Mizoram Assembly in Zu zawrh theihna dan thar the Mizoram Liquor (Prohibition and Control) Bill,2014 a pass ni tak July 10,2014 khan Parliament-ah finance minister Arun Jaitley chuan a budget hmasa ber tur a pharh a. Budget pharh tak 2014-15 chhunga sorkar laipui sum lak luh tur leh hman tur ruahmanna hi kum dang ang thoin Mizoram lamah chuan chai zui leh sawi zui hlawh vak lem lo mahse, tunhma aia budget pawimawh zia kan hriat ve tak deuh deuh avangin a tlangpui tarlang pahin Mizoram leh hmarchhak bial tana pawimawh thenkhat sawi zui ta ila. Finance minister hian budget pharh ruala a thusawi nan darkar 2 leh minute 7 lai hun a hmang a, a thusawi kar lakah hian minute 5 chhung a chawl nghe nghe a ni. Budget speech-a langsar thenkhat chu : sorkar sum hmuh leh hman dan tur (Public finance) ngaih pawimawh a ni anga, thil man to (Inflation) khuahkhirh a, chhiah lak dan phung awlsam zawk leh mawlmang zawk a siam tum a ni a. Thilsiam chhuahna (Manufacturing) lam ngaih pawimawh zual a ni dawn a, thalaite tan eizawnna hna thar siam belh teuh tum a ni a, sorkar hmasa kihhnawk a tang rei lo a a rang thei ang bera insiam that tum a ni bawk. Tuna India ram dinhmunah hian harsatna chi hrang hrang hmachhawn mek leh hmachhawn tur a tam hle mai a. Hna thawh tur nei lo thalai tam tak tana eizawnna siamsak a tul a, mipui vantlang mamawh chi hrang hrang - tui thianghlim in tur te, hriselna lam te, kawngpui tha te, hmasawnna ruhrel hrang hrang te hi sorkar hmalakna tur pawimawh tak a ni bawk ang. Tun hnaiah India ram economic growth rate a sang lem lo hle a, thil man to (Inflation) in harsatna a thlen mek bakah ram hrang hrangten economic a harsatna an tawh mek te hi sorkar tan ngaihtuah tel loh theih a ni lo ang. Hengte hre reng chung hian budget tharah hian tun atanga kum 3-4 chhungin ram economy thanna hi za zel a 7-8 tling tura ruahman a ni a, economy ngelnghet taka siam tum a ni bawk. Mipuiin beiseina sang tak nen hmanni lawkah khan sorkarna an siamtir tih finance minister thar hian a hre chiang a, budget tharah pawh hian mipui lungawi lohna tur chi hmuh tur a awm meuh lo. An sorkar theihna tura vote petu langsar thalai rualte hawi zawng ruahmanna (policy) langsar tak pathum budget-ah hian hmuh tur a awm a, chungte chu - Digital India leh, Skill India leh Smart Cities te hi a ni. Thalaite, an thiamna leh theihna tihpun dan tur (Skill development plan) ngaih pawimawh a ni dawn a, chu chuan hnathawk tlak, rawih tlak leh chhawrnahawm zawka thalaite chher chhuah a tum ber a ni ang. Ram changkang zawkte ruala ke pen ve turin kum sawm chhungin thalai tan eizawnna hna thar maktaduai za siam tum a ni bawk. India ram khawpui tam takten kawng hrang hrangin harsatna an tawk mek a, budget speech-ah hian khawpui changkang siam a tul thu tar langin finance minister chuan smart city 100 din a nih tur thu leh chumi atan chuan Cheng vbc 7,060 dah a ni thu a sawi nghe nghe. Ram economy siamthatna atana pawimawh em em hmasawnna ruhrel hrang hrang (Infrastructure) din turin sorkar thar hian tanlak a tum hle a, budget tharah hian sorkarin nitin kawngpui tha Km 23 a sei siam zel tum a nih thu tarlan a ni bawk. Computer leh a behbawm hmanraw dangte mi tam zawkin an hman tangkai theih dan tur ngaihtuah a ni ang a. Hemi atan hian mitin huap tur 'Digital India' programme buatsaih a ni dawn a, thingtlanga chengte tan internet chak chi an hman theihna tur (Broadband connectivity) siamsak a, IT hmanga changtlung zawka hnathawh uar tum a ni. Thingtlang mite leh school zirlaite hnenah Information Technology zirtirna pek a ni dawn a. Heng atan hian Cheng vbc 500 ruahman a ni. Budget thar pharh a nih apianga mitin ngaihven thin chu chhiah chungchang hi a ni. Sorkar laipui budget tharah hian chhiah kalphung felfai tha zawk a siamthat a, chhiah lak dan thar GST kalpui tum a nih thu a chuang a. Ram dang atanga lakluh clour TV a chhiah lak tihtlem a nih dawn avangin LCD leh LED TV man a tlahniam duai dawn a. Chutihlaiin, vaihlo hmanga siam thil hrang hrang atanga chhiah lak tihpun a nih dawn a - tuna cigarette atanga chhiah 11% lak mek chu 72% lak tur a ni tawh ang a, a man pawh a to phah viau dawn a ni. Pheikhawk atanga chhiah lak chu a zatve a tihtlem a ni dawn thung a, a man a tlawm sawt ang. Ram chhung sum deh chhuah tihpun tum a ni a, chhiah ni lo thil danga pawisa hmun (Non-tax revenue) a pung bawk ang a. Sorkar laipui leh mithiamten an ngaimawh thin em em sum indaih lohna (fiscal deficit) tihhniam tum a ni a. Leiba tlingkhawm tihtlemna turin mumal taka hmalak dan tur ruahman a ni bawk. Prime minister-in a ngaimawh em em pawisa chheprel 'Black Money' hi buaipui tak tak tum a ni. SC/ST leh hnam tlem zawkte venhimna tha zawk pek tum a ni a. Employment exchange kalphung thlak danglam a career centres a leh vek tum a ni a, chumi atan chuan Rs 100 crore dah a ni bawk. Infiamna lam ngaihpawimawh a ni dawn a, discipline thenkhat (Shooting, wrestling & boxing) atan National Sports Foundation din thar a ni dawn a, Rs 200 crore ruahman a ni a. Kan thenawm Manipur-ah Sports university din a ni dawn nghe nghe. Budget-ah hian ram venhimna lam atana sum hman tura ruahman zat chu Cheng vbc 229,000 a ni a, kum hmasa aiin a pung nasa hle. State zawng zawngin AIIMS ang chi damdawi lam zirna hmunpui an neih theihna turin hmalak a ni ang a. Sorkar kalphung/inrelbawlna tha (Good governance) chawisanna atan Cheng vbc 100 dah a ni a, tui thianghlim in tur a awm theihna atan Cheng vbc 3,600 dah a nih bakah zirna hmun tha IIT 5 dang leh IIM 5 dang dinna turin Cheng vbc 500 dah a ni a. Mitdelte chhiar theih tur pawisa note siam a ni bawk ang. Budget tharah hian hmarchhak bial hming langsar tak hmuh tur a tam lem lo a, mahse, hmarchhak bial tana chhawr theih tur ruahmanna hrang hrang erawh a awm nual tho. Hmarchhak biala kawngpui tha siamna atan Chen vbc 3000 dah a nih thu Arun Jaitley hian a sawi a, helai biala chengten inlak hran duhna rilru kan put thin tireh tura rail kawng siam a hmanhmawh thlak thu a sawi bawk. Manipur a Sports university hawn tur hi india ram pum tan bakah hmarchhak bial tan a tangkai hle turah ngai ila. Khawpui lian hrang hranga hmeichhiate venhimna tura hmalak nan Cheng vbc 150 dah a ni a, he hmalakna hi hmarchhak hmeichhia India khawpui hrang hranga chengte hi a chhawr tangkai ber tur an ni thei ang. Hmarchhak biala organic farming tihhmasawnna atan Cheng vbc 100 dah a ni hi helai biala chengte tan thil lawmawm tak a ni a. Organic food products lama hmarchhak hmun thenkhata hmalakna tur ruahman a ni bawk. Budget thara Tribal Sub Plan atana Cheng vbc 7789 a zet dah a ni hi a hmang tangkai thei ber tur chu hmarchhak biala chengte kan ni ang a, state sorkarin ruahmanna a siam thiam a, hma a lak that erawh a tul ang. Hetiang a nih lai hian zirlai pawl thenkhat leh politician thenkhat chuan budget tharah hian hmarchhak bial ngaihpawimawh a ni lo niin an sawi ve mek thung.