Mizoram Assembly budget session ka en zanah chuan, thil mak ka tih tak takte ngaihtuah zuiin khumah chuan ka tal ka tal a. Ka fapa chu ka ko a. Ka nupui pian champhaphak denchhena ka thil pek tur leia bazara min va kalsak turin ka tir a. Fapa thuawih tih takah, "Aw le, khawi pawisa!" a ti nghal mai a. Ka nupui tan chuan 'Hermès bag', Rs 1,00,000 man chi ngat pek ka duh a ni, a lem a en a en thin tih ka hria alawm! Ka fapa, ka hmangaih tak a nih avangin a ngaihtuah leh lei hah man lawmman pek tur hisap sak nghalin Rs 1,05,000 ka pe a. Rs. 5000 laite chu hlawh ve rawh se, Aizawlah  'Hermès' dawr pawh a awm si lo a, hla taka kal pawh a ngai mai thei si! Chu 'bag' ngei chu pek ka duh ve si.

Ka fapa chu a thatchhe phian a lo nia, pawisa chu a it tho bawk si a. A nau a ko a. A tir chhawng a, "Ka nu hnena ka pa pek tur 'bag' lo ngaihtuah teh, Hermès bag aw, kha pawisa Rs 85,000 hian aw," tiin 'bag' awmna tur hmunte chu a hrilh zuah zuah a. Ka fapa zawmthaw si, sum duh ve si chuan Rs 20,000 chu a pawt hek ringawt a nih chu! A nei hmiah! Nula zingah inti pawisa nei fein a khawsa leh ringawt ang chu!

A nau pawh a dang chuang lo! Rs 10,000 a pawt hek te te a, Rs 75,000 ken tirin eng tin tin emaw tute emaw a tir chhawng a. An intir chhawng duat duat zui ta zel a ni awm e, an tih zel dan pawh ka hre vek lo e! 

A tawpah chuan 'bag' chu a lo thleng ta a. Mahse ka sawi ang chiah chu a ni lo nasa hle. 'Hermès' tih inziah dan pawh a danglam, 'Harmis' a inti daih! A rawng erawh a inang, bag a ni ve tho bawk. Engmah sawi lem lo chuan ka fun a, ka nupui chu ka pe ta a. 

A man min zawt a. Rs. 1,00,000 a nih thu ka hrilh a. A mak a ti a, a lawm ta lo deuh khawp mai a. Rs. 1,00,000 man 'Hermès bag' a lo en thinte nen chuan a inthlau bawk a ni. "A lem a nih hi! Hetiang te chu Rs 10,000 man vel lek alawm, tunge i tirh a, pawisa uiawm lutuk!" a ti a. Kei lah chuan, "E, a tha, pawisa chu ui suh. I hlimna tur a nih chuan kan ba zel ang. Kha, i 'bag' it leh duh tak ngei kha a nia ka ngaihtuahsak ve che. Lawm nachang hre ve teh a! A spelling kha an ziak dik lo palh a niang," tiin ka sawi mam puat puat a.

Ka pawisa pek atanga lo ei hektute ko a, zilh a, an nungchang siam that tum ta lo chuan, Rs 1,00,000 man lei tura ka tih ten pawisa hmang zo vek sia Rs. 10,000 chauh man 'bag' ka chah ang ni miah si lo an lei chu kan fak mawi ta a nih chu! A lei tura ka tirhte kha ka laichinte an ni ve bawk sia! A va buaithlak tak em!

Ka fate zawmthawt zia leh, thawk mang loa pawisa tam tak hmuh an tum dan leh, ka thil lei tir tum ni hauh lo an lei ta ngawt chu dik ka ti hauh lo. Hlep ru teuh chung chuan thil tha a lei theih loh reng ang chu! Mahse, a nu lakah chuan ka chhan tlat si nia maw le! Ani lahin an nungchang chhiat zel tur thu a sawi a, zawmthaw si, sum duh ve ringawt si ka fate hmalama hun ngaihtuahawmzia a sawi thung a. 

Ka thilpek pawh chu kan hlimpui hleithei ta lo a.Ka inhau ring ta tulh tulh a, ka muhil chu ka harh ta hlawl mai a.

Assembly session laia contract hna hralh chhawng duat duat an sawi, mut dawna mak ka tihzia leh a ngaihna ka hriat lohzia, an hna a that theih loh dan tur zia ka ngaihtuah zui kha ka mangphan deuh a lo nih dawn hi a, ka ti a! 

Ka fate thil tidik lo hum a, an dik lohna sawi mam a, apawng apuia tan tlat a, siam that tum tlat lo 'PA' nih hi sim a, an sual an sim theihna tura kaihhruaina dik pek a, a tul chuan hremna lekkawh zawk chu chhungkua ka enkawlna kawnga 'PA'  hmasawnna zel tur a ni tih inngaihtuah chung leh, zawmthaw chunga sum neih ve phet tum loa,  rinawmna nunpui chunga thawkrim tura fate zilh zui tum tawh tak chung chuan ka muhil leh ta a.