A, thi tlak ka ni, ka zalen ka ring thei lo, ka aia tu emaw thi tur an tih kha ka awih lo, ka thi duh tho tho," a tikual vel lo a nih hmel! A chhuak zalen ta vang vang a niang! Helna leh tualthah avanga tan ina tang an dil kha a chhuah a, Isua erawh chu an duh duha tihah a pe a. (Luka 23:24)

Keini, Barabba anga misual, hel hmang, duham thin, tualthata uire ching, dawt sawi leh ruk hmang, thi tura kan chungthu rel nghaka he lei khawvel pindana awm ve phing pheng ho hi, kan aiah mi pakhat a thi ta zawk an ti a nih chu! Kan zalen thei a nih chu! A awihawm loh hial zawk asin! A mak em asin!

Barabba khan a aiah Isua a thi tih a pawm a, a nun phah ta a nih kha. Pawm ve la, awih la, zalen, tih dam, chhandam i ni ang. "Pathian a awm lo ang, Isuan min chhandam tak tak lo ang," ti vel duh lo mai teh! 

Barabba meuh paw'n a awih a, a zalen a, a nung zui ta a nih kha a!

Mahse kan aia thia khan phut a nei ve asin! "Ngai rawh, i dam tak hi, thil tisual leh tawh suh, chuti lo chuan thil tha lo lehzual i chungah a lo awm dah ang e" a ti. (John 5:14)