Kum 5 lai a lo liam ta, kar tin chanchinbu kan enkawl lai khan kan thianza hoin thil ropui deuh mai kan rawt chhuak a. Mizoramin zalenna a sual laia a khaipa la dam kan hriatte hming kan la khawm a, June 30,2010, Remna Ni tak khan heng kan pute ho hi kan sawm khawm a, ‘Mizo Nationalism Chungchang Sawihona’ tia hming vuahin Chanmari YMA committee room-ah chawhnu pum hun kan hmang ho a. An duh zawng an sawi a, keinin zawhna kan zawt a, kan hriat thiam loh thilte min hrilh fiah a. A nuamin a hlawkthlak hle a, kan lo hriat ngai loh thil tam tak kan hriat phah nghe nghe a ni. Anniho kum 50 dawn lai kal ta a huaisen taka Zofate zalenna sualtute hi tunlaia mi tam tak hi chuan kan ngaisang kher lo ang a, politics thila inbeihna hmanraw tuihnai lo taka hmang duh tawk te an awm tak fo avang pawh hian kha hnam thlipui tleh kha mi thenkhatte at-sona ang leka ngai tawk pawh kan awm tawh hial maithei. Mahse, 1960 chho vel a pa rawnkai tling pha leh thalai lehkhathiam rualte khan an hun lai khawvel politics inlum let dan kha an thlir pha ang tih a rin theih a, Kristian ram ni chunga hindu tlimpui zinga awm reng kha dik theiin an hre lo a, Sapho lo luh hma anga tuma awp beh loha awm leh kha an chak a, awp behna hnuaia hmuhsit leh en hranna an tuar thin kha an la na ngawih ngawih bawk a. Indopui zawh atanga independent ram lo piang sup sup leh hmun hrang hranga sorkar thar thar insingsa mup mup karah khan India ram dinhmun hniam zia pawh kha an hmuh hmaih hauh lo ang a. Kum 1960 a United Nations Resolution 1514 (Declaration on the Granting of Independence to Colonial Countries and Peoples an tih mai, ‘UN Declaration on Decolonization’ tia hriat ni bawk) te khan, Crown colony-ah lo awm lo zo tawh mah se khatih laia Mizo thalai lehkhathiam rualte rilru a chawk tho hle bawk. Tichuan, zalenna sual kha tihmakmawhah ngaiin an pen chhuak ta a ni berin a lang. India awp behna hnuaia mahni dikna chanvo pawh hauh ngam lo hnam nih ai chuan huaisen taka zalenna lo sual ngam tawh hnam nih hi inchhuanna tham a tling tih hi thangtharte hian kan hre chiang tial tial ang. Khawvel history-ah hian ram leh hnam tana beitute chanchin aia ngaihnawm a awm lo a ni. Zofate zalenna atana beituten mual an liam zel a, an hotu lawkte phei chu an tlem ta pharh mai. Thawhtanni (July 20,2015) chhun khan signatory pakhat Pu R. Thangmawia a thi leh ta a, zep thu a cheng lo, ngaihtuah a tithui khawp mai. Ani hi lehkhathiam hmasa a ni a, a eizawnna kalsan a ram leh hnam tana feh chhuak niin, Mizoram sorkar lailawk (Provisional Government of Mizoram) ah khan 1965 atangin Senator a ni a. Pa fing, thluak fim taka thil thlir mi a nih bakah, ram leh hnam tana ngaihtuahna seng nasa tak a ni a, hruaitu ropui tak a nih zia chu kum 1988 atanga a kaihhruaina hnuaia ZORO hmalakna hrang hrangah hian a hriat viau a ni. Zofate zai khata kan luan khawm leh theihna tur leh mahnia ro inrel (self determination) a kan awm theihna turin document hrang hrang an la khawm a, India sorkar leh sorkar lian dangte an dawr a, awp beh ramte tana zalenna kawng hawnsak thintu UNO-ah vawi duai lo an palai bawk. Chutianga ZORO hmalaknaa an hruaitu ber Pu R. Thangmawia a liam ta mai hi Zo hnahthlak zawng zawngte tan channa nasa tak a tling. Chutihlaiin, UN buatsaiha tualto hnam tenaute chungchang sawihona 'Eighth Session on Expert Mechanism on The Rights of Indigenous Peoples' a Zofate aiawha a kalna hmun Geneva khawpui kher a a thi hian ngaihtuah a tithui a, a dam chhung zatve aia tam zawk Zofate tana beihna hi a thihchhilh ta ti pawhin a sawi theih ang. Kum 2010-a ‘Mizo Nationalism Chungchang Sawihona’ kan buatsaih tum a ama chanchin a sawi dan chuan kum 1960 vel kha Shillong-ah MZP president a ni a. Chutih hun lai chu Mautam lai vel kha a ni a, zirlai hruaitu a nih angin Mizo District Council hruaitute nen pawh an sawiho thin a. Heng hun lai atang hian Hnam chungchangah a mit a keu tan tawh niin a lang. “Mizo Nationalism din chhuah kha kan tum ber a ni a. ‘Kan ram Krista kan pe,’ kan ti a, Pathian leh kan ram tan kan inpe bawk,” tiin a sawi a. An hun laia Mizo Nationalism kha Christian principle a innghat a nih thu uar takin a sawi bawk. Mi tam tak tan chuan ZORO-in an buaipui Zofate insuihkhawmna leh mahni a ro inrelna chungchang hi a nuihzatthlak viau maithei a, a taka thleng thei lo tur, duhthusam ram buaipui mai a ngai pawh an tam reng a ni. Kelkang harhna chhim ve lo leh inbingbilailet chang ve lote tan hriatthiam a har ang deuh hi a ni mai awm e. Mahse, sawi tawh angin kan pute ho hi kum 50 vel zet kal ta a lehkha thiam rualho kha an ni a, an hun laia Mizo zinga thluak tha ber ber leh chhiar zau ber berte kha an ni hlawm a. An thluak a fim a, an rilru a nghet a, an hmalak chhoh danah hian national politics piah lamah international politics an man hle tih a lang reng. An tum a ruh a, zalenna kawl lo eng tur hi an thlir lui reng a, an beidawng duh lo mai a ni lo a, beiseina sang tak an la nei reng a. Zo hnahthlakte insuihkhawm dan tur an dap a, mahni a ro inrel Zoram a lo pian theihna turin an thiamna leh finna zawng zawng an hmang ral mek a. Thangthar zingah an hnung zui tur an lo chhuah hlan an nghakhlel hle a ni. Chutianga pa danglam tak tak fuankhawmna, Zofate kuahkhawmtu pawl lian ber hotu pa chu kan vui liam mek a ni. ZORO dinhmun atanga thlir chuan an hruaitu thih hi a la hun lo tak zet a, patling leh putar rual huikhawm tur hian amah anga leadership nei tha, hriatna leh thiamna lama mi chungchuang hi an awm ang em? Upain ‘Sakawlin sakawl a hring’ an tih kha maw.