Mizoramah kum 1990 a tanga kum kal mek 2000-21 thleng in HIV+ hmuhchhuah mi 23,092 an awm tawh. Hetihlai hian tun hnai kum 15 (2006-21) chhungin HIV/AIDS vanga thi mi 2,877 an awm.

Mizoram state AIDS control society (MSACS) chhinchhiah danin, kum kal mek 2020-21 chhunga thisen endik tawh 15,843 atangin HIV+ hmuhchhuah 885 an awm a, chu chu thisen endik a tanga zaa 5.6 a tling. Hemi kum chhung vek hian nu naupai thisen endik 8,593 atangin HIV+ 77 awmin, chu chu zaa 0.9 a ni.

HIV+ hmuhchhuah zingah hian kum 25-34 inkar an tam ber a, mipa 6,396 leh hmeichhia 2,600, an vaiin mi 8,996 an tling. Chu chu HIV+ hmuhchhuah zawng zawng a tangin za a 42.59 a ni. Kum 35-49 ah HIV+ hmuhchhuah mipa 3,519 leh hmeichhia 2,075, an vaiin 5,594 (26.49%) awm bawkin, kum 15-24 inkarah HIV+ mipa 3,193 leh hmeichhia 1,584, an vaiin mi 4,777 (22.62%) an awm. Kum 50 chung lamah mipa 725 leh hmeichhia 403, an vaiin mi 1,128 (5.34%) an awm a, kum 14 hnuai lam mipa 308 leh hmeichhia 317, an vaiin mi 625 (2.96%) HIV+ hmuhchhuah an awm.

MSACS Project Director, Dr. Lalthlengliani chuan, HIV/ AIDS chungchanga mahni dinhmun inhriat chu huaisenna a ni tih ZALEN hrilhin, chu chu chhungte himna tur niin a sawi bawk.