High School kan kal laia kan Headmaster, kan zirtirtu duh tak Pu C Lalhluna, kumin 2021 a State Teacher’s Award dawngtu hi zirtirtu tha a tling a, he Award pawh hi a phu hliah hliah mai.

Pu C Lalhluna hi tuna a thawhna Government Bethehem Vengthlang High School-a a thawh hma hian hun rei tak Samthang High School-ah Headmaster in a lo awm tawh a, chutih lai kum 1990 chhoah chuan Samthang High School chu private a la ni a, school building chu a bang dap, a chung di leh a chhuat lei a ni a, a chhuanawm loh khawp mai. 

Amaherawhchu, school building tha hi school tha tehna a ni ngawt lo a, Rev Zairema’n, “Zirtirtu tha awmna hi school tha chu a ni mai” a lo tih ang deuhin Samthang High School pawh a building chhe hle mahse zirtirtu tha Pu C Lalhluna awmna a ni miau a, a chheh vel khua zawng zawng- Leithum, Dungtlang, Vangchhia, Sazep, Khuangleng, Leisenzo, Vaphai, Farkawn, Khankawn, Thekte, Thekpui leh Khawbung atang tein zirlaiin an bawh ruih ruih a, chung ho awmna tur Hostel chu khawtlangin hnatlangin an sa hial a ni. Khaw thenawm mai nilo, tlema khaw hla deuh- Champhai, Ruallung, Biate, Lunglei leh Aizawl atang te pawhin an rawn pan nia! Hetih hun lai matric result pawh a tha thin hle a, a kum zawna 100% pass kum te pawh a awm a ni. 

Pu C Lalhluna hi zirnaah a tui em em a, High School-ah chuan English Grammar min zir tir thin a, a tui chilh bawk a, a class chu a nuam thin viau a ni. English Grammar zirna bu a siam a, cyclostyle-ah a her a, a chilh khawm a, chung te chu a zirlai te khan kan tangkai pui viau thin a ni. Pu C Lalhluna anga zirna a tui, zirtir thiam leh English grammar thiam hi school tinah awm se, a hranpaa English Medium School din hi a tul kher lo ang. 

Pu C Lalhluna hi kut hnathawh ngaisang tak, intodelh ngaina mi a ni a. College a kal laiin Zirlai Mahni Intodelh Pawl (Student Self Support Union) a din a, he pawl hi tun thlengin zirlai pawl hriat hlawh tak a ni. Samthang High School-a kan kal lai hian kan school ep mual pharh tha tak mai, buh tin sawm hmun zeta zau chu kan Headmaster hoin thingtuaiin kan hung chhuak vek a, ‘Green Revolution Farm’ vuah a, kan thlo fai a, zirlai te chuan a plot te tein, square feet 12 bial vel leka zauin kan in sem vek a, kan ram bil theuhah chuan thlai chi hrang hrang- Antam te, Tomato te, Hmarchapui leh Bawkbawn te kan ching a, mahni thlai thar ngei mai han ei chu a lawmawmin a nuam dangdai ve khawp mai. Hetiang hian kan zirtirtupa hian kut hnathawh hlut zia leh mahni intodelh pawimawh zia min zirtir a lo ni.

Tin, kan zirtirtupa hi zo nun zemawi chawisan tum tlat mi a ni a, school compound-ah sanghadil kan siam a, sangha kan khawi a, ei an tlinin mizo ruai theh dan dik takin sangha ruai kan theh thin a, a upat dan indawtin chaw min bar hmasak tir thin. Tin, dawn thing (a laia kua) hmangin pen kan siam thin a, lehkhathap (sandpaper) in mam takin kan nawt a, nalh takin rawng kan hnawih a, Samthang High School zirlai te chuan mahni siam chawp Pen kan hmang ngat thin. Sawrkar hotu te’n kan school an rawn tlawh chang in zopa siam pen mawi tak kan lo pe thin a, an ngaihlu thin khawp mai.

Pu C Lalhluna hian mi fuih phur (motivate) a thiam em em a, a zirlai zinga sual deuh leh luhlul deuh te chu hau mai loin a ti ti pui a, an thatna lai a sawi pui a, a fuih a, a zilh bawk thin. Naupang luhlul deuh te chu, “Nang hi i luhlulna tak hi i thatna a ni. Khawvel mi ropui tak tak te hi mi luhlul tak, an tih tawh vek chu sahuai thingvawn tlat mai an ni a, nang pawh hi a tha zawnga i kal fuh chuan mi ropui tak i la ni dawn tlatin ka hria” ti tein a fuih a, an nem em em mai thin a ni. A zirlai naupang te kha a mal malin min hre chiang a, kan inchhung khur dinhmun te, eng ang chhungkua atanga lo zi chhuak nge kan nih tih chenin hriat a tum thin.

Tin, Pu C Lalhluna nuna langsar tak pakhat chu a Pathian tihna kha a ni. Zirlai te chu Pathian tihna nun nei turin min fuih fo thin a, kan school motto-ah pawh, “Lalpa tih hi finna bul a ni” tih kan hmang a, school compound-ah langsar takin kan tar kalh thin. Kan school chhak tlang bawk hmun thengthaw nuam tak chu tawngtaina hmunah kan serh hrang a, ‘Bethel Lung’ kan phun a, a huhoin kan tawngtai fo thin. Kan hotupa khan a zirlai zinga thu awih lo fal deuh chu an lu chungah kut nghatin a tawngtai mai thin.

Tin, khawtlang leh vangtlang thil te kan ta neih a, a chhiat a thata mawhphurhtu rilru (sense of social responsibility) kan neih kha a duh em em a, khua leh tui thaa min chher chhuak kha a tum viau a ni. A changin khaw chhung kan ti fai a, khawlai hmun thenkhatah vantlang tan step kan siam a, electric transformer te pawh ran leh naupang luh theih mai loh turin thingtuaiin kan hung a, kawtchhuah kham pang, ran tlak hlum fo naah te chuan tlak dal kan siam a, nauban humhalh kawngah nasa takin hma min lak pui a, Samthang ram chhunga Keifang thing, theirah tui tak chu a riral zel loh nan Number pein kan chhinchhiah a, Keifang kung sang chuang zetah chhinchhiahna kan tar a ni. Kan Headmaster khan thil a lo ngaihtuah thui viau a lo ni.

‘Kawi pawh a kawm a that chuan a rah pawh a tha’ an lo tih ang deuhin Samthang High School atanga Pu C Lalhluna zirtir chhuah zingah hian mi hlawhtling tak tak pawh an awm nual mai. A zirtir chhuah zingah hian Super Specialist Doctor te, Pastor te, PhD te, College Lecturer te, Police officer te, College Librarian te, sumdawng hlawhtling leh khawtlang tana mi tangkai tak ni zui ta te an kat nuk mai. Hlawh hmuh nan chauha zirtirtu ni lo, zirtirtu hna chu a mihring pui te rawngbawl sak nana hmang tu Pu C Lalhluna hian fak leh chawimawi a phu a, tun tuma State level Teacher’s Award a dawng hi ka lawmpui a, amah hre chiang tu, a school naupang hlui te chuan he Award hi phu kan ti hliah hliah mai.