Kum 1984 atanga May 15, 2020 inkar chhung khan Mizoramah damdawi hmansual vanga thi mi 1600 an awm tawh a, 1410 hi mipa niin hmeichhia 190 an ni. Mi 1161-in proxyvon/parvon spas an thihpui a, mi 206-te chu heroin vanga thi an ni a, a dang 233-te chu tihpawlh an ni. 2017 atangin proxyvon/parvon spas vanga thi an awm tawh lo a, thite hi heroin leh a kaihhnawih tite an ni.

Aizawl: Kumin January thla atanga Zirtawpni (May 15, 2020) thleng khan Mizoram-ah damdawi hman sual vanga thi (drugs related death) mi 21 an awm a. Mizoramah lockdown kalpui a nih avangin ni dang aiin damdawi hmuh tur a tlemin a man pawh a to hle niin Excise & Narcotics Department thawktute chuan an sawi.

Excise & Narcotics Department chhinchhiah danin kumin chhunga damdawi hman sual vanga thi 21 zinga 18 hi mipa niin a dang 3 hi hmeichhia an ni a, an vai hian heroin kaihhnawiha thi vek an ni. Mitthi hi January-ah mi 7 awmin heng zinga 5 hi mipa an ni a, hmeichhia 2 an awm bawk. February thlaah mi 6 thiin 5 hi mipa an ni a, hmeichhia 1 a awm bawk a. March-ah 2, April-ah 4 leh May thlaah mi 2 thiin an vai hian mipa vek an ni.

Excise & Narcotics Department thawktute chuan tun hnaia lirthei an endikna velah pawh damdawi man tur a awm meuh lo nia sawiin lockdown vangin drugs a vang tih an sawi a. Khawtlang nen tangruala an man chhunte pawh lockdown hmaa an lo lak tawhte an ni tih an sawi a. Hetih lai hian thenawm state, Bagha vel atang chuan bungraw karah tlem azawng lo lut a awm theih thu an sawi a. Ni danga a lo luhna Champhai lam atang chuan man an neih loh thu Zalen an hrilh.

Zalen palai zawhna chhangin Excise & Narcotics Department thawktute chuan drugs chu ni dang zawng aiin a man a sang hle niin an sawi a. "Ni danga chhinsen 1 Rs. 800/1000 ni thin chu tunah hian Rs. 3000 te a ni a, cane khat Rs. 2000/2500 vel ni thin pawh Rs. 5000 ah a kai chho a, mahse pawisa nei ringawt mahse leitur a awm chuang lo a ni," an ti.

Lockdown zawh hunah damdawi hmansual vanga thi an tam theih thu sawiin Excise & Narcotics Department thawktute chuan, "Damdawi ti thin te hian a hmaa an tih thin ang (dose) a an tih leh chuan an taksa in a zo thin lo a, thih mai a hlauhawm avangin fimkhur a ngai hle a ni," an ti a. Aizawl leh a chhehvela damdawi ti thin te chuan Assam lam an pan nasa tih sawiin Vairengte a Golgotha camping centre-ah mi tam tak dah an nih bakah mi thahnem tak chu Tawngtai Bethel Camping Centre-ah dah an ni tih Zalen palai an hrilh bawk a ni.