Dr Hrekima Titi

ZEBRA CROSSING

Dr. C. Lalhrekima - Dec 12, 2021

Kan nunah hian mi dang leng ve se, khawvel kan hman mekah hian mi dang tan remchang siam ve ila!

Ka duty-na lam pana ka kal chu Temple bula traffic point-ah din a ngai a. Vaivakawn lam atanga lo chhuak chho lirtheite kal tir ve an ngaih avangin Khatla lam atanga kalte chu kan din lawk hun a ni. Ka hmaah chuan, din ngai ve tho, scooty khalh nula chu Zebra Crossing lai takah chuan a ding teu mai pek a. Kei chu, intifel takin, zebra crossing rap lut lo chiahin ka ding chat thung a, fing bik hi ka’n inti khawp a! 
    Zebra crossing chu a hmang tangkai tur tak, kea kalten an rawn zawh phei ta ngei a. Scooty ding chu an hel zak zak ta mai. Nu pakhat phei chuan a khalhtu chu a en deuh zuk zuk a, a hmel atang chuan hmeltha a tih vanga melh a nih loh hmelin ka hria. 

Zebra crossing hi lirthei tlan theihna kawngpuiah, kea kalten kawng an kân ve theihna tur hmun awl zuahna tura siam a ni. Aizawla kan hmanna a la rei lo bawk a, traffic jam karah pawh Zebra crossing zawng zawng luah khat veka lirthei ding tlat ka hmu fo. 

Chumi tlaia ka haw lamah chuan, Treasury square ka tlan pelh thlak dawnah, Governor in lam atanga motor lo chho, jam avanga ding thup zinga Zebra crossing lai taka scooty khalh nula bawk lo ding leh tut mai chu pulit-in a hnung tawlhtir mek ka hmu leh bawk.

Zebra crossing awmna apianga din ngawt tur a ni lo ang, lirthei a tam loh a, kawngpui a thawl chuan tlan tlang mai tur a ni. Zebra crossing bulah, lirthei tlan zel thei loa din a ngaih tho tho chuan, kea kalten kawng an kânna remchang atan, hmun awl zuah nan, zebra crossing lai taka ding loin, a thlen hma chiahin din tur a nih hmel. Tichuan, kea kalten thlamuang taka kawng an kân ve theihna hmun remchang kan pe dawn a ni. 

Ka tlan pah chuan ka ngaihtuah zui neuh neuh a. Kan nun leh kan khawvelah hian mi dang tan hmun awl zuah ve hi a lo ngai khawp mai. Mi dang ngaihsak lek loa mahni rem dan dan leh duh dan dana nun hman pawp pawp mai hi a fel dawn lo. Mi dang tana kawng ken nachang hriat ve hi nunhonaah hian a tul fo dawn a nih hi. 

Mi chanai zawng zawng pawh chhuh duh, mahni pum a puar dawn chuan mi dang riltam pawiti miah lo, a awm awm hui duak duak bik zelte hian ram leh hnam an tikhawlo thin. 

Kea kal ten thlamuanga kawngpui an kân ve theihna turah pawh lirthei neite kan ding khat hmuk a, thlaphang reng rengin kawng kân tumte an hawi ruai ruai thin ang hian, mi dang tana remchang tur kan ngaihtuah ve miah loh avangin tute emaw hi chu an lo mangang viau thei dawn a lo ni. 

Kan nun traffic buai tak karah hian, mi dang tana kawng ken ve hun, din ve hun, chawlh ve hunte a awm ve tur a ni. Chuti a nih loh chuan mi hnawksak kan ni fo thei dawn. Accident-te pawh a thlen phah thei ang. 

Kha nula, tlan zel thei chuang lo, hmasawn thei chuang lo, hma lam pan thei rih chuang lo khan, mi dang hmasawn tur, hma lam pan tur kawng kha a dal tlat. 

He khawvel hi ka khawvel bik a ni lo a. He khua hi ka ta bik a ni lo a. He kawngpui hi ka mi mal ta a ni lo e. Leia malsawmna dawn tur awm ang ang hi ka ta vek tur a ni bik lo. Hamthatna leh remchang hi mi dang ta tur pawh a ni ve bawk e. 

Kan nunah hian mi dang leng ve se, khawvel kan hman mekah hian mi dang tan remchang siam ve ila nun ho hi a nuam lehzual ang maw le!

Share now