Aizawl September 2, 2022 : MPCC PAC member PC Lalthanliana, Ex Minister chuan, MNF Party chu Mizo mipui ten sawrkar tlakah an ngai tawh lova, sawrkar nawn leh tur boruak an keng tawh lo, mipuiin sawrkarna pek an tum tawh lo,a chhan chu an thutiamah an ding lova, chumai bakah Zoram mipui te retheihnaah min hruai lut a, MNF sawrkar hnuaiah Mizo mipui te kan rum mek a ni, a ti.

Vawiina MPCC Campiagn Committe in Mla bial tlawhchhuah hun Zuchhip Hall, Khawzawla an hman naah PC Lalthanliana chuan, "MNF sawrkarah chuan sawrkar hnathawkin thlatin an hlawh an lak thin chu, MNF sawrkarin a pek theih chuan Hnam Rún ah intihtheih nan an hmang thin a, ‘hei aia sorkar chak a awmlo,’ te an ti. Sawrkarin kalphung mumal a neih loh vangin sum leh paiah Mizoram mipui ten harsatna namenlo kan tawh avangin Mizo mipuite kan rumin kan tap mek a, Congress in chhanchhuah hna kan thawh a ngai a ni.  A chhanchhuak tur hian sawrkar rintlak leh Chief Minister tha leh rintlak kan nghak mek a ni," a ti bawk.

MNF party chungchang sawiin, "MNF Party mi leh sa ten an Party President lakah rinna an nghat tawh lova. MNF sawrkar la ring ho hi chu MNF Party ruihchilh/atchilh ho chauh an ni tawh, tiin, "Sawrkarna chang mek te hi inthlan hma kum 3 emaw kum 4 naah hian a leh pekah an sawrkar  dawn leh dawn loh a lang thin a, tuna sorkarna chelh mek tu MNF Party  te hi sawrkar leh ringlo hi Mizo mipui tam zawk an ni," a ti.

ZPM chungchang pawh sawiin PC Lathanliana chuan, "ZPM ho hi ‘Enchhin Policy’ an kal pui mek a, an party hruaitute inkarah hotu/thuneitu nih inchuhin boruak tha lo tak an nei mek a, Sa kah hma a, a kaptu chan inchuh buai ang hi tuna ZPM hi an ni. An Party Super CM atana an Candidate lah chu Zin loh Bill la duh a ni a, Mizo mipui ten a mizia kan hrechiang a, enchhin a ngai leh tawh chuanglo. Chubakah, thil chianglo hi enchhin an ngai thin a, enchhin ngailo Mizo mipui ten a mizia kan hriat chiansa corruption leh therhlo a fihlim, sum leh pai enkawl thiam leh renchem thiam Pu Lalsawta Congress in President kan nei a. Mizo mipui tam takin Mizoram sum leh pai harsatna leh retheihna ata khaichhuak turin a chungah rinna an nghat mek a ni," a ti.