Tun hnai khan Prime Minister Narendra Modi chuan Bhopal-a BJP party mi leh sa te intawhkhawmnaah UCC (Uniform Civil Code) hman vat a duh thu a sawi a, hei hian ram chhung hmun hrang hrangah inhnialna leh dodalna a chawk chhuak nghal a. Mizoramah pawh nizanah leh zanin inkhawmah te hian kohhran hrang hrangin Uniform Civil Code hman a nih lohna turin tawngtairualna kan nei dawn a ni. Mizoram Chief Minister Pu Zoramthanga pawhin Law Commission of India hnenah lehkha thawnin, India ram pumah UCC hman tumna chu MNF party chuan an pawm theih loh thu leh, Mizoram Legislative Assembly pawhin lungrual taka UCC dodalna official resolution an pass tawh thu a hrilh bawk. 

Nagaland sawrkar hotute pawhin an Chief Minister Neiphiu Rio hoin Nilai ni khan UCC chungchang hi Union Home Minister Amit Shah an sawi pui bawk a, Home Minister chuan UCC in India hmarchhaka christian te leh tribal te a huam ve loh tur thu Nagaland sawrkar hotute hi a lo hrilh a ni. Hman deuha kan chai luai luai Citizenship Amendment Bill pawh kha North East state te huam tir lo zawngin Central sawrkar hian a lo her rem tawh a, an duh phawt chuan UCC pawh hi North East State te huam lo hian a her rem leh thei mai ang. Hetih rual hian UCC a ni emaw, CAB pawh ni se, keini North East State min huam loh avang ngawt khan a that phah chuang lo a; Dan tha lo, India ram mipui impumkhatna tithuanawp thei dan hi hmang lo tawp ila duhthusam a ni.

Pu Nehru khan India ram hi pangpar huan mawi tak, pangpar chi hrang hrang mawi taka an par vul chukna nen a lo tehkhin tawh a. Hnam hrang hrang, tawng hrang hrang leh sakhaw hrang hrang betute zalen tak leh inngeih tlang takin kum tam tak he ramah hian kan lo cheng za tawh a, kan inchhuanna ber pakhat pawh hnam hrang hrang leh nun dan phung (culture) inang lo tak tak te lungrual taka kan cheng ho thei (Unity in diversity) hi a ni. He kan inlungrualna, kan hnam lungphum pawimawh tak hi Uniform Civil Code hian a sawi nghing mek a ni. UCC hi hman a nih chuan inneih leh inthen, ro khawm leh fa lak chungchangah te dan inang tlang kan hmang tawh ang a, kan hnam tihdan phung (customary law) leh kan k ristian dan te chuan awmzia a nei tawh lo ang. Hnam tenau te leh sakhaw dang betute nam nul a, dan thuhmun (uniform civil code) inbarh luih hi a fel lo tak zet a ni.

British in India ram min awp hma khan Mughal hoin India ramah ro an rel a, anni kha Islam sakaw betute an ni. Muslim anni nangin Mughal lalte kha an rilru a zau a, sakhaw thuah pawh India rama cheng mi tupawhin zalen taka mahni sakhua theuh an biak an phal sak a. Chumai bakah Mughal lal (emperor) ropui tak tak te khan an thachhang dawltu, an khawmbawl (minister) atan khan Muslim chauh ni lo Hindu te, Sikh leh sakhaw dang dang betute pawh an ruat nawk bawk. Sakhuana avanga chi intliarna a awm lo a, Mughal ho hun lai khan India ram chu ropui takin a lo par vul tawh reng a ni. British-in min awp hnu khan kan inkarah inhuatna hem an thlak a, ‘divide and rule policy’ hmangin min then hrang a, chi leh chi inhuatna (communalism) an theh darh a, a bikin Hindu leh Muslim te chu an in haw ta em em a, British lo lan hma zawnga inngeih taka khawsa tlang dial dial thin kha ui leh kel thlun pawlh ang an lo ni ta a, kum 1947 a India ram a independent meuh chuan kan ram chu hawlh phel a lo tul ta a, Pakistan ram a piang ta nawlh mai a ni. India ram phel chhan leh Pakistan leh Bangladesh ram pian chhan hi chi leh chi inhuatna, kan inlungrual lohna rah chhuah a ni. India ram kan independent hnuah kum 70 chuang zet inlungrual takin he ram ropui takah hian kan cheng ho tawh a, tunah hian British policy (divide and rule) ang thawthanga tha lo Uniform Civil Code chuan min rum thaih leh mek a, a sawp chu nasa tak a ni thei.   

Mizo te kan him em? Mi thenkhat ngaihdan chuan Uniform Civil Code hi Parliament-ah pass pawh ni teh reng se Mizoram chu min huam thei lo tih tih a ni. Heng mite’n an tanchhan ber chu India leh MNF inremna thuthlung, Peace Accord, 1986 kha a ni a. Chu inremna thuthlung, India danpui Article 371 G a ziah luh chu UCC laka kan himna tur, min phentu lungpui tha takah an ngai a ni. Chu thuthlungah chuan ‘Parliament in dan a siam eng pawh, Mizo te sakhua leh hnam ziarang, hnam nunphung leh tih dan phung nghet (customary law) a an lo neih tawh te chu Mizoram Legislative Assembly in a pass ve phawt loh chuan Mizoram State-ah hman ve theih a ni lo ang (no Act of Parliament in respect of religious or social practices of the Mizos, mizo customary law or procedure, administration of Civil and Criminal Justice involving decisions according to Mizo Customary Law shall apply to the State of Mizoram unless the Legislative Assembly of Mizoram by a resolution so decides)” tih a ni a, he UCC hian kan sakhua leh kan hnam tihdanphung (customary law) a khawih miau mai a, kan MLA rual te’n an pass ve phawt loh chuan kan state ah chuan a hman theih dawn loh tihna a ni a, kan him a ni mai law’m ni?

Amaherawhchu, India danpui (constitution) hi Persia leh Media ram dan anga nghet a ni lo a; Eng bung leh chang pawh hi tih danglam theih a ni a, vawi tam tak tih danglam (amend) a ni tawh reng a. India ram state zinga mahni puala danpui (constitution) nei awm chhun, state dangte aia dinhmun tha fal nalh Jammu and Kashmir State meuh pawh sawrkar laipui chuan kum 2019 khan an state nihna a hlih sak mai a, Article 370 a an hamthatna chu thai boin Union Territory dinhmunah a hnuk hniam mai a ni. Hetiang chiah hian India constitution Article 371 G pawh hi tih danglam emaw thai bo a ni ve thei tho a, ‘Keini zawng kan chan bik hi kan vannei e’ tia him ta bik riaua kan inngaihna hi a him lo thei tho bawk.