Nikum atang khan zu vanga thi leh zu kaihhnawih natna dang vanga thi an pung hluai a, Aizawl veng tinah thalai leh pa valai thi an tam tawh hle. Zep thu a cheng lo, phalna neia sapzu/a sen chi zawrh a nih hnu kum khat awrhah hian zu hi thihna thlentu langsar ber pawl a ni ta. Heti chung hian zu chhiah (State excise) atangin kumin chhung hian sorkarin Cheng vaibelchhe 43 chuang hmuh a beisei a, zu chhiah hi a tam poh zu in leh zu rui an tam tihna a ni a a, zu avanga buai an tam zual dawn tihna a nih hmel. Zu khapna dan hlip a zu zawrh phalna dan (MLPC Act) siam a nih tirh vela sorkar inrelbawlna (governance) tha lo hnuaiah chuan zu hi zalen lo se, zu ruite pawh zalen lo se tia an lo sawi kha thuneitute beng rawngah a lut si lo a. Dik tak chuan khap burna dan hlih hnu lawka ualau taka zu zawrh thut mai kha a risk a sang khawp mai. Zu hian a kaihhnawh sualna chi hrang hrang a ken tel thin avangin ram changkang zawkah pawh dan khauh tak hnuaiah zu dawr an hawng a, a in thinte pawh dan hmanga khuahkhirh an ni thin. Sum leh pai um vanga thlah zalen ngawt hi a him lo a, sorkar inrelbawlna tha lo tak hnuaia ualau taka zu dawr hawn hian chhiatna a thlen duh a lo nih hi. Aizawl veng tin deuhthaw hian zu nena inchiahpiah an duh lo pawh hi a awm khawp mai. Chhiah chungchangah pawh hian, sorkara zu chhiah lut ai tam hi a zuartute (wine shop leh ware house neitute) hian an hlep ang. Zu zuar kan ngaisang lo viau thin kha a ni ngai a, tunah chuan sorkar department hialin an zuar ta a nih hi, ngaihtuah chian chuan a zahthlak lam deuh a ni. Zu avang leh a kaihhnawih natna avanga nunna chân tam tawhzia te, hmeithai leh fahrah punzia te, chhungkaw tam takin sum leh paia harsatna an tawh phah dan te hi zir chiang ta ngat ila chuan inrelbawlna tha (Good governance) awm mumal lo chunga zu zawrh hi kan sim chiang viau mai thei a ni. Tun hnaia sorkarin MLPC Act hi a that leh that loh zir chiangtu committee din a tum pawh hi a lawmawm lamah a ngaih theih ang; mahse, MLA inthlan politics hmanrua mai mai a ni ang tih erawh a hlauhawm thung. June 9, 2016 khan MZP rorelna sang Federal Council chuan, “Mizoram chhung Bairabi-ah Rail Passenger phur a lo luh tawh avangin State pawn atanga lo kalte ILP uluk leh khauh taka kenkawh a nih theih nan Sorkar hian hmala rawh se,” tiin a rel a. Kar kal ta lawk pawh khan MPC thalaite leh ZNP thalaiten Bairabi rel lo luh lai leh a chhuah laiin a hmunah an endik a, passenger sang khat aia tam chuan theihna rel hi zan dar 8:30-ah a lo thleng thin a. Rel station bul hnaiah Mizoram sorkarin ILP check post a siam loh avangin zan thim hnuaiah vai ILP nei lote an vah darh chum chum thu an sawi. Khualzin phur rel Sairang thlenga luhtir tumna a awm tirh khan kan hnam himna ngaihtuah nachang hria mi thenkhat chuan an duh loh thu an sawi a. Dan lo a lo lut tumte lo dan theihna dan tha elkhen kan neih sa pawh hman tum loh emaw a nachang hriat loh emaw hi sorkar tha zia chu a nih hmel loh. A tak takah chuan inrelbawlna tha (Good governance) bawk hi a pawimawh chu a lo ni leh thin. Rel lo luh hrim hrim hlauh vang ni loin inchimralna kawng a inhawng ang tih hlauh vang zawka khualzin phur rel lo luh duh lote hlauhthawn kha a thleng tan mek a ni a. Hmarchhak state dangten ILP hmanga inhumhim an duh ngawih ngawih laia hetia kan hruaituten hnam himna lam an ngaihthah a nih chuan kan hma lam hun a thim khawp ang. Rel kawng hi ram hmasawnna thlentu a ni tih hi phat rual a ni lo a. Khawmuala mihring leh bungraw phurhna hlawk ber leh tlawm ber a nih avangin rel kawngin a pawh chin apiangah nunphung a inthlak danglam thin. Chutih rual chuan, rel kawng avanga hnam tlem zawk leh chak lo zawkte hnawh darh leh chim ral an nih dan pawh ram hrang hrang history-ah hmuh tur a tam. America ram neitu Red Indian-ho khu mingoten an hneh theihna leh an chim ral theihna hmanraw tangkai tak chu rel kawng (railroad) a ni. Keini pawh hi hetia kan inhumhimna ber kan phalrai chuan kan inrin loh lai hian vaiho hian min lo chim hneh hman viau lo ang tih a sawi theih miah loh. Kan ram hruaitu zingah ram hmasawnna vei ber, ruahmanna nei mumal ber Brig. Thenphunga kha chuan Sairang thlenga rel luhtir hi a duh lo niin an sawi a. Ram hmasawnna hmingpu thil chi hrang hrang kan buaipui rual hian a pawimawh zawk chu hnam himna hi a ni tih hriat a tha khawp mai. Tunlai hian mi thenkhat chuan chhiatna chi hrang hrang, lirnghing, hripui, China ral lian - thim thuah hnih an tih mai a lo thlen an ring hle a. chumi hnuah chuan Zoram thar an tih mai chu a lo thleng dawnin an sawi nghe nghe a, chu hunah chuan kan ram leilung hausakna chen a, nuamsa thei ang bera awm tawh tur niin an ring. Hetianga zirtirna mak deuh hi a khat tawkin a lo chhuak thin a, nawmsakna leh hamthatna chan chakna avangin tuipuitu pawh an tam thin viau. Politics-ah pawh hetiang hawi zawng hian mipui hruai sual an ni fo thin. Politician-ten MIP te, NLUP te an zuar a, retheite khaichhuahna tur leh ram intodelhna tur an ti a, mimal tin sum lak luh leh state pumpui sum thawh chhuah pawh nasa taka pung turin an sawi a, kut hnathawktuten an tharchhuah/siamchhuah hmangin eizawnna ngelnghet an nei dawn ti te pawhin an sawi. Hamthatna te, intodelhna te, hausakna te an tiam a; mahse, kum rei lo te chhungin an thusawite hi dawt a chang leh thin a nih hi. Chuvangin, thangtharte hi chuan mi thenkhat mumang leh politician-te thu puarpawleng mai mai ai chuan thil tak tak chauh hi buaipui ila, thawhrimna hmangin he ram hi chawikang ila, taimakna leh rinawmna hmangin he hnam hi tung ding turin rilru siam ang u.