Eng emaw lai atang khan Uniform Civil Code chungchang hian ngaihven a hlawh ta viau mai a. Mizoramah pawh kan sawi kan sawi ta ve mai. Chuvang chuan, a kamkeuna ang deuhin kimchang lo takin i lo zirho dawn teh ang u. 

Mawlmang deuha sawi dawn chuan, UCC chu India ram pumah Civil Code inang hman chungchang a ni. Chuvang chuan, mi thenkhat chuan UCC that lohna leh hlauhawmna chu heti hian an sawi thin. Mi zawng zawngin dan inang tlang kan hmang tawh anga, chu chu hnam tlem zawk leh sakhaw zuitu tlem zawkte tan a hlauhawm a, inchimralna hmanrua a ni an ti thin. 

India ram pum tana dan inang tlang hman hrim hrim hi thil hlauhawm a ni lo a, kan kal mek dan zawk a ni. Dan zirna lamah chuan General Law an tih hi a awm a, entir nan, dan hlui ni ta IPC ang chi kha. Tin, Special Law a awm leh a. He dan hi chuan huam chin a nei a, entir nan, naupang pual dan te, ramngaw humhalhna dan te, ruihhlo khapna dan te ang chi hi. General Law leh Special Law te hi India ram pumah hman a ni. Dan pakhat erawh chu Local Law an ti a, a hming ang chiah hian khawii maw ram bial chhungah chauh hman a ni thin, entir nan, Mizorama zu khapna dan ang hi. 

Kan sawi tak, General Law, Special Law leh Local Law-in a huam loh dan dang Personal Law an tih hi a awm leh a. He dan hi hnam tih dan (custom) leh sakhuana (religion)-a innghat a ni deuh ber a, inhman tawm chi a ni lo. Chuvang chuan, Hindu personal law a awm a, Muslim personal law a awm a, Christian personal law a awm. He dan hian inneih leh inthen dan te, chawmna inpek dan te, fa enkawltu leh a changtu tur ruat dan te, ro khawm dan ang chi te hi a huam ber. 

Heng Personal Law te hi lui angin han tehkhin ila, anmahni kuang theuha tluang takin, insu buai loin a luang dam dam vek a ni. Mahse, heng anmahni kuang theuha luangte hi lai pawp ila, inluan fin ta se, Uniform Civil Code a lo chang dawn ta a ni. UCC luipuia an inluan fin vek tawh dawn avangin Personal Law lui hrang hrangte hi a kang chat ve thung ang. 

India ram tan UCC hman chungchangah lentlak a rual rih lo hle niin a lang. UCC sawi mawitute chuan, sakhaw zuitu hrang hrangin dan inang hman thatna hi an sawi ring hle. An sawi fo chu, Hindu ten nupui pasal pakhat chauh an neih theih laiin Muslim te chuan nupui pakhat aia tam an nei thei tlat hi hrut rual a ni tawh ang. Personal law hrang hranga mipa leh hmei­chhe dinhmun intluktlang lo tak hi UCC-ah chuan a ni tawh lo ang an ti bawk. Personal law hi hnam inpumkhatna daltu nia ngaitute chuan UCC hian hnam inpumkhatna (national unity) a thlen ngei an ring bawk a ni. An ngaihdan chuan, India Danpui siamtute pawhin a thatzia hriain Article 44-naah an lo khung fel diam a ni an ti. An sawi ang hian, Article 44-nah chuan khua leh tuite tan UCC siam a nih theih nan ramin theihtawp a chhuah ang tih a inziak ngei e.  

A duh lo lamte erawh chuan, dan inang tlang hman ni ta se, sakhaw hrang hrang zuite hrut rual kan nih tawh dawn avangin, sakhaw zuitu tam ber te (Hindu an tihna) hman thin Personal Law hi kan zui berin a rinawm a, hnam lian zawk karah hnam te zawkte an inzep ral ang a, a tlem zawkte hnam chin dan leh serh leh sang te chu phum bo a ni ang an ti ve thung. Mizorama kan hman mek Mizo Inneih, Inthen leh Roluahna Dan, 2014 pawh hi kan hmang tawh dawn lo a ni. India Danpui chungchangah chuan heti hian an sawi ve thung. UCC hi India Danpuiah chuan a chuang ngei e, mahse, ramin a tih ngei ngei tur leh a bat ni loin, hman atana tha nia a hriat chauh a ni. Chumi tichiangtu chu, UCC chungchang awmna hi Directive Principles of State Policy huangchhungah a ni an ti ve thung.  

A tlangpuiin, hnam tlem zawk leh sakhaw zuitu tlem zawkte chuan UCC hi an duh meuh lo niin a lang.   

UCC sawi nikhuaa Mizoten kan sawi chhuah ve ziah chu India Danpuiin Mizoram tana a bika humhalhna (special provision) min pek thu hi a ni. Hei hi India Danpuia Article 371-G-ah a chuang a. He ‘special provision’ avang hian, heng a hnuaia dan sawite bikah hi chuan, Parliament dan siamte chu Mizoram Legislative Assembly-in hman ve tura a pawm a nih ngawt loh chuan hmang tura barhluih theih kan ni lo. Chungte chu – (i) Mizo sakhaw nun leh khawtlang nun chungchang khawih thil a nihin, (ii) Mizo hnam dan leh hnam dan hmanga thubuai remna chungchang khawih thil a nihin, (iii) Ram leilung neih leh neih chhawn dan chungchang khawih thil a nihin. 

Hei hi erawh hre tel ila, India danpui hi vawi tam tak siam that a ni tawh a, chuvang chuan special provision hi paih hun a la thleng thei tih hi. 

Mi thenkhat chuan UCC hi sakhuana nena insubuai thei thil a ni a. India ram hi sakhaw zalenna ram a nih bawk si avangin kalpui tak tak a nih an ring lem lo. He ngaih­dan hi ril tak atanga lo chhuak a ni. Chuvang chuan, India rama sawrkarna leh sakhuana inkungkaih dan leh kal kawp dan hi hriat chian a tul em em a ni.  

Khawvel ram hrang hrangah sakhuana an kal pui dan hi hlawm lian tak tak pathumah a then theih awm e. A hmasa berah chuan, ram thenkhat chu sakhaw tih bik (state religion) nei an ni, Thuthlung Hluia Israel/Juda ram dinhmun ang kha. Ram thenkhat chu, sakhaw tih bik nei lo ni mai loin sakhaw thilah chuan sawrkar inrawlh miah lohna ram a ni. Ram thenkhatah erawh chuan sakhaw tih bik awm lo mah se, sakhaw chet velnaah sawrkar a inrawlh fo thin. Mi thiamte chuan India dinhmun chu a pathumna hi niin an sawi thin. 

Eng pawh ni se, UCC hi kan hmang dawn nge hmang dawn lo tih chu hunin a la hril turah ngai ila. Khawvel a than ang zelin hnam tih dan hi a inthlak danglam nasa em em a, UCC hmang lo pawh ni ila, hnam chin dan (custom) hi chu kan thlak hret hret zelin a rinawm. Sakhaw zirtirna erawh a ngai reng dawn a, zirtirna thar kan dawng tawh dawn lo. A pawimawh ber chu, a hming (UCC) aiin a thuchuang (provision) hi kan zir chian ber tur a ni ang.