Zawhna : Ka pu, tuilum a inbual aiin thlasik ah pawh tuivawt a inbual hi vunin a ngeih zawk an ti a. A dik em?

Chhanna: Tuilum emaw tuivawt a inbual hian a thatna lai a awm thei ve ve a. Mahni tihdan phung pangngai anih chuan a tha zawk a awm kher lo thei bawk. Chutih rual chuan tuivawt hman thatna lai bik a awm a, tuilum thatna lai a awm thei bawk. Chungte chu heti hian han sawi dawn ta ila.

Tuivawt a kan inbual hian kan vun a kaw awm (skin pores) hi a ti chip/zim a, chu chuan kan vun leh sam a awm natural oil kha a hum a, vun ro chi te, sam ro leh tla hma chi te tan he natural oil hi a hum vangin a tha zawk thei ang. Chutih laiin thlan nasat te, bal leh ban taka vun a awm erawh chuan tuilum chuan a tleng fai tha zawk deuh nge nge thung ang.

Tuivawt hian kan taksa a han tawh chiah khan hormones thenkhat a siam tam a, chumi chuan kan thazam (nerve) ah signal pe in rilru lamah hna a thawk thei a. Rilru hnual (depression) atan te a tha niin an sawi. Taksa sil them thum te, rawl viau te, kawng kham leh chau zawi ah te erawh tuilum hian a ti ziaawm ve leh thei thung.

Tuivawt a kan inbual hian kan lungphu a ti rang hret thei a, chu chuan kan taksa a thisen sem darh kawngah a pui thei bawk. Kan taksa peng hrang hrangin thisen an dawn that chuan vun a ti eng phah thei niin an ngai. Tin, kan taksa khawl chet velna atana pawimawh metabolism lamah pawh a pui thei zawk nia ngaih a ni. Chutiang tho chuan tuilum hian metabolism lamah a pui ve thei tho a ngaih a ni a. Taksa sil, rawl leh ti them thum te a tih ziaawm theih avangin a thatna lai tak a ni kan ti thei bawk awm e.

Tin, tuilum a inbual hian kan vun a kaw awm skin pores te kha a rawn ti zau a, kan vun a bal leh taksa tana tangkai lo (toxins) bet te a tleng fai ve leh thei thung. Tin, nilenga hah taka hnathawh hnua zanah tuilum a inbual hian mut a ti tui duh niin an sawi bawk a. Taksa leh rilru hah (Stress) a ti ziaawm thei bawk a ni.

Intihpalh vanga vung kan neih te hian tuivawt/vur a kan deh khan a vung tur te a veng thei a, tihrawl sil te a tireh thei a. Tuilum erawh chuan thisen kal vel a ti tha a, kan intihpalh na laia thi/tuiril tling khawl te a thian fai hma thei thung a, ruh chuktuah vung emaw nuam lo te a ti ziaawm ve leh thei thung bawk.

Ruhseh lam harsatna nei te tan chuan tuilum a inbual hi taksa in a ngeih zawk a, ruh chuktuah chet vel kawngah pawh a ti awlsam a, vung (inflammation) insiam nasa tur a veng thei. Infiamna lam ti thin te an inhliam palh hian tuivawt hian vung insiam tur a veng ve leh thei thung bawk a ni.

A pawimawh erawhchu vawt emaw lum/sa lutuk a inbual loh hi a ni a. A lutuk ve ve anih chuan taksa lamah harsatna a thlen ve thei thung a ni. Kum upa lamah phei chuan an thazam (nerve) te a lo chak lova, zunthlum neiah phei chuan nerve a khawih tel thin avangin an hriatna (heat sensation) a chak lova, tui sa lutuk a bual te hian an kang (burn) hma bik a ni.