Huang neih loh hi ka’n tum deuh thin a; MAHSE, tute emaw hian min nawr leh thin sia. Tun April atang khan War Veteran lawmman (gratuity) sawrkharin a let tawpin min pun hi ka lawm tak meuh a ni. Ka hriat sual loh chuan tunah hian War Veteran lawmman dawng phak chu mi 52 kan la dam ve tawk tawk a nih chu. Chumi awmzia chu Indopui II-na (1939-45) laia sipai tang hman tihna a ni.

Kei VE pawh hi naupang têin ka lut ve hman hram chauh a ni. Aizawl atangin Hal. Chalchhûnga hoin Aizawl-Silchar via Kolasib chu ke ngatin kan kal a ni. 1945 Good Friday kha Rengte kawnah kan hmang. A lum sia, kawr ha peih kan awm ,o. Partition hma a nia, via Sylhet (tunah Bangladesh)-in Shillong kan thleng a ni. Sylhet-ah chuan Rest Camp-ah kan awm a, kan piah chu sap sipaiho rest camp a ni. Chaw eite hi a rual a niang, keini chu thlengte nei ve hek lo i, Hav. Chalchhunga’n, “Tlangval khan vaiza hnah khi han thlak ru le,” a’n tih hian thing thiam 3/4 hi Vaiza kungah an hlukchawm ta mai thin a, sap sipaiho chuan mak an ti thei khawp mai. Min hmu ramhnuai mi awmin ka hre thin.

Assam Regt. chu Keren Line-ah an lo insawn tawh a, tichuan kan thlen chuan keimah chauh chu la in-enroll ve lo ka ni (Aizawla an tih ni khan sangha ka vaw vei a!) Tichuan, medical exam nei turin Regimental Medical Officer hnenah ka kal a, “Kum engzat nge?” “Kum 18,” tiin ka chhang a. DAWT SAWI SUH tiin kum 17-ah min dah a. Ka san zawng ilo chu a ardali (orderly) Biakliana a lo ni hlauh mai a, ft 5 leh inches khat chauh, ka awm len lam pawh inches 29 chauh ka la ni. Mahse, Biakliana chuan ka san zawng 5’4”, awm len lam 34” tiin a report mai a. A ziak ve ta zel mai! Tichuan, rawngrut (recruit) ka ni ve ta a nih chu. Tichuan, 17-4-1945 atang chuan Rawngrut (clerk turin) ka ni ve ta a nih chu. Ka thiante zawng zawng kha Mizoram atanga lak vek an nih avangin, kei chu ka mal ngat mai a ni.

Lu an met kawlh vek sia, mih kawlh turin ka han thu ve veng vawng a, min mehsak hma chiahin civilian clerk pakhat a lo kal a, “Hei hi chu Clerk a ni a, a lu met kawlh suh, inches khat leh a chanvein mehsak rawh,” a tia. Ka kalpui P.Ngurkhuma te zawng zawng an kawlh tawh si, zing exer tlan velte chuan ka dum va va bik mai a, a leh nawm lohzia chuh. Dan hre ve pha lo Subedar/Jemader-ho khan meh kawlh tur an ti sek mai bawk sia.

Kan uniform dawn chu... khawimaw lai Rajput/Punjab sipai dawn hlui ni awm tak, inting ang mai uk khur mai hi lian em em mai a nia. Ngurkhuma nen chuan a kap, a chhing tawka kan dah hian a hawng tlang chu kan darah a awm. Engtin tin emaw kan tawn bet mai. A ke lam chu keiin thleh 5-in ka thlep a, Ngurkhuma chuan thleh 7! A dawn a len zawk avangin.

Tuk khat chu Commandant Col. H.E.Madge leh Adjutant D.S.Elwell leh Record Officer Lieut. Jibeswar Chetia ten min ko a, kan han intlar a, saptawngin min bia a. Lieut. Chetia chuan Ngurkhuma nen kan pahnihin min pawt hrang a, “I’ll take these two boys,” a ti nghal a. A tuk atang chuan Family Allotment section-ah min dah nghal a ni. 1st Assam Regt. sipai, Burma rama indonaa awmten an chhungte an hlawh an thawn tur kha an hlawh atanga deduct-in Money Order-in kan lo thawnsak a ni ber mai.

Kekawr tlawn chuti khawpa thawl chu a ni tawh bakah kan bun tawk ve tur ammunition boot a awm ve lo leh ta dahrual a, ke ruakin kan office thin. Lukhum a awm lo bawk. Chuti chung chuan kan office ve tho mai. Tuk khat chu office kawngah Lt. Davinson-a ka tawk hlauh mai a, intisipai em emin, lukhum pawh khum si loin salute ka’n pe ve e ka tia, ani chuan, “Tumhara numer kia hai?” tiin min zawt a, muang em emin, “4... 3... 2... 8...,” ka ti hman chauh a, mi thar 1-4-45 hnua lak ka nih a hre mai a niang, “Bloody Hell... you may go,” min ti tawp mai nia!

April 17, 1945-a lut chauh niin Basic English exam-naah leh clerical exam-naah ka pass ta bik mai si a, ni 75-na... 1-7-1945-ah Havilder clerk ka kai ta si, bel thum ka bel a tul ta si, ka la te nasa si (chair-a ka thut hian lei ka rap pha lo!), ka bel zak em em mai a, hmun 3-ah hook ka vuah a, a tul tawpah chauh ka vuah thin. Chuti lo chu 1st Batallion lo chhuti-ten min hmuh hian min en vawng vawng zel a, a zahthlak ka ti a ni ber. Tum khat pawh ka pawh thlak laiin Jem. Head clerk Phukanan min hmu a, “I bel duh loh chuan ka degrade ang che,” min ti hial nia. Type writer hi kan la hriat vak loh avangin chhut kan châk hlawm khawp a, A Coy Learner Clerk, Aua pawhin love letter a lo chhu emaw ni, an senior Hav. Clerk khan, “Type suh,” a tia, a type lui a, vin zet hian, “I say, stop typing...,” a ti tuar mai a. Aua chuan Mizo tawngin, “Parte tih chu ka la chhu reng reng,” zuk tia!