Tunlai hian thawnthu pakhat ka ngaihtuah chhuah fo thin a awm a. Hmanlai hian lal pakhat hi a awm a, an chhehvel ram zawng zawng chu hneh theih a chak em em a, a rilru luahtu ber a ni a. Lalram zau tak neih a chak thu vawi tam tak a sawi a, a mumang lamah te a mangphan thin a. A rilru luahtu ber a nih avangin amah pawh chuan a ngaihtuahna chu a awih ta hmiah mai a. Mahse, sawi sawiin mumang hialah te hmu thin mahse a taka raldo a peih miau loh avang leh ralrel a thiam tlat loh avangin a ngaihtuahna bak a pel chuang lo a. Hei hi kan ram hruaitu lu thenkhatte thusawi thin dan leh an chet dan nen hian ngaihbel a awl duh khawp mai. Sum renchem an sawi fo a, a chang hi chuan an duh ve pawh niin a lang; ram hmasawnna chungchang te, zirna siamthat dan tur te, corruption phoro chungchang te, NLUP hlawhtlinna dan tur te, infiamna lama India kan awp dan tur te leh a dangte an sawi chamchi a. Mahse, kum heti chen min hruai tawh hnuah pawh kan dinhmun dik tak hi a la ropui lo, duhthawh deuha sawi dawn chuan kan pute ho nen hian mumang ramah kan la cheng tlang rih mai mai niin a lang. Zu khapna dan hlih a nih hnua a zu khuahkhirhna dan hman a nih takah pawh hian a tira beiseina min siamsaktute khan an mumang an lo sawi mai mai emaw tih mai tur a ni fo thin. Nikum assembly session-a zu khuahkhirhna dan (MLPC Bill) chungchang an sawiho tum khan dan thar hmangin zu hi khuahkhirh a ni anga, kan hnamin kan that phah anga, ruihhlo pawh a kiam duak anga, zu leh ruih theih thil dangte a zalen lo sawt dawn niin kan ram hruaituten an sawi a nih kha. Zu leh ruihtheih thil zalen hlau ngawih ngawih nu leh pa?thenkhat tan chuan thu lawmawm tak a ni ngei ang. Kan hriat angin kum 17 chhung zu khap burna dan kan hmang a, mahse chu dan khauh tak chu thuneituten an lekkawh that loh avangin a siamtute ngeiin a hlawhchham thu an tlangaupui zui ta chiam a. Kawng lehlamah chuan mahni dan siam lekkawh that duh loh vanga an sawi hnawm zui ta chiam mai kha a dangdai ve riau a ni. Chanchinbu lamah mi thenkhat chuan zu khap burna dan hlih a nih hnuah rin aiin zu in leh rui an tlem tih te, zu vanga buaina sawi tur a vang pharh, tih te an sawi thin a, a tir lama dan bawhchhia hrem an nih thu te pawh kha kan lo hmu bawk. Thil awm dan hi mahni awm hmun atanga kan thlirna hian thui tak min hruai fo thin a, kan duh dan zawnga ngaihdan kan neih thin avang hian a nihna tak hi hmuh hmaih pawh a awl fo reng a ni. Tunhnaia Aizawl Post in a tarlan dan chuan, zu dawr hi a bul hnaia dawr neite tan ninawm hle ni tur a ni, an eizawnna pawhin a tuar hial. “Kan ning lutuk. Zu nena nilenga inchiahpiah hi a ninawm a, an bengchheng si, an tawngkam a chhe thei si, ka thaw a pik ngawih ngawih. Tin, kan inhralh theih loh phah bawk,” tiin Millenium Centre-a zu dawr bula dawr nei pakhat chuan a sawi. He chanchinbu hian a tarlan zel dan chuan nitin zu lei tum insual tuma intin uaih uaih, pawr em em mai, police pawh hau ngam an awm thin thu an sawi a ni. Zep thu a cheng lo a, sapzu zawrh phalna chauh pek ni rih mahse local (zu) a zalen zual sawt a, dan thar avang hian zu in mite an zalen nghal a, hremna lekkawh a nih meuh loh avangin an duh duhna laiah zu an in ngam tawh ni berin a lang. Chhun pachangah pawh kawng sira zu in hmuh tur an awm fo a, zan lamah phei chuan tam tak an ni, kawngpui lun laiah zurui leh damdawi rui an zalen em em a, hmeichhia chu sawi loh tlangval tan pawh zan lam boruak hi a hrisel lo. Lammuala inkhel a awm zan phei chuan thim hlim atangin a kiang hnai kawng kamah pawh ngampa taka zu in hmuh tur an awm thin a, insual buai an awm deuh ziah lehnghal. Dan khauh tak an sawi kha a muhil rih a, zu khuahkhirh min tiamtute khan an theihnghilh zui ta mai a nih hmel. Zu in leh zu rui an zalen chuan he hnam hian a chhiatpui a hlauhawm thu kan lo sawi tawh thin a. Nikum assembly session-a Mizoram Liquor (Prohibition & Control) Bill pu luttu Home minister-in dan thar chungchang a sawi a, “Vantlang hmuna zu in khap a ni a, zu in vanga buaina siam leh zu in hnu a motor khalh khap a ni. Hengte hi kan police leh excise sipaite kenkawh tur tih hi mipuiten kan hriat a pawimawh khawp mai,” a tih te, “Dan thar kan lo neih hian zu hi zalen tak mai a phalrai a ni dawn tihna a ni lova, a lei thei chin fel taka bithliahin vantlang hmun a in leh zu ruite tunhma aia khuahkhirh tum a ni zawk a. Thalai tam takin zu aia pawi zawk drugs an tih loh phah beisei a ni...zu chhe in thinte hnenah zu tha zawk in tura duhsakna mai a ni a, mi zawng zawng in tura buatsaih a ni lo,” tia a sawi te kha a taka hmuh tur a awm lo hi a pawi a ni. Tuna kan dinhmunah hi chuan kan hlauh ang hi a thleng chho mek ni berin a lang. Zu zawrh sawimawi ten an sawi fo thin, home minister pawhin a sawi tho - zu dawr hawn a nih chuan damdawi-ruihhlo ti an tlem anga, zu in duhten zu tha an in tawh ang, tih pawh hi a letling chiahin a thleng mek a. Hman zanah nu pakhatin, “Zu a zalen rual hian no.4 a hluar nghal em em a, tunhmaa ti ngai lote pawhin an tih phah a. A pawi tak tak a ni,” tiin min hrilh a. Chu chu police lam ka zawhte leh fate ruihhloa buai nu leh pa thenkhatte sawi dan pawh a ni. Zan lama khawlaia duty police pakhatin min hrilh dan chuan, “Damdawi ti thinte hian (Zu zawrh hnu hian) zu lamah an insawn chuang lo, ruih tur an hmuh ngang loh chuan zu chu an in ve chauh,” a ti. Kan zingah hian zu khap hnam nih zak an awm a, zu in loin zu an lo buaipui ve lo ngaithei vak lo te an awm a, zu chungchanga kohhran leh tlawmngai pawlin ngaihdan an sawi lo helh em em an awm bawk. Mi thenkhat chuan zu khap duhtute hi lemchang ang hialin an chhuah a, Pharisai ho ti hiala sawi pawh an awm. Chutiang mite duh dan chuan zu khap burna dan hlih a ni a, khuahkhirhna hnuaia zu zawrh phalna dan hman a ni ta. Thuneitute hian an sawi lawk ang ngei a zu leh zu in te, zu ruite hi an khuahkhirh tak tak lo a nih chuan an hnawl tak MLTP Act ai khan an dan siam thar hi kan chhiatpui ngei ang le.