Aizawl : Mizoram sawrkarin kum 2014-2022 chhungin tui tla zawnna hmarua chi hrang hrang leina atan Rs. 1,13,33,023 a seng tawh a. Hetihlai hian kum 2013-14 atanga kum 2021-22 chhungin Mizoramah khuarel chhiatna thleng vanga nunna chân mi 152 an awm a, chung zinga mi 85 chu leimin vang an ni.

ZALEN-in RTI hmanga zawhna a siam, Mizoram sawrkara Disaster Management & Rehabilitation (DM&R) department SPIO-in a chhan danin, kum 2015-22 chhunga DM&R/Mizoram sawrkarin tui tla zawnna hmanrua a lei zingah Rs. 40,44,800 senna, OBM engine pariat leina chu pawisa hmanna tam ber niin, Rs. 20,48,000 senga lei, Remort Arew Lighting System (RALS) 10 pawh pawisa hmanna tam pawl a ni.

Hengte bakah hian generator (Honda) 15 leina atan Rs. 14,43,855  hman ni bawkin, Pelican LED light pali leina atan Rs. 11,78,208 sen a ni a, hengte hi tui tla zawnna hmanrua lei zinga Rs. Nuai 10 chung lam senna a ni.

Hetihlai hian State Emergency Operation Centre (SEOC)-ah tui tla zawnna hmanrua chi hrang hrang - OMB Engine pakhat, Pelican light (RALS) large pahnih leh small pakhat, life jacket pariat leh lenkhang (large) pahnih kawl mek a ni.

DM&R department SPIO tar lan danin tun hnai kum kua, 2013-14 atanga 2021-22 chhunga khuarel chhiatna thleng vanga nunna chân zingah leimin vanga nunna chân mi 85 zet awmin kangmei vangin mi 27 an awm bawk a. Cyclone vanga nunna chân mi paruk, tui lian vangin mi 19, tek den (lightning) vangin mi pali; lei chim, thing delh leh lung delh mi pakhat theuh, lei tawlh/lung tawlh vanga thi paruk leh thing atanga tla hlum mi pahnih, an vaiin mi 152 an awm.

Mizoramin tui tla zawnna hmanrua a lei dan (Rs.)

Kum    Hmanrua                 Lei zat    Rate            A man
2014    Rubber Boat               2            1,28,000     2,56,000
2015    Scuba Gear                2             3,16,020     6,32,040
2015    Life Jacket                 100          3,149         3,14,900
2015    Pelican LED Light      4             2,94,552    11,78,208
2015    Portable Beathing
            Air Compressor         2             4,78,610     9,57,220
2016    Search Light              3             70,000        2,10,000
2017    OMB Engine              8             5,05,600     40,44,800
2018    Remote Area
            Lighting System       10            2,04,800     20,48,000
2019    Search Light             2              6,500         13,000
2019    LED Light 60W         2              3,200          6,400
2019    Generator                15             96,257       14,43,855
2019    Life Jacket                200           988            1,97,600
2019    Rain Coat                50             620            31,000