Mizoram Snooker & Billiards Association (MSBA) buatsaih, Mizoram State 10 Ball Pool Ranking Tournament 2024 chu Ningani zan khan quarter finals khelh zawh niin semi final-ah Mizo pool player langsar ber ber an inhmachhawn dawn.

Nakzana semi final-ah hian Lalchhandama, Dinthar leh Mizoram champion lo ni tawh, Zonuntluanga, Electric veng inhmachhawnin R Lalthazuala, Chaltlang leh Mizoram champion lo ni tawh tho, K Lallawmkima, Khatla South te an inkhel dawn a. Race to 8 (frame 8 la hmasa chak)-a khelh tur a ni.

MSBA Hall, Hawla Indoor Stadium, Republic Vengthlang-ah quarterfinal khelhah Chhandama hian 7-2-a Chawngthanzama hnehin semi final a inhlang kai a ni. Lawmkima hian Lalsangzela chu 7-4-in a hneh bawk.

Semifinal luh inchuhna dangah Thazuala hian Lalremruata Fanai chu 7-4-a hnehin Zonuntluanga hian 7-4 vekin Zonuntluanga a hneh bawk.

Semifinal-a inhmachhawn turte hi Mizo pool player tha leh hlawhtlinna eng emaw zat lo chang tawhte an ni hlawm a. Inkhel hnuhnung zawk tur, Lawmkima leh Thazuala te hi May thlaa Mizoram State 9 Ball Pool Ranking Tournament 2024-ah khan hi semi final an lo lut ve ve tawh a. Lawmkima hi March 29-April 2, 2022 chhunga buatsaih Mizoram State 6 Red Snooker Championship 2021-22 khan a lo champion tawh nghe nghe.

Zonuntluanga hi Mizoram Snooker Championship 2018 champion leh Mizoram Snooker Ranking Championship 2019 champion a lo ni tawh a. January thlaa Mizoram State 6 Red Snooker Ranking Tournament 2024-ah khan final a lut a. Mizoram State Games 2019-ah khan Pool 8 Ball-ah champion a lo ni tawh bawk.

Mizoram State 10 Ball Pool Ranking Tournament 2024 hi Thawhtanni tlai atanga khelh tan kha niin Mizoram hmun hrang hrang atangin player 40 chuang an fuankhawm a. Inrinni hian zawh tura ruahman a ni.

Mizoram State 10 Ball Pool Ranking Tournament 2024

June 27, 2024 Result

7:00 PM:

Table 1 - Lalchhandama 7 - 2 Chawngthanzama

Table 3 - Lalsangzela 4 - 7 K Lallawmkima

8:30 PM:

Table 1 - R Lalthazuala 7 - 4 Lalremruata Fanai

Table 3 - Zonuntluanga 7 - 4 B Lalhruaitluanga

Mizoram State 10 Ball Pool Ranking Tournament 2024

Semi Final - June 28, 2024 Fixture

7:00 PM: Lalchhandama vs Zonuntluanga

8:30 PM: R Lalthazuala vs K Lallawmkima