October 28, 2022; Kumin 2022-23 atan a Mizoram State Health Care Scheme (MSHCS) a inziak lut zat chu tun hnai kum 4 (policy year) chhunga inziak lut tlem ber kum a ni a. Hemi chungchangah hian Mizoram Larsap Hari Kambhampati chuan health care scheme hnuaia inziak lut an pun theih nan theihtawp chhuah a tul tih a sawi.

ZALEN in RTI zawhna a siam, Health departmentin a chhan dain, Mizoram State Health Care Scheme (MSHCS) hnuaiah kum liam ta October 1 - March 31, 2022 (thla 6) chhung atan inziaklut chhungkaw 87,695 an awm laiin, kum kal mek 2022-23 atana inziak lut chhungkua 39,505 chauh an awm. 

MHCS ah (policy year) October 1, 2019-September 30, 2020 (thla 12) ah inziaklut chhungkaw 61,015 an awm a, October 1, 2020-September 30, 2021 (thla 12) ah chhungkaw 1,13,720, October 1, 2021-March 31, 2022 (thla 6) ah chhungkaw 87,695 inziaklut an lo awm tawh a, kumin hi tunhnai kum li (policy year) chhung a inziaklut tlem ber kum a ni.

Hemi chungchangah hian health department chuan, health care scheme a inziahluh chu mimal duhthlanna (voluntary) a nih thu leh, kumin a inziaklut tlemna chhan hre turin zirchianna neih a nih loh thu te RTI chhanna ah chuan an tarlang.

Health care a inziahluhna man hi AAY (card var) tan Rs. 200, PHH (card pawl) tan Rs. 1,000, Non-NFSA (card var) tan Rs. 2,000 leh ration card nei lo tan Rs. 2,000 niin, chhungkaw member zat bituk a awm lo.

Mizoram Larsap Hari Babu Kambhampati leh Health department hotute chu October ni 26, 2022 khan Raj Bhavan ah inkawmin, Larsap chuan, health care scheme hnuaia inziak lut an pun theih nan theihtawp chhuah a tul tih a sawi.

Kumin a MSHCS a inziaklut zat : 2022-23
District    Chhungkua
Aizawl    27,532
Kolasib    2,201
Mamit    1,401
Champhai    2,498
Serchhip    1,725
Lunglei    2,923
Lawngtlai    700
Siaha    525
TOTAL    39,505