Aizawl: Nikum 2019 chhunga damdawi in hrang hranga mitthi 3442 singa thihna thlentu tam ber chu pum lam tha lo a ni a, hei hi thihna thleng zawng zawng atanga chhutin 16.09% a tling.

Directorate of Economics & Statistics Department-in nikum 2019 chhunga doctor-ten mitthite thih dan an chhinchhiahna ‘Medical Certification of Cause of Death (MCCD)’ tarlan danin pum tha lo (disease of digestive system) vanga thi hi mi 554 awmin hei hi mitthi chhinchhiah atanga chhutin 16.09% a tling a. Natna hrik chi hrang hrang vanga thihna chuan dawtin cancer, thizen zam tha lo leh thawkna dawt lam tha loten an dawt a ni.

Chhinchhiahna atanga a lan danin nikum chhung khan sawrkar leh mi mal damdawi in hrang hrang 109-ah chhinchhiahna hi kalpui a niin mitthi 3,442 zinga 2,125 chu mipa an ni a, hmeichhia 1,317 an awm bawk a, hmeichhia aia mipa thi an tamna hi 808 a tling a ni. Nikum chhunga thihna thlentu tam ber dawttu ,Neoplasms/cancer hian thihna thleng zinga 15.5% a tling a, chung cancer zingah chuan chaw kawng, pumpui, ril, thin etct te a tel a ni. Pathumna natna hrik chi hrang hrang (certain infectious & parasitic disease) chuan thihna thleng zingah 15.3% a awh a, heng zingah hian natna hrik (bacteria) leh scepticemia te a tel a ni. Thisen zam tha lo vanga thihna (disease of circulatory system) chu 15% a ni a, thawkna dawt tha lo vanga thihna chuan 14.4% ni phakin kal leh zun kawng tha lo vanga thihna chu alian zual zingah a tel bawk.

Nikumah hian Medical Certification of Cause of Death (MCCD) hi sawrkar damdawi in, mi mal damdawi in, PHC, UPHC leh UHC 109-ah te neih a niin hengte hi Mamit district-ah 10, Kolasib-ah 7, Aizawlah 36, Champhaiah 15, Serchhipah 8, Lawngtlaiah 10, Lungleiah 17 leh Siaha district-ah 6 te an ni.