American school, naupang rualbanlote enkawlnain sum tuakna zanriah an buatsaihah chuan, an zirlai naupang pakhat pa-in thu a sawi a, a ngaithlatu zawng zawng ten an theihnghilh leh ngai tawh loh tur a ni. School leh a thawktute fakna thu a sawi zawh chuan zawhna a siam a: 

"Pawn lam thilin a chim buai lohnaah chuan, thil engkim a nih tur angin a kal mai thin. Amaherawhchu, ka fapa Shay-a hian naupang dangte angin thil a man thiam ve mai thin lo va. Midangte angin a hrethiam ve mai thei lo a ni. Ka fapa tan thil nihphung pangngai chu khawiah nge a awm?" A thusawi ngaithlatute chu an reh thiap a. 

A pa chuan a sawi chhunzawm a, "Rilru leh taksaa rualbanlo ka fapa te ang khawvela an lo pian ve hian, mihring ze dik tak lan chhuahna hun remchang a rawn thleng mai thin. Tichuan, a laka midangte rilru put hmang pawh a lo lang thin." He thu hi a sawi zui a:

Nikhat chu Shay-a leh a pa park pakhat kianga an kal laiin naupang thenkhat, Shay-a pawhin a hmelhriat ten baseball an lo khel mek a. Shay-a chuan, "Min khelh tir ve an phal i ring em?" tiin a pa chu a zawt a. A pa chuan Shay-a te ang chu an team-a tel turin naupang tam zawk chuan an duh lo ang tih a rin rualin, a khelh ve an lo remti mial a nih erawh chuan, a mamawh em em midangten an pawm ve a ni tih leh, rualbanlo a ni chunga mahni inrin tawkna leh midangin a nih ang angin an pawmin an hrethiam a ni tih hriatna a neih phah thei dawn tih a hre bawk a. 

Shay-a pa chuan beisei sang vak lo chungin naupang pakhat chu biain Shay-a an khelh tir ve thei ang em? tih a zawt a. Naupang chuan a thiante a han mitmei kual a, "Run 6-in kan chak lo mek a, inning 8-na kan khel mek bawk. Kan team-ah a lo tel ve theih ka ring, inning 9-naah kan bat (ball vuak) tir thei ang. 

Shay-a chu a team te thutkhawmnaah chuan jersey hain a buai hle a, a hlim hle tih a hmelah a lang bawk. A pa erawh thinlung lawma khatin a mittui a tla a. Naupang dangte chuan a fapa an tel tir avanga a pa lawmna chu an hmu thiam vek bawk. Inning 8-na tawp lamah chuan Shay-a team te chuan run an siam nual naa, run 3-in an la hnufual ta cheuva. Inning 9-na an khelh tan dawn chuan, Shay-a chu kutkawr bunin field laiah chuan a ding a. 

Shay-a dinna lamah ball a lo kal lo nachungin, inkhelhnaa a tel ve theih vang ringawt pawh chuan a lawmin a hlim hle tih a lang thei a, a pa-in pawn lam atanga a ban a rawn vai chu hmuin a nui var var reng mai a ni. Inning 9-na tawp lamah Shay-a team te chuan run an siam leh a. Pahnih an out/thi a,  run an siam dana zira chak thei dinhmunah an ding ta. Shay-a ball vuak/bat hun a lo thleng ta bawk. 

He hunah tak hian Shay-a chu bat/ball vuak tirin an chak theihna hun tha an bawhpelh phal ang em? Mak tak maiin Shay-a kutah ball vuakna bat chu an pe ta a. An zavai chuan ball lo kal lo vuak fuh chu Shay-a tan thil theih loh tur a ni tih an hria, bat hum dan dik pawhin a hum thei lo a nia! 

Amaherawhchu, Shay-a bat hum chunga a lo din chhuah chiah chuan, pitcher/ball vawmtu chuan Shay-a team ten an chak theihna hun tha hman tangkai aia, chu mipa naupang nuna hun hlu tak mai an ngaihpawimawh zawkna chu hrethiamin, a rawn pen hnai hret hret a, zawitea ball a vawm chuan Shay-an a bat-in a lo vaw fuh ve mial thei ang tih a ngaihtuah a. Ball hmasa ber a rawn vawm ta a, Shay-a chuan awmze nei lovin a bat a lo vai satliah a, a vaw thelh chiang hle. Ball vawmtu/pitcher chu a rawn pen hnai leh hret hret a, zawi tein a han vawm leh ta a. Shay-a chuan a bat hum lai chuan a lo vaw fuh ve ta mial a, a vawmtu lamah lei hrulin a lir phei a. 

An inkhel chu tawp mai thei a nih tawh laiin pitcher/ball vawmtu chuan, Shay-an a rawn vuak lirh teng teng chu lo manin, awlsam takin a pawl pui ball chang hnai ber hnenah chuan ball chu vawm phei se, Shay-a a out ang a, an chak nghal bawk ang. 

Amaherawhchu, rilru dang a pu tih a lo lang zui a. A ball hum chu a pawl puite zawng zawng man phak loha sangin hla takah a vawm ta daih a. Pawn lama lo entute leh inkhel mek ho zawng zawng chu ring takin an auva, "Shay run siam turin tlan rawh, tlan rawh..." an ti tuar tuar a. A dam chhunga a tlan nasat ber tum Shay-a chuan tawngin, run a siam ve ta a.

An zavai chuan, "Shay, run 2-na siam turin tlan leh rawh...tlan rawh," tiin an au nasa zual sauh a. Thaw hlawp hlawp, zei lo takin Shay-a chu a tlan leh a. Run 2-na siam tura a tlan kual lai chuan ding lama ball changtu kutah ball chu a awm tawh a. An team-a a naupang ber niin an team tana chakna thlentu/hero nih theihna hun tha a vawikhat nan a nei mek bawk. A ball hum lai chu baseman 2-na lamah chuan vawm phei sela, awlsam takin Shay-a a out ang a, an chak nghal tawh bawk ang. Mahse, an boruak tawn mek chu hrethiamin baseman 3-nain a man phak loha sangin ball chu a vawm ve ta daih mai!

An zavai chuan, "Shay Shay..tlan zel rawh, tlan zel rawh," tiin an fuih sauh sauh a. Base thumna a thlen chuan team lehlama mi chuan lo tanpuiin, run 3-na siam tura tlan kawng a lo kawhhmuh a, "Shay run 3-na turin tlan rawh," tiin a au bawk a. Run 3-na siam tura a tlan chuan zuang chungin an zavaiin Shay-a chu an lo au phur sauh sauh a. Shay-a chuan harsa takin run 3-na a siam ta, a team te chak puiin 'HERO' a ni bawk. Lawmin kut an beng hluah hluah a. 

Khami ni khan, a pa chuan mittui luang ngiai ngiaiin a sawi zawm a, team 2-a mipa naupangte khan hmangaihna dik tak leh mihring inngaihsak tawnna an lan chhuah tir a ni. Shay-a chuan a kum leh nipui thleng pha lovin khami kum thlasik lai khan min kal san ta nghe nghe a. A team te chak pui tu, 'HERO' a nih theihnghilh lovin, a pa hlim em em mai nen chuan in an thleng a, hnukulh teuh chungin, khami ni a a changtupa chu a nuin a lo kuah vawng vawng a.