Kawng tinrengah hma kan sawn tial tial a, kan changkang tial tial a, thil tih a awlsam tial tial a, hetih lai hian kan zirna (quality of education) hian hma a sawn ve zel em le? Nge, a hnungtawlh zawngin kan kal zawk? Ngaihtuah tham tak a ni.

Hmanlai chuan pawl 6 pass chinte chu Primary school zirtirtu tlaka ngaih an ni mai thin. Lawr (Lower Primary School) zirtirtute kha pawl 6 pass an ni deuh mai a, mahni chauhin sikul pakhat an en kawl a, subject zawng zawng an zirtir a, an zirtir chhuahte kha mi chhuanawm tak tak an ni nawk mai. Tunlai pawl 6 pass-te hian Primary school hi zir tir ve dawn se, zir tir thiam loh an ngah viau mai thei.

North-East pum pui Assam state hnuaia kan awm lai khan Assam Board khan pawl 10 exam pawh a conduct mai thin a. Assam Board hnuaia Matric First division-a pass chin ngat kha chu u tak an ni, IAS tling tura ngaih an ni tawp mai. Rin ang ngei ngeiin an tling mai reng bawk a. Manipur Chief Secretary hlui, Pu PC Lawmkunga te, Mizoram Chief Secretary hlui, Pu M Lalmanzuala te hi vawi khat exam-naa IAS tling thei an ni a, Matric chu Second Division-ah an pass a ni.

Tunlai hian Matric result a han chhuak a, a za tel teh meuhin distinction-ah an pass a, letter mark an hmu zawih zawih a, top ten-a lang chin ngatte chuan full mark an hmu lo chauh a ni. Mahse, heti chung hian Central Service leh All India Service Exam lamah Mizo hming a lang thei ta reng reng si lo. Eng vang nge? Kan zirna quality hi a tha tawk lo em ni ang? Zirlaite hian mark an hmuh san ang hu hian thiamna tak tak hi an pawchhuak lo a ni hial em?

Tun laia kan lehkha zir dan kalphungah hian exam-naa tihthat ngawr ngawr te, result neih that ngawr ngawrte hi kan thupui ta lutuk a ni lo maw? School tha kan tehna ber chu board exam-a an result-ah a ni bawk si a. Hei vang tak hian private school tam tak hian board exam-naa tihthat tumin an bei ta vak mai ni berin a lang. Zirtirtuten question hlui uluk takin an zir chiang a, exam-naa pawimawh tur nia an ngaih te chu an thur chhuak nghauh nghauh a, note tha takin an siam a, chu chu an zirlai te an by-heart tir ta chiam a, result tha tak an lo nei ta mai thin niin a lang. Board exam-naa an result a that viau chuan miin an bawh ang a, an hlawk dawn tih kha an hre khiau mai. Amaherawhchu, exam-naa pawimawh tur chuah zir lawr den den hian thiamna tak, a bulfuma subject matters manna tak tak a neihtir ngai lo. Board exam-naa pawimawh tur chuah zir lawr den den tan Civil Service-a inziah tlin tum chu a har khawp ang.

Kan mi thiam hmasa, zofate zinga BSc leh BD pass hmasa ber Rev Zairema khan, “Pass tumin lehkha ka zir ngai lo, thiam tumin ka zir thin,” a ti mai a, a thiam reng bawk a. Rev. C.Rokhuma phei chuan, “Rev Zairema hian ka zawh apiang a hre zel,” a ti nia! Exam-naa pass that tuma lehkha zir leh thiam tak tak tuma lehkha zir chu a dan a dang daih a ni. Thiam tum tak taka zir chuan phek khatna atanga phek tawp ber thleng khan inang tlangin an zir pawp mai a, an vai hma tawp mai a ni. Chutianga lehkha zir an nih avang chuan an zir chin chinah an chiang a, an thiam a nghet a, an rawn tlak viau thin reng a ni. Tunlai zirlai tam tak, exam-naa division sang fu si, an zirlaia mi ngei ngei pawh sawipui hleih theih loh, titipui theih loh khawpa subject matters man lo hi an tam mai. Exam-naah erawh an ti tha leh phian lawi si.

Kan zirna hi kan tihmasawn (improve) dawn a nih chuan zirtirtu lak atanga kan uluk a, kan duh tui a, kan fimkhur hi a tul ngawih ngawih a ni. Ram changkangah chuan pawl hniam lam, elementary stage kan tihte hi an ngai pawimawh em em a, zirtirtu tur pawh an duh tui bawk. Keini ramah chuan Elementary School zirtirtu atana kan lakte hi zirnaah pawh tui lem lo, politics-a duhsaktu an neih avanga zirtirtu ni ta mai an ni nawk mai. A then phei chu ruihtheih thilah an la fihlim lo zui. Khua hi a var lo a ni e. Elementary school zirtirtu lak kawnga kan duh tui lohzia te, duhsak zawngte thun maina atana kan hman dan te ngaihtuah chuan heti taka kan rama sawrkar sikul a awngrawp ta mai hi thil mak pawh a ni lo. Zirtirtute chu mihring enkawltu, mihring nun chhertu an ni a, contract leh supply hna inpek ang mai maia duhsak zawngte thun mai mai na tur chi a ni lo ve.

Rev Zairema bawk khan, “Zirtirtu tha awmna hi school tha chu a ni mai,” a ti a, a dik ngawt mai. Zirtirtu an that a, zirnaa an tui tak zet chuan an thawhna school chu school tha a ni mai. School that leh that loh hi school building-ah leh infrastructure-ah hian a innghat lo ve. Sawi leh ta thin ila, hmanlai zirtirtute kha an lo duai lo ngawt mai. Lalhmingliana Saiawi, (IAS retired) khan a tia lawm, “Saitual Middle School-a ka kal lai chuan Pu CZ Huala khan English Grammar min zirtir thin a, min zirtir uluk a, a sawi fiah thiam si, ka man fuh a, high school ka kal tir pawhin English chu a grammar dik lo vin ka ziak ngai ta lo. ‘Pu Zawnghuala kut chhuak ka nih hi’ ka ti thin” a ti nia. Tunlai hian college kal chin ngatah pawh saptawng kawi hnih khat chuah pawh a grammar dika ziak hlei thei lo hi an va tam em!

Mathematics-a an zirtirtu, Pu Tlanghmingthanga chanchin chu heti hian a sawi bawk a, “Pu Hminga chuan Geomatry a thiam hneh a, a sawi fiah thiam si. Class-a theorem leh problem vawi khat min zirtir tawh chu ka hre hmiah zel, ka en nawn ngai lo. Ka tan zirtirtu tha a ni. Saitual Middle School ka zawh phat khan matric exam zawhna (question) hluite ka han en a, Mathematics chu zir tawh miah lo mah ila, Pu Hminga min zirtir tawhna atang khan 67% mark hmu thei ka ni,” a ti a nih chu! Middle School zo hlawtin matric question-ah first division-a pass-na khawp a thiam nghal a nih chu! Zirtirtute hi an va pawimawh teh reng em! Hetiang zirtirtu tha, tun hnu thleng pawha an zirtir chhuahten an ngaihsan hi awm nuk se, kan zirna chuan hma a sawn khawp ang. English medium school tih lam pawh a ni ber lo, zirtirtu tha awmna apiang hi zirna in tha chu a ni mai.

Zirtirtute leh zirlaite hian pass-na division sang pui pui aiin thiamna tak a pawimawh tih hi i hre thar leh ang u.